قىتايدان كەلگەن قانداسىمىز بالقاش كولىنەن ءجۇزىپ ءوتۋدى جوسپارلاپ وتىر
استانا. KAZINFORM - قىتايدا تۋىپ-وسكەن قازاق بالاسى، دالالىق سپورتتىڭ سۋدا ءجۇزۋ تۇرىنەن تالانتىمەن تانىلىپ، ۇلكەن وزەن، ۇلى كولدەردى كەسىپ ءوتىپ، «التىن بالىق» دەگەن لاقاپ اتقا يە بولعان التىنبەك ورازبەك ۇلىمەن بولعان سۇحباتتى نازارلارىڭىزعا ۇسىنامىز.
- التىنبەك اۋەلى ءوزىڭىزدى تانىستىرا كەتسەڭىز؟
- مەن شىنجاڭ التايدىڭ شىڭگىل اۋدانىنا قاراستى تاناشپاي دەگەن اۋىلدا تۋىپ-ءوستىم. وزەن جاعاسىندا وسكەندىكتەن بولار كىشكەنتاي كەزىمىزدەن سۋعا قۇمار بولدىم. كوپ ۋاقىتىمىز سۋدىڭ بويىندا وتەتىن. ءبىزدىڭ اۋلەتتىڭ ادامدارىنىڭ ءبارى سۋدا جاقسى جۇزە الادى.
- سۋدا ءجۇزۋ سپورتى بويىنشا قانداي جەتىستىكتەرىڭ بار؟
- 2017-جىلى قىتايدىڭ ايگىلى يانتسزى (چاڭجياڭ) دارياسىن ەندەي (وزەن كەڭدىگى التى شاقىرىم) كەسىپ ءوتتىم. بۇل جەتىستىگىم ءۇشىن شىنجاڭ تاريحىنداعى يانتسزىنى (چاڭجياڭ) كەسىپ وتكەن تۇڭعىش سپورتشى رەتىندە ماراپاتتالدىم. 2018-جىلى قىتايدىڭ حۋاڭحى (حۋان حە نەمەسە سارى وزەن، ورىسشا جەلتايا رەكا) وزەنىنەن بەس مىڭ ادام قاتىسقان ءجۇزۋ بايگەسىندە ءبىرىنشى بولىپ كەسىپ ءوتتىم (وزەننىڭ ەنى - ەكى كيلومەتر). بۇل جولى دا اتالعان وزەندى كەسىپ وتكەن تۇڭعىش شىنجاڭدىق بولىپ تىركەلدىم. 2019-جىلى ىلەدەگى قىستىق مالتاۋدان ءبىرىنشى دارەجەلى جۇلدەنى ەنشىلەدىم. وسى باسەكەدە ول التاي ايماعىنىڭ سۋداعى قىستىق مالتاۋ رەكوردىن جاڭالادىم. 2016 -جىلى حۇڭيانچى ( قىزىلتاس سۋ قويماسى) توسپاسىنان ەندەي ءوتتىم (ءۇش كيلومەتر). 2017-جىلى ۇرىمجىدە 10 كيلومەترلىك سۋ ايدىنىنداعى بايگەدە 3 ساعاتتا قارسى جاعاعا جەتىپ، رەكورد جاڭارتتىم. 2020-جىلى جانە بيىل التايداعى ۇلىڭگىر كولى مەن (34 كيلومەتر) قاناس كولىنەن (38 كيلومەتر) ءوتۋدىڭ حالىقارالىق رەكوردىنا دايىندالىپ جاتقاندا عالامدى جايلاعان پاندەميانىڭ سەبەبىنەن كەيىنگە قالدى.
- چاڭجياڭ، حۋاڭحى وزەندەرىن كەسىپ وتۋگە قالاي جولداما الدىڭ؟
- بۇل جولداماعا ءار وبلىستان 10 مىڭداي ادام ءوتىنىش بىلدىرگەن. سولاردىڭ ىشىنەن 5 مىڭ ادام ىرىكتەلدى. 5 مىڭ ادامنان 3 مىڭ ادامعا قىسقاردى. كەيىن سولاردىڭ ىشىنەن 3 ءجۇز ادام تالداندى. سپورتشىلار تاعى ىرىكتەلىپ، 100 ادامعا قىسقاردى. سول 100 ادام 10 كيلومەترگە جارىستىق. وسى ارالىقتى 3 ساعات 9 مينۋتتا ءجۇزىپ ءوتىپ، رەكورد جاڭالادىم جانە وسى سايىسقا جولداما الدىم.
- قىستى كۇنى سۋعا ءتۇسىپ جۇرگەن ءبىراز ۆيدەولارىڭدى كوردىم. بۇل جاتتىعۋدىڭ قانداي اسەرى بار؟
- مەن سۋدى جاقسى كورەتىنىم سونشالىق، قىس بولسىن، جاز بولسىن سۋعا جۇزۋىمە ەش اسەر ەتپەيدى. قىستا سۋعا شومىلۋ ادامعا ءتىپتى جاقسى اسەر ەتەتىنىن بايقادىم. سۋىق سۋ ادامدى شيراتادى، شىنىقتىرادى. رەۆماتيزم سەكىلدى اۋرۋلاردىڭ الدىن الادى. جالپى قىستا سۋعا تۇسۋدەن جانىم راحات تابادى.
- التايدا ۇلكەن وزەندەر كوپ، شىڭگىل وزەنى دە تاسىعاندا وتكەل بەرمەيتىن ۇلكەن وزەندەردىڭ ءبىرى. سۋ تاسىپ جاتقان كەزدە وزەنگە تۇسكەن كەزدەرىڭ بولدى ما؟
- كوكتەمدە مۇز ەرىپ، قار كەتە باستاعاندا، سۋ تاسقىنىنا بايلانىستى ادامداردىڭ زارداپ شەگۋى، مالداردىڭ سۋعا كەتۋى، ارالدا قامالىپ قالۋى سەكىلدى ءتۇرلى وقيعالار بولىپ تۇرادى. وسىنداي جاعدايلاردا اۋىلداستاردىڭ كوبى مەنەن كومەك سۇراپ جاتادى. بارىنە كومەكتەسۋگە تىرىسامىن. كوپتەگەن قۇتقارۋ جۇمىستارىنا اتسالىستىم، ءبىراز ادامداردى سۋدان امان الىپ قالىپ، العىسىن الدىم. سۋعا كەتىپ، مۇردەسى تابىلماعان كىسىلەردىڭ سۋ استىنان دەنەسىن سۇڭگىپ الىپ شىعىپ، يەسىن تاپسىرعان كەزدەرىم بولدى.
- قازاق ەلىنە كەلگەن قادامىڭ قۇتتى بولسىن! الداعى جوسپارىڭ تۋرالى ايتىپ بەرسەڭ؟
- ەلگە كەلگەلى كەرەمەت كوڭىل كۇيدە ءجۇرمىن. كوپتەگەن اعالارمەن تانىستىم. بارلىعى قولداۋ ءبىلدىرىپ، الداعى ارمانىما شابىت بەرىپ جاتىر. مەنىڭ الداعى جوسپارىم ەڭ ۇلكەن كولدەردىڭ ءبىرى - بالقاش كولىن كەسىپ ءوتىپ، ءوز مۇمكىندىگىمدى دالەلدەگىم كەلەدى. قازىر سول باعىتتا دايىندالىپ جاتىرمىن.
- بالقاش كولىنەن ءجۇزىپ ءوتۋدى قاشانعا جوسپارلاپ وتىرسىڭ؟ دايىندىعىڭ قالاي؟
- اللا بۇيىرسا الداعى جازدا ۇيىمداستىرۋدى كوزدەپ وتىرمىز. ماماندارمەن كولدىڭ سۋىنىڭ قۇرامى تۋرالى، پىسەتىن ۋاقىتى تۋرالى اقىلداساتىن بولامىز. دايىندىق ويداعىداي دەپ ايتا الامىن. بۇدان بۇرىن دا التايداعى قاناس كولىن كەسىپ وتۋگە دايىندالعان ەدىم. ءبارى جاقسى بولادى دەپ ويلايمىن.
بۇل جوسپار ساتىمەن بىتسە، ىشتە جۇرگەن ۇلكەن ارمانداردىڭ ءبىرى شەتەلگە شىعىپ، قازاق ەلى اتىنان ۇلكەن جارىستارعا قاتىسقىم كەلەدى. سولتۇستىك سۋىق بەلدەۋلەرگە بارىپ، قىستا جۇزۋدەن دە ءوز مۇمكىندىگىمدى كورگىم كەلەدى.
- سۇحباتىڭا كوپ راقمەت! الداعى ارمانىڭا ساتتىلىك تىلەيمىن!
اۆتورريزابەك نۇسىپبەك ۇلى
