قىتايداعى قانداسىمىز قازاعى جوق قالاعا اكىم بولىپ سايلاندى
استانا. KAZINFORM - قىتايلىق قانداسىمىز ەربول زىقان ۇلى گانسۋ پروۆينتسياسىنىڭ جاڭيە قالاسىنا اكىم بولىپ سايلاندى، دەپ حابارلايدى Kazinform The Paper باسىلىمىنا سىلتەمە جاساپ.
باسىلىمنىڭ جازۋىنشا، جاڭيە قالالىق V حالىق وكىلدەرى جينالىسىنىڭ ءتورتىنشى سەسسياسىنىڭ كەزەكتى وتىرىسىندا ە. زىقان ۇلى قالالىق اكىمدىكتىڭ باسشىسى قىزمەتىنە ءبىراۋىزدان سايلاندى.
قىتايلىق باسىلىم ق ح ر ش ۇ ا ر اۋديتورلىق باسقارماسىنىڭ جەتەكشىسى قىزمەتىندە بولعان ەربول زىقان ۇلىنىڭ 2024-جىلى قازان ايىندا جاڭيە قالالىق پارتيا كوميتەتى حاتشىسىنىڭ ورىنباسارى، قالا اكىمىنىڭ مىندەتىن اتقارۋشى بولىپ تاعايىندالعانىن ەسكە سالادى.
اشىق دەرەككوز بويىنشا، ە. زىقان ۇلى 1973-جىلى مامىردا قىتايدىڭ التاي وڭىرىندە دۇنيەگە كەلگەن، جوعارى ءبىلىمدى. بۇعان دەيىن بۋىرشىن اۋدانىنىڭ اكىمى، التاي ايماعى اكىمشىلىك باسشىسىنىڭ ورىنباسارى سەكىلدى لاۋازىمدى قىزمەتتەر اتقارعان.
ەربول زىقان ۇلى - قىتايداعى ۇلتى قازاق مەملەكەتتىك قىزمەتكەرلەردىڭ اراسىندا ش ۇ ا ر اۋماعىنان تىس جەردە وڭىرلىك ماڭىزى بار قالاعا اكىم بولىپ سايلانعان العاشقى تۇلعا.
جاڭيە - قىتايدىڭ سولتۇستىك-باتىسىنداعى گانسۋ پروۆينتسياسىنا قاراستى جەرگىلىكتى ماڭىزى بار قالا. جالپى جەر اۋدانى 39436,53 شارشى شاقىرىم، تۇرعىلىقتى حالىق سانى 1,2 ميلليونعا جۋىق، ونىڭ 97 پايىزى ەتنيكالىق قىتايلار. قالاعا تاۋەلدى سۋنان سارىۇيعىر اۆتونوميالىق اۋدانى قىتايدا عانا كەزدەسەتىن تۇركىتىلدەس سارىۇيعىر حالقىنىڭ تاريحي مەكەنى سانالادى. سونداي-اق قالا وكرۋگىندە دۇنگەن، موڭعول، تيبەت حالىقتارىنىڭ وكىلدەرى تۇرادى.
ايتا كەتەيىك، قىتاي ا ق ش- تىڭ 28 كومپانياسىنا شەكتەۋ قويدى.
