قىتايداعى ەلەكتروموبيلدەر ساتىلىمى بيىل 11,5 ميلليون داناعا جەتۋى مۇمكىن
بەيجىڭ. KAZINFORM - بەيجىڭدەگى Auto China 2024 اتتى 18-حالىقارالىق اۆتوسالونىندا 278 ەلەكتروموبيل مودەلى ۇسىنىلدى. وتكەن جىلى قىتايدا ەلەكتروموبيل ەكسپورتى كۇرت وسكەن. بيىل ەلدەگى جالپى كولىك ەكسپورتى 5,5 ميلليون داناعا جەتەدى دەپ جوسپارلانىپ وتىر.
بيىل بەيجىڭ اۆتوسالونىندا 117 الەمدىك پرەمەرا (ونىڭ ىشىندە 30 ى ترانسۇلتتىق كومپانيالاردىڭ الەمدىك تۇساۋكەسەرى) جانە 41 كونسەپت-كار مودەلى ۇسىنىلدى. كورمەدە سونىمەن قاتار 278 ەلەكتروموبيل ۇلگىسى تانىستىرىلعان.
قىتاي اۆتوموبيل ونەركاسىبى قاۋىمداستىعىنىڭ (CAAM) مالىمەتىنشە، 2023 -جىلدىڭ سوڭىنا قاراي قىتاي 4,91 ميلليون كولىك ەكسپورتتاعان. جاپپاي ءوسىم وتكەن جىلى 77,6 پايىزعا ءوسىپ، 1,2 ميلليون بىرلىكتەن اسقان جاڭا ەنەرگەتيكالىق كولىك قۇرالدارى (NEVs) ەكسپورتىنىڭ كۇرت وسۋىنە بايلانىستى بولدى. وتكەن جىلمەن سالىستىرعاندا تازا ەلەكتر كولىكتەرىنىڭ ەكسپورتى 80,9 پايىزعا، گيبريدتى كولىكتەر ەكسپورتى - 47,8 پايىزعا ءوستى.
وتكەن جىلى ەنەرگەتيكالىق كولىكتەردىڭ ءوندىرىسى مەن ساتىلىمى سايكەسىنشە 9,58 ميلليون جانە 9,49 ميلليون دانادان اسىپ، جىلدىق ەسەپتەۋ بويىنشا 35,8 پايىزعا جانە 37,9 پايىزعا ءوستى. NEV نارىعىنىڭ ۇلەسى 31,6 پايىز بولدى.
CAAM مالىمەتىنشە، 2023 -جىلى قىتايدا اۆتوموبيل ءوندىرۋ جانە ساتۋ كولەمى 30,16 ميلليون (11,6+ پايىز) جانە 30,09 ميلليون (12+ پايىز) بىرلىك بولعان. بولجامعا سايكەس، قىتايدا NEV ساتىلىمى 2024 -جىلى 11,5 ميلليون داناعا، ال جالپى كولىك ەكسپورتى 5,5 ميلليون داناعا جەتەدى.
بەيجىڭ كولىك سالونى Shunyi حالىقارالىق كورمە زالىندا 4-مامىرعا دەيىن جۇمىس ىستەيدى. 25-26-ءساۋىر كۇندەرى Auto China 2024 تەك قىتايلىق جانە شەتەلدىك جۋرناليستەر ءۇشىن جۇمىس ىستەيدى. وسى ەكى كۇن ىشىندە ب ا ق وكىلدەرى ءۇشىن رەكوردتىق كورسەتكىش - 163 باسپا ءسوز كونفەرەنتسياسى وتەدى.
اۆتور
زارينا تۋعانبايەۆا
