قىتايدا پىشاقپەن جاسالعان شابۋىلدان جاپوندىق بالا زارداپ شەكتى، جاپون ۇكىمەتى الاڭداۋشىلىق ءبىلدىردى

استانا. KAZINFORM - جاپوندىق نيككەي اقپارات اگەنتتىگىنىڭ حابارلاۋىنشا، 18-قىركۇيەكتە قىتايدىڭ گۋاندۋن پروۆينتسياسىنىڭ شىنجىن قالاسىنداعى «جاپون مەكتەبىندە» وقيتىن جاپوندىق بالاعا بەلگىسىز قىتايلىق ەر ادام شابۋىل جاساعان.

بۇل تۋرالى جاپونيا مينيسترلەر كابينەتى باس حاتشىسىنىڭ ورىنباسارى حيروسي موريا باسپا ءسوز ءماسليحاتىندا مالىمدەدى. ءتيىستى اقپاراتقا سايكەس، شابۋىلعا ۇشىراعان بالا (ۇل، باستاۋىش سىنىپ وقۋشىسى) وقيعا بولعان كەزدە مەكتەپكە جالعىز كەلە جاتقان.

قىتايدىڭ شىنجىن قالالىق پوليتسياسى تاراتقان اقپاراتقا قاراعاندا، شابۋىلدى جاساعان ادام قىتاي ازاماتى، 44 جاستاعى ەر ادام بولعان. شابۋىلشى پىشاق قولدانعان. پوليتسيا شابۋىل جاساعان ادامدى ۇستاپ، جاراقات العان بالانى اۋرۋحاناعا جىبەردى.

«جاپون ازاماتتارىن قورعاۋ تۇرعىسىنان ءبىز جەرگىلىكتى ۇكىمەتكە وسىنداي وقيعالاردىڭ قايتالانۋىن بولدىرماۋ جانە ەگجەي-تەگجەيلى اقپاراتپەن ءبولىسۋ تۋرالى ءوتىنىش جاسادىق»، - دەدى جاپونيا مينيسترلەر كابينەتى باس حاتشىسىنىڭ ورىنباسارى حيروسي موريا.

بۇل بيىل قىتايدا جاپوندارعا جاسالعان العاشقى شابۋىل ەمەس. 2024-جىلدىڭ ماۋسىمىندا وسىنداي شابۋىل تسزيانسۋ پروۆينتسياسىنىڭ سۋچجوۋ قالاسىندا بولدى. سول كەزدە بەلگىسىز قىتايلىق ەر ادام پىشاقپەن مەكتەپ اۆتوبۋسىن كۇتىپ تۇرعان جاپوندىق انا مەن بالانى جاراقاتتاپ، شابۋىلدى توقتاتۋعا تىرىسقان تاعى ءبىر قىتايلىق ايەلدى ولتىرگەن.

قىتايداعى جاپون مەكتەپتەرى - قىتايداعى ءتيىستى ىشكى زاڭدار مەن ەرەجەلەرگە سايكەس قىتايداعى جاپون ازاماتتارىنىڭ بالالارىنا ءبىلىم بەرۋ ءۇشىن قۇرىلعان مەكتەپتەر. قىتايداعى جاپونيا ەلشىلىگىنىڭ ستاتيستيكاسىنا سايكەس، قىتايدىڭ 9 قالاسىندا 11 جاپون مەكتەبى بار، 2024-جىلدىڭ 15-ساۋىرىندەگى جاعداي بويىنشا مەكتەپتەردە 3305 جاپوندىق وقۋشى وقيدى.

بۇل مەكتەپتەردەگى وقۋشىلارعا شابۋىل جالعاسىپ جاتقانىن ەسكەرە وتىرىپ، جاپونيا ۇكىمەتى قىتايداعى جاپون مەكتەپتەرىن قوسىمشا قاۋىپسىزدىك قىزمەتكەرلەرىمەن قامتاماسىز ەتۋ ءۇشىن قارجى ءبولۋدى جوسپارلاپ وتىر.

اۆتور مۇقتار مۇرات