قىتايدا تورنادو كەزىندە بەس ادام قايتىس بولدى

استانا. KAZINFORM - سەنبى كۇنى تۇستەن كەيىن قىتايدىڭ وڭتۇستىگىندەگى گۋاندۋن پروۆينتسياسىنىڭ ورتالىعى گۋاڭجوۋ قالاسىندا بولعان تورنادودان بەس ادام قازا تاۋىپ، 33 ادام جاراقات الدى. بۇل تۋرالى شينحۋا اقپارات اگەنتتىگى حابارلايدى.

جەرگىلىكتى بيلىكتىڭ حابارلاۋىنشا، تورنادو قالاعا قارايتىن بايۋن اۋدانىنداعى چجۋنلوتان ەلدى مەكەنىندە ساعات 15:00 شاماسىندا سوققان. قۇيىن بولعان جەردەن 2,8 شاقىرىم جەردە ورنالاسقان ليانتيان كەنتىندەگى مەتەوستانتسيا جەلدىڭ ماكسيمالدى ەكپىنى 20,6 م/س بولعانىن تىركەدى.

پروۆينتسيالىق مەتەورولوگيالىق باسقارماسىنىڭ الدىن الا تەرگەۋى تورنادونىڭ قارقىندىلىعى قاۋىپتىلىكتىڭ 3-دەڭگەيىندە (ماكسيمالدى قاۋىپتىلىك - 5-دەڭگەي) بولعانىن جانە شامامەن ءبىر شاقىرىم قاشىقتىققا جىلجىعانىن انىقتادى.

اپات ايماعىنداعى زارداپتاردى جويۋعا قالالىق توتەنشە جاعدايلار باسقارماسىنىڭ قۇتقارۋشىلارى، مەتەورولوگيالىق، ءورت ءسوندىرۋ، تۇرعىن ءۇي قۇرىلىسى جانە مەديتسينالىق قىزمەتكەرلەر، سونداي-اق جەرگىلىكتى تۇرعىندار شۇعىل جۇمىلدىرىلدى.

ساعات 22:00 دەگى جاعداي بويىنشا ىزدەۋ-قۇتقارۋ جۇمىستارى نەگىزىنەن اياقتالدى. زارداپ شەككەندەردىڭ بارلىعى اۋرۋحاناعا جەتكىزىلدى.

قۇزىرلى ورگانداردىڭ ناقتىلاۋىنشا، 141 وندىرىستىك عيمارات زاقىمدانعان، تۇرعىن ۇيلەر وپىرىلعان جوق.