قىتايدا سياوتاو ەسىمدى روبوت مەكتەپ «ءبىتىرىپ»، نارىققا شىقتى
استانا. KAZINFORM - قىتايدىڭ جياڭسۋ پروۆينتسياسىنداعى روبوت كومپانياسى وزدەرى ازىرلەگەن سياوتاو ەسىمدى روبوتتى حاڭجوۋ قالاسىنداعى Manycore Tech Inc كومپانياسىنا «وقۋعا» جىبەردى، دەپ حابارلايدى قىتايلىق «حالىق گازەتى».
بۇل روبوتتارعا ارنالعان ۆيرتۋالدى مەكتەپتە روبوتتار كەڭىستىكتى ءتۇسىنۋ جانە ءوزارا ارەكەتتەسۋ سياقتى تاقىرىپتاردى مەڭگەرۋى ءتيىس. وسىعان دەيىن روبوتتاردى ءداستۇرلى وقىتۋ قۇنى جوعارى جانە تيىمدىلىگى تومەن بولىپ، سالاعا دامۋدىڭ قاجەتتىگى تۋىنداعان ەدى. ال حانچجوۋ قالاسىنداعى Manycore Tech Inc كومپانياسىندا جيناقتالعان 362 ميلليوننان استام 3D مودەلدەر روبوتتاردى وقىتۋعا ارنالعان جوعارى ساپالى «وقۋ ماتەريالدارىنا» اينالدى.
روبوت- مي ينجەنەرى جوۋ چۋحان كومپيۋتەردە روبوتقا ءارتۇرلى پىشىندەگى ەسىك تۇتقالارىن ورناتۋ، شكاف ەسىكتەرىن باسقاشا قۇرۋ، ەسىكتەردىڭ اشىلۋ مەحانيزمىن كەزدەيسوق وزگەرتۋ سياقتى «سۇراقتار» قويادى.
«سياوتاو» روبوتىنىڭ مەكتەپكە العاش كىرگەن كەزدەگى قابىلداۋ ارەكەتى تومەن بولعان. جۇيەلى جاتتىعۋلاردان كەيىن ول كەدەرگىلەردى ەركىن جەڭىپ، قوزعالىس دالدىگى %90 دان اسىردى.
وسىلايشا، «سياوتاو» وقۋىن اياقتاپ، نارىققا شىقتى. ول اۋەجايلار، پيلوتسىز ءدارىحانالار، ينتەللەكتۋالدى ساقتاۋ ورتالىقتارى سەناريلەرىندەگى تاپسىرمالاردى ءساتتى ورىنداي باستادى. ۆيرتۋالدى مەكتەپ روبوتتاردىڭ وقۋ تيىمدىلىگىن ونداعان ەسە ارتتىرىپ، عىلىمي زەرتتەۋ مەن ازىرلەۋ جانە ءوندىرىس جىلدامدىعىن جوعارىلاتتى.
اۆتور
باقىتجول كاكەش
