قىتايدا كوكا-كولا سانتەحنيكالىق قۇرال دەپ تانىلعانى راس پا

 الەۋمەتتىك جەلىلەردە Coca-Cola گازدالعان سۋسىنى قىتايدا رەسمي تۇردە سانتەحنيكالىق سۇيىقتىقتار ساناتىنا اۋىستىرىلاتىنى تۋرالى اقپارات تاراپ جاتىر. 

قازاقستاندىقتار دا بۇعان قاتىستى ءوز پىكىرلەرىن جازىپ، تانىمال سۋسىندى ىشپەي تۇرىپ، ويلانۋعا كەڭەس بەرەدى. Stopfake.kz اقپاراتتىڭ انىعىنا جەتىپ كوردى، دەپ حابارلايدى قازاقپارات.

تاراتىلعان ۆيدەودا ەر ادام Coca-Cola الكوگولسىز سۋسىنى قىتايدىڭ ورتالىق كوميتەتىنىڭ شەشىمىمەن سانتەحنيكالىق سۇيىقتىقتار قاتارىنا كوشىرىلەتىنىن، ول قۇبىرلاردى تازارتۋعا پايدالانىلاتىنىن ايتادى. مۇنداي شەشىمگە عىلىمي زەرتتەۋ نەگىز بولعان- مىس. تاجىريبەگە قىتاي تۇرمەلەرىندەگى 500 ادام قاتىستىرىلعان. ولار التى اي بويى سۋسىندى كۇنىنە ءۇش رەت ىشكەن. سالدارىنان 75 ادام كوز جۇمسا، تاعى 150 ى مۇگەدەك بولىپ قالعان.

Stopfake.kz مۇنداي اقپاراتتى جاريالاعان بىردە-ءبىر ءىرى قىتايلىق باق، نە رەسمي سايتتى تاپپاعان. سونداي-اق ىزدەۋ جۇيەسىنە قىتاي تىلىندە «Coca-Cola»، «قىتاي» جانە «سانتەحنيكا» سوزدەرىن ەنگىزىپ كورگەن. الايدا بۇل سوزدەرمەن بايلانىستى اتالعان اقپاراتقا ۇقساس ەشبىر مالىمەت شىقپاعان.

«ال وسى سوزدەردى ورىسشا جازىپ كورگەندە، بۇل جاڭالىقتىڭ باستاپقى كوزى تەز تابىلدى. بۇل «پانوراما» ساتيرا پورتالى ەكەن. اتالعان پورتال شىنايى جاڭالىقتاردى جىلىنا ءبىر رەت – 1-ساۋىردە جاريالايدى. ءدال وسى اقپارات 2018 -جىلدىڭ 25 تامىزىندا شىققان، ياعني بۇل - ءازىل.

وسىعان قاراماستان، كەيبىر بۇقارالىق اقپارات قۇرالدارى ساتيرالىق پورتالعا سەنىپ، جاڭالىقتى شىنايى دەپ تاراتقان. سودان بەرى ول جەلىدە مەزگىل-مەزگىل تالقىلانىپ، قىزۋ پىكىرتالاس تۋدىرادى. ماسەلەن، حابارلاما 2018 -جىلى، سودان كەيىن 2019 -جىلى تالقىلانعان، ەندى 2023 -جىلى تاعى دا ادامداردىڭ نازارىن اۋداردى.

ولاي بولسا، قىتايدا Coca-Cola سانتەحنيكالىق سۇيىقتىقتار ساناتىنا ەنگىزىلگەنى تۋرالى اقپارات - بۇل جەلى قولدانۋشىلارى بەس جىلدان بەرى شىندىق دەپ كەلە جاتقان ءازىل»، - دەپ تۇيىندەدى فەيك جاڭالىقتاردى اشكەرەلەيتىن رەسۋرس.