قىتايدا حوككەيدەن قازاقستان ەرلەر قۇراماسى العاشقى جەڭىسىنە قول جەتكىزدى
استانا. KAZINFORM - قىتايدىڭ حاربين قالاسىندا IX قىسقى ازيا ويىندارىنىڭ ەرلەر اراسىندا شايبالى حوككەيدەن توپتىق كەزەڭىنىڭ العاشقى ويىندارى باستالدى. قازاقستان قۇراماسى ا توبىنداعى العاشقى ويىندا تايلاندپەن كەزدەستى.

1-كەزەڭدە، وتانداستارىمىز ويىن تىزگىنىن بىردەن قولعا الىپ، قارسىلاس قاقپاسىنا 4 گول سوقتى.
2-كەزەڭدە، تايلاند قۇراماسى قورعانىستى كۇشەيتىپ، قازاقستاندىقتار تەك 2 گول عانا سوقتى.
سوڭعى كەزەڭدە، قازاقستان قۇراماسى اراداعى ەسەپتى ۇلعايتا ءتۇستى. حوككەيشىلەرىمىز قارسىلاس قاقپاسىنا تاعى 6 گول سوعىپ، قورىتىندى ەسەپ 12:0 بولدى.
ءادىل بەكەتايەۆ جانە ارتەم كوروليەۆ 2 گولدان سوقسا، اليحان ومىربەكوۆ، رومان ستارچەنكو، ەۆگەني رىماريەۆ، اندرەي بۋيالسكي، ۆياچەسلاۆ كولەسنيكوۆ جانە رۋسلان وسپانوۆ مەرگەندىگىمەن كوزگە ءتۇستى.
ايتا كەتەيىك، IX قىسقى ازيا ويىندارى 2025-جىلدىڭ 7-14-اقپان ارالىعىندا قىتاي حالىق رەسپۋبليكاسى حەيلۋنتسزيان پروۆينتسياسىنىڭ حاربين قالاسىندا وتەدى. سپورتشىلار 11 سپورت ءتۇرى بويىنشا 64 مەدال جيىنتىعىن ساراپقا سالادى.
ەسكە سالساق، حوككەيدەن قازاقستان ايەلدەر قۇراماسى كەشە ۆ توبىنداعى العاشقى ويىندا گونكونگتى 12:0 ەسەبىمەن ويسىراتا جەڭدى.
اۆتور مۇحتار قاليموللا ۇلى