قىتايدا شوشقانىڭ باۋىرىن ادامعا ترانسپلانتاتسيالاۋ وپەراتسياسى ءساتتى ءوتتى

Қирғизистонда биринчи марта буйрак трансплантацияси амалга оширилди
Фото: kabar.kg

استانا. KAZINFORM - قىتاي عالىمدارى باۋىر جەتكىلىكسىزدىگى بار ناۋقاستى ەمدەۋ ءۇشىن گەنەتيكالىق تۇرلەندىرىلگەن شوشقا باۋىرىن ترانسپلانتاتسيالاۋدى ءساتتى جۇزەگە اسىردى، دەپ حابارلايدى ت ا سس.

قىتاي اسكەري-اۋە كۇشتەرى مەديتسينالىق ۋنيۆەرسيتەتى باسىلىمىنىڭ حابارلاماسىنا سايكەس، زەرتتەۋشىلەر شوشقا مەن ادامنىڭ باۋىرىن بىرىكتىرىپ، قوسىمشا ترانسپلانتاتسيا جاسايدى، ويتكەنى شوشقانىڭ باۋىرى ادامنىڭ باۋىرىنىڭ قىزمەتىن تولىققاندى اتقارا المايدى.

وپەراتسيا ناتيجەسىندە جاڭا ورگان قان مەن ءوتتىڭ ءجۇرۋىن قامتاماسىز ەتە الدى. 96 ساعات ىشىندە اعزانىڭ جاڭا ورگاندى قابىلداماۋ سياقتى بەلگىلەرى بولماعان. ناۋقاستىڭ مەديتسينالىق زەرتتەۋلەرگە تەگىن قاتىسۋىنا ونىڭ وتباسى كەلىسىم بەرگەن.

قىتايدا باۋىر اۋرۋىمەن اۋىراتىن 400 ميلليونعا جۋىق ادام بار. قىتايلىق دارىگەرلەردىڭ زەرتتەۋى دونورلىق ورگانداردىڭ جەتىسپەۋشىلىگىن جەڭىلدەتىپ، اۋرۋىن تەك ترانسپلانتاتسيا ارقىلى عانا جەڭە الاتىن ناۋقاستارعا كومەكتەسەدى.

كسەنوترانسپلانتاتسيا بويىنشا العاشقى سالىستىرمالى تۇردەگى ءساتتى تاجىريبەلەر (ءبىر بيولوگيالىق تۇردەن ەكىنشىسىنە) ⅩⅩ عاسىردىڭ ەكىنشى جارتىسىندا جۇرگىزىلدى. 1960-جىلدارى امەريكالىق ترانسپلانتولوگ كيت رەمتسما شيمپانزەدەن ادامعا 13 بۇيرەك ترانسپلانتاتسياسىن جاسادى. وندا پاتسيەنتتەردىڭ كوپشىلىگى وپەراتسيادان كەيىن ءتورت-سەگىز اپتا ىشىندە قايتىس بولدى. ءبىر ناۋقاس توعىز اي ءومىر ءسۇرىپ، ءتىپتى قىسقا ۋاقىت ىشىندە جۇمىسقا قايتا ورالدى.

2022-2023-جىلدارى شوشقا جۇرەگىن ترانسپلانتاتسيالاۋ وپەراتسيالارى تۋرالى كوپ حابارلاندى، ءبىراق ەكى ناۋقاس مەديتسينالىق پروتسەدۋرادان كەيىن ەكى اي ۋاقىت وتكەندە قايتىس بولدى. 2024-جىلدىڭ قاڭتارىندا پەنسيلۆانيا ۋنيۆەرسيتەتىنىڭ (ا ق ش) عالىمدارى شوشقانىڭ گەندىك موديفيكاتسيالانعان باۋىرىن ميى ولگەن ناۋقاسقا ترانسپلانتاتسيالادى، ءبىراق جاڭا ورگاندى قابىلداۋ ءۇشىن ونى رەتسيپيەنتتىڭ دەنەسىنىڭ سىرتىنا ورنالاستىرعان ەدى.

سوڭعى جاڭالىقتار