قىتايدا درون تاكسي جاپپاي قولدانىسقا ەنگىزىلەدى

 مۇنايعا دەگەن تاۋەلدىلىكتى ازايتۋ ءۇشىن الەم ەلدەرى جاڭا تەحنولوگيالارعا جاپپاي كوشىپ جاتىر، دەپ حابارلايدى 24kz.

 ماسەلەن كورشى قىتاي درونمەن ادام تاسىمالداۋدى جاپپاي قولدانىسقا ەنگىزۋگە دايىندالۋدا. بيىل پيلوتسىز ۇشاتىن اپپاراتتار نارىعىن دامىتۋعا كۇش سالىنادى. بۇل باعىتتا كورشى ەل 1,5 تريلليون يۋان قارجى جۇمسايدى. بۇعان ورنىنان تىك كوتەرىلە الاتىن اۋە كولىكتەرىنە سۇرانىستىڭ ارتۋى تۇرتكى بولىپ وتىر. جاڭا جىلدان باستاپ ۇشىپ- قونۋعا قاجەتتى ينفراقۇرىلىم قۇرىلىسى قارقىن الدى.

 رۋسلان باقىتبەك ۇلى، ءتىلشى:

- 2025 -جىلى قىتايدا تومەن بيىكتىكتە ۇشاتىن اۋە كولىكتەرى بىرنەشە ەسە كوبەيەدى. قازىردىڭ وزىندە اۋىل شارۋاشىلىعى، توتەنشە جاعداي، ورمان شارۋاشىلىعى، قوعامدىق قاۋىپسىزدىكتى باقىلاۋ سياقتى سان سالادا قولدانىلادى. ماسەلەن تيبەتتەگى ەلدى مەكەندەردىڭ حالقى ءۇشىن بۇل تاپتىرماس قۇرال. تاۋلى ايماقتاردا تۇراتىن جۇرت قالالارعا ساۋدا- ساتتىق جاساپ جۇك جەتكىزىپ وتىر. پوشتا قىزمەتى دە سالەم-ساۋحاتتى دروندارمەن تاسىمالدايدى.

جەن سياوجۋن، China Post بولىمشەسىنىڭ جەتەكشىسى:

 - تاۋدان ءتۇسىپ-كوتەرىلۋگە ۇزاق ۋاقىت كەتەدى. قىستىڭ كۇندەرى ءتىپتى قاۋىپتى. قازىر دروندار ناعىز ەلەكتروندى ساۋدا-ساتتىق قۇرالىنا اينالدى. بۇكىل زات ستانتسياعا جينالىپ، وسى جەردە قاپتالادى. كەيىن تاپسىرىسقا سايكەس دروندارمەن جونەلتەمىز. بۇل وتە ىڭعايلى ءارى ءتيىمدى. بۇگىندە ەتكە سۇرانىس ارتتى. بۇرىن كەپتىرىلگەن ءتۇرىن عانا جىبەرەتىنبىز. ەندى جاڭا سويىلعان مال ەتىن دە جونەلتۋدەمىز.

مىڭ مەترگە دەيىنگى بيىكتىكتە ۇشاتىن درون، ۇشاق، ەلەكترلى تىكۇشاقتار سياقتى اۋە كولىكتەرى جوعارى سۇرانىسقا يە. قىتايلار بۇنىڭ يگىلىگىن كوپتەن بەرى كورىپ وتىر. ەندى قالاىشىلىك، اۋدان جانە ايماقارالىق جولاۋشىلار تاسىمالىن جۇزەگە اسىرۋعا كوشتى. بۇعان دەيىن ءتۇرلى اپپاراتتار جاساپ سىناقتان دا وتكىزگەن. الايدا جاپپاي قولدانىسقا ەنگىزۋگە ينفراقۇرىلىمدى جەتىلدىرۋ كەرەك.

 دۋ تسزيادۋن، اقپاراتتىق جانە بايلانىس تەحنولوگيالار اكادەمياسى زەرتتەۋ ورتالىعىنىڭ باسشىسى:

 - ەڭ الدىمەن بايلانىس جەلىسىن قالىپتاستىرۋ قاجەت. ءار ايماقتىڭ وزىندىك تەحنيكالىق ەرەكشەلىگى بار. اۋە كولىكتەرىنىڭ اۋدانارالىق ءجۇرىپ-تۇرۋ، ۇشىپ- قونۋ قاۋىپسىزدىگىن قامتاماسىز ەتۋ ءۇشىن ستانتسياارالىق ءوزارا ۇيلەسىم بولۋ ءتيىس. ماسەلەن، ا نۇكتەسىنەن ۆ نۇكتەسىنە ۇشقان درون اۆتوماتتى تۇردە كەلەسى جەلىگە اۋىسا الۋى كەرەك. بۇل ماسەلەنى شەشۋ جوبانى جۇزەگە اسىرۋدا ماڭىزدى بولىپ وتىر. قازىر ءتۇرلى تاسىلدەردى قولدانىپ كورىپ جاتىرمىز.

چەن تاو، شىنجىن قالالىق تومەنگى بيىكتىكتەگى ەكونوميكا ءوندىرىسى قاۋىمداستىعىنىڭ اتقارۋشى حاتشىسى: 

- قازىر ەلدە ءتۇرلى جوبالار ىسكە قوسىلعانىمەن اۋە جولدارى جۇيەلەنبەگەن. ۇشىپ- قونۋ الاڭدارى دا جەتكىلىكسىز. ونىڭ ۇستىنە سيفرلى باسقارۋ جەلىلەرى ءوزارا ينتەگراتسيالانىپ ءبىر جۇيەگە كەلتىرىلۋى ءتيىس. بۇل جۇمىستار شەنچجەن قالاسىندا قارقىندى ءجۇرىپ جاتىر. شاھاردا 2026 -جىلعا دەيىن 1200 وسىنداي نىسان سالىنادى. قىتايدىڭ ازاماتتىق اۆياتسيا باسقارماسىنىڭ رەسمي مالىمەتىنە سايكەس بۇل سالانى قارجىلاندىرۋعا بيىل 1,5 تريلليون يۋان جۇمسالادى. ال 2035 -جىلعا قاراي 3,5 تريلليون يۋانعا جەتەدى. ەل بيلىگى ءدال وسى باعىتتاعى جوبالاردى جۇزەگە اسىرۋعا نيەتتى ينۆەستورلارعا 2 ميلليوننان استام يۋان سۋبسيديا تولەيدى.