قىتايدا دارەتحانا قاعازى ادامنىڭ الەۋمەتتىك مارتەبەسىنە بايلانىستى بەرىلەتىنى راس پا؟
Instagram-دا جەلى قولدانۋشىلارى ادامدى تانۋ جۇيەسى بار ديسپەنسەردەن دارەتحانا قاعازىن الۋعا تىرىسقان ەكى ايەلدىڭ ۆيدەوسىن تالقىلاپ جاتىر.
ولاردىڭ ءبىرى قۇرىلعىدان ەشتەڭە الا المايدى، ال ەكىنشىسى قاعازدى الادى، - دەپ حابارلايدى stopfake.kz.
جەلىدە دارەتحانا قاعازى ءار ازاماتتىڭ الەۋمەتتىك مارتەبەسىنە بايلانىستى بەرىلەدى دەگەن اقپارات تاراپ جاتىر. بۇل جالعان.
سۋرەتتەردى كەرى ىزدەۋگە ارنالعان قۇرالداردىڭ كومەگىمەن ۆيدەودا كورسەتىلگەن قۇرىلعىنىڭ اتاۋى مەن مودەلى انىقتالىپتى. بۇل - بەتتى تانۋ جۇيەسى بار دارەتحانا قاعازىنىڭ ديسپەنسەرى.
«ولار قىتايدا كەيبىر قوعامدىق ورىنداردا ورناتىلدى. ماقساتى - جەكە قاجەتتىلىكتەرى ءۇشىن قاعازدى ورامىمەن ۇرلايتىندارمەن كۇرەسۋ. بۇل رەتتە ديسپەنسەرلەردە ەشقانداي دەرەكتەر ساقتالمايتىنى جانە ەشقايدا جىبەرىلمەيتىنى حابارلاندى. ونى وندىرۋشىلەردىڭ ايتۋىنشا، قۇرىلعىنى پايدالانعان ادامداردىڭ سۋرەتتەرى ون مينۋتتان كەيىن جويىلىپ وتىرعان. قىتاي تۇرعىندارى بۇعان سەنبەي، جەلىدە وسىنداي يننوۆاتسيالارعا قارسى جاپپاي قارسى شىقتى»، - دەلىنگەن باسىلىم مالىمەتىندە.
2020-جىلى حالىقتىڭ نارازىلىعىنا بايلانىستى مۇنداي ديسپەنسەرلەردىڭ كوبى الىپ تاستالىپتى. ۆيدەودا، راسىندا دا، بەتتى تانۋ فۋنكتسياسى بار دارەتحانا قاعازىنىڭ ديسپەنسەرلەرى كورسەتىلگەن. الايدا ولاردىڭ ادامنىڭ الەۋمەتتىك مارتەبەسىنە ەشقانداي قاتىسى جوق. مۇنداي قۇرىلعىلار قوعامدىق ورىنداردا دارەتحانا قاعازىن ۇرلاۋ دەرەكتەرىنە جول بەرمەۋ ءۇشىن ورناتىلعان.
