قىتايدا ءزىلزالا قۇرباندارىنىڭ سانى 95 كە جەتتى

استانا. KAZINFORM - قىتايدىڭ ورتالىق تەلەارناسى (CCTV) شيزاڭ (تيبەت) اۆتونوميالىق اۋدانىنىڭ ريگازە قالاسىنداعى جويقىن جەر سىلكىنىسىنەن قازا بولعاندار سانى 95 كە جەتكەنىن حابارلادى.

ريگازە قالالىق اكىمدىكتىڭ باسپا ءسوز قىزمەتىنىڭ حابارلاۋىنشا، جەرگىلىكتى ۋاقىت بويىنشا 7-قاڭتار كۇنى ساعات 17:00 گە دەيىن ءزىلزالا سالدارىنان 95 ادام كوز جۇمىپ، 130 ادام ءتۇرلى دەڭگەيدە دەنە جاراقاتىن العان.

CCTV-دىڭ ايتۋىنشا، اپاتتى ايماقتا ساعات 17:00-گە دەيىن ماگنيتۋداسى 3,0 جانە ودان جوعارى 19 مارتە جەر ءدۇمپۋى تىركەلدى. ونىڭ ىشىندە 4,0 - 4,9 بالدىق جەر سىلكىنىسى 3 رەت، 3,0- 3,9 بالدىق جەر سىلكىنىستەرى 16 رەت قايتالاندى. ەڭ كۇشتى افتەرشوك جەرگىلىكتى ۋاقىت بويىنشا ساعات 9:24-تە دينجي ۋەزىندە تىركەلگەن (ماگنيتۋداسى 4,4 بال). بۇل ءدۇمپۋ سىلكىنىستىڭ نەگىزگى وشاعىنان شامامەن 18 شاقىرىم قاشىقتىقتا بولدى.

بۇعان دەيىن قىتايدىڭ شيزاڭ اۆتونوميالىق اۋدانىنىڭ ريگازە قالاسىنداعى دينجي ۋەزىندە ماگنيتۋداسى 6,8 بالدىق جەر سىلكىنىسى بولعانىن حابارلاعان ەدىك.

قىتايدىڭ سەيسمولوگيالىق جەلى ورتالىعىنىڭ مالىمەتىنشە، جەر سىلكىنىسىنىڭ وشاعى سولتۇستىك ەندىكتىڭ 28,50 گرادۋسى مەن شىعىس بويلىقتىڭ 87,45 گرادۋسىنىڭ كوورديناتاسىندا ورنالاسقان. گيپوسەنتر 10 ك م تەرەڭدىكتە.

اۆتور

ەرلان مازان