قىتايدا عارىشتى زەرتتەۋ جونىندەگى حالىقارالىق قاۋىمداستىق جۇمىس ىستەي باستادى
استانا. KAZINFORM - قىتايدىڭ شىعىسىنداعى انحوي پروۆينتسياسىنا قاراستى حەيفەي قالاسىندا عارىشتى زەرتتەۋ جونىندەگى حالىقارالىق قاۋىمداستىق (IDSEA) جۇمىسىن باستادى، دەپ حابارلايدى شينحۋا.
بۇل قىتاي حالىق رەسپۋبليكاسىنداعى الىس عارىشتى زەرتتەۋگە ماماندانعان العاشقى حالىقارالىق عىلىمي ۇيىم. قاۋىمداستىق ءتوراعاسى رەتىندە قىتايدىڭ اي باعدارلاماسىنىڭ باس كونسترۋكتورى ءارى قىتاي ينجەنەرلىك اكادەمياسىنىڭ اكادەميگى ۋ ۆەيجەن سايلاندى.
- IDSEA مەكەمەسى قىتاي ءۇشىن حالىقارالىق دارەجەدە تاجىريبە الماسۋعا جانە ىنتىماقتاستىق ءۇشىن زور ماڭىزعا يە جانە ول الەمدىك عارىش قاۋىمداستىعىنىڭ بىرلەسكەن يننوۆاتسيالارىنىڭ سيمۆولى ىسپەتتەس، - دەدى ول.
ازيا-تىنىق مۇحيتى عارىشتىق ىنتىماقتاستىق ۇيىمىنىڭ (APSCO) باس حاتشىسى تسزيان حۋەي ءوز كەزەگىندە قاۋىمداستىقتىڭ قۇرىلۋى دامۋشى ەلدەردىڭ الىس عارىشتى زەرتتەۋ ىسىنە قاتىسۋىنا جاڭا مۇمكىندىكتەر اشقانىن اتاپ ءوتتى.
ول سونداي-اق APSCO ۇيىمىنىڭ IDSEA قاۋىمداستىعىمەن ءىرى حالىقارالىق جوبالاردى جۇزەگە اسىرۋ مەن الەۋەتىن ارتتىرۋعا باعىتتالعان ءوزارا ىنتىماقتاستىقتىڭ يننوۆاتسيالىق ۇلگىسىن قالىپتاستىرۋدى كوزدەپ وتىرعانىن جەتكىزدى.
قاۋىمداستىقتىڭ قۇرىلۋى حەفەي قالاسىنداعى الىس عارىشتى زەرتتەۋ زەرتحاناسىنىڭ، قىتايدىڭ ۇلتتىق عارىش باسقارماسىنا قاراستى اي جانە عارىش باعدارلامالارى ورتالىعىنىڭ، قىتاي استروناۆتيكا قوعامىنىڭ، قىتاي عارىشتىق زەرتتەۋلەر قوعامىنىڭ، سونداي-اق فرانسيانىڭ Horizon 2061 باعدارلاماسىنىڭ بىرلەسكەن كۇش-جىگەرىنىڭ ناتيجەسى. بۇل باستامانى قىتايدان 20 اكادەميك جانە شەتەلدەن 31 عالىم قولدادى.
وسىعان دەيىن قىتاي بيلىگىنىڭ جاس جۇبايلاردى بالا سۇيۋگە ىنتالاندىرۋعا باعىتتالعان اقشالاي جاردەماقى جۇيەسىن ەنگىزۋدى كوزدەپ وتىرعانى تۋرالى جازدىق.
