قىتايدا اي كۇنتىزبەسى بويىنشا جاڭا جىل باستالدى
استانا. KAZINFORM - قىتاي تۇرعىندارى سەنبىگە قاراعان ءتۇنى اي كۇنتىزبەسى بويىنشا جاڭا جىل - «چۋنجە» مەرەكەسىن قارسى الدى.
قاڭتار ايىنىڭ سوڭىندا قحر ساۋدا مينيسترلىگى 2024 -جىلدى «تۇتىنۋدى ىنتالاندىرۋ جىلى» دەپ جاريالادى. «كوكتەم مەرەكەسى» قارساڭىندا ەلدىڭ ءبىرقاتار قالالارىندا، سونىڭ ىشىندە بەيجىڭدە اي كۇنتىزبەسى بويىنشا جاڭا جىلعا ارنالعان كورمەلەر مەن جارمەڭكەلەر ءوتتى.
جەرگىلىكتى ب ا ق-تىڭ حابارلاۋىنشا، 10-اقپاندا باستالعان كوكتەم مەرەكەسى كەزىندە ەلدە تۇتىنۋ سەرپىلىسى بولادى دەپ كۇتىلۋدە. بيىل قىتاي ۇكىمەتى پاندەميادان كەيىنگى قالپىنا كەلتىرۋدەن تۇتىنۋدىڭ تۇراقتى وسىمىنە كوشىپ، ىشكى سۇرانىستى ارتتىرۋعا نازار اۋدارادى.
سونىمەن قاتار، تۋريزمنىڭ سەرپىنى جانە ايماقارالىق جولاۋشىلار اعىنىنىڭ ايتارلىقتاي ارتۋى بايقالادى.
ق ح ر كولىك مينيسترلىگىنىڭ بولجامىنشا، جاڭا جىل مەرەكەسىنە وراي حالىقتىڭ ماۋسىمدىق كوشى-قونى كەزىندە قىتايلىقتار 9 ميللياردقا جۋىق ساياحات جاسايدى. «چۋنيۋن»-نىڭ ءبىرىنشى كۇنىندە عانا 190 ميلليونعا جۋىق جولاۋشى رەيسى جاسالدى، بۇل وتكەن جىلمەن سالىستىرعاندا 20 پايىزعا ارتىق.
مەرەكە كۇندەرى قىتايلىق تۋريستەر شەتەلگە تۋريستىك ساپارلارعا شىعادى. وسىلايشا، «چۋنجە» كەزەڭىندە قىتايدان سينگاپۋر، مالايزيا جانە تايلاندقا ساپارلاۋعا تاپسىرىس سانى وتكەن جىلمەن سالىستىرعاندا 15 ەسە ءوستى.
بيىل قىتايدا جاڭاجىلدىق مەرەكەلەر اقپاننىڭ 10 ىنان 17 ىنە دەيىن جالعاسادى.
داستۇرگە سايكەس، اي كۇنتىزبەسى بويىنشا جاڭا جىلدى تويلاۋعا دايىندىق ءبىر اپتا بۇرىن «كىشى جاڭا جىل» («شياونيان») دەپ اتالاتىن مەرەكەدەن باستالادى. ارينە، قازىرگى ۋاقىتتا قىتاي ازاماتتارى بۇل ءتارتىپتى ۇستانبايدى. الايدا، «چۋنجە» مەرەكەسىنە دەيىن ادەتتە ءۇيدى تازالاپ، ءوتىپ جاتقان جىلدىڭ ساتسىزدىگىمەن بايلانىستى بارلىق «ەسكى زاتتاردان» قۇتىلۋ ادەتكە اينالعان. ۇلكەندەر مەن بالالار تەرەزەگە ىلىنەتىن قىزىل قاعازدان ورنەكتەر قيىپ، ءۇيدىڭ كىرەبەرىستەرىن شامدارمەن بەزەندىرەدى، جاڭا جىلدىق تىلەكتەر جازىلعان جۇپتىق جازۋلار جازىپ، ولاردى ءۇيدىڭ ەسىكتەرىنە ىلەدى.
قىتايلىقتار كوكتەم مەرەكەسىن ادەتتە وتباسىلارىمەن بىرگە تويلايدى. ۇيدەن جىراقتا جۇمىس ىستەيتىن نەمەسە وقيتىندار شاعىن اتامەكەنىنە اتا-اناسىمەن، جاقىن تۋىستارىمەن قاۋىشۋ ءۇشىن كەلەدى.
مەرەكەلىك اپتا ىشىندە قىتاي استاناسىنىڭ تۇرعىندارى مەن قوناقتارى ساياباقتارعا جانە باسقا دا اشىق تۋريستىك ورىندارعا تەگىن كىرۋگە، سونداي-اق بەيجىڭنىڭ قالا ماڭىنداعى اۋداندارىنا شوسسە جولدارمەن تەگىن جۇرۋگە مۇمكىندىك الادى.
ءداستۇر بويىنشا، جاڭا جىل باستالعاننان كەيىنگى العاشقى ءۇش كۇندە شاش جۋۋعا نەمەسە كەسۋگە، ءۇي جيناۋعا بولمايدى، ويتكەنى بۇل «بايلىق جوعالتۋدى» بىلدىرەدى.
2024 -جىلعى «ايداھاردىڭ» قامقورلىعىمەن وتەتىن كوكتەم مەرەكەسى 10-اقپاندا باستالدى.
قىتايدا اي كۇنتىزبەسى بويىنشا جاڭا جىلدى تويلاۋ ەكى اپتاعا سوزىلىپ، 24-اقپاندا شامدار فەستيۆالىمەن («يۋانشياوجە») اياقتالادى.
