قىتايدا الەمدەگى ەڭ ەجەلگى قۇس تابىلدى
استانا. KAZINFORM - جاقىندا قىتاي عىلىم اكادەمياسىنىڭ پالەونتولوگيا جانە پالەوانتروپولوگيا ينستيتۋتى مەن فۋتسزيان گەولوگيالىق بارلاۋ ينستيتۋتى بىرلەسىپ «چجەنحە بامين قۇسى» (Baminornis zhenghensis) اتتى ەڭ كونە قۇستى تاپتى، دەپ حابارلايدى «حالىق گازەتى» باسىلىمى.
قازبا - وسىعان دەيىن تابىلعان الەمدەگى ەڭ كونە قۇستاردىڭ ءبىرى.
بۇل جاڭالىق، قازىرگى قۇستاردىڭ دەنە ءپىشىنىنىڭ پايدا بولۋ ۋاقىتىن شامامەن 20 ميلليون جىل كەيىن جىلجىتادى.
قازبا قۇسىن زەرتتەۋ ناتيجەلەرى 13-اقپاندا Nature جۋرنالىندا جاريالاندى.
«مۇقيات ەسەپتەۋدىڭ كەيبىر فورمۋلالارىنا سۇيەنە وتىرىپ، عالىمدار چجەنحە بامين قۇسىنىڭ سالماعى شامامەن 150 گرام دەپ ەسەپتەدى. بۇل كەيبىر كىشكەنتاي پوپۋگايلاردىڭ ولشەمىنە ۇقساس.
- چجەنحە بامين قۇسىنىڭ تابىلۋى قازىرگى قۇستاردىڭ دەنە ءپىشىنى يۋرا داۋىرىندە پايدا بولعانىن جانە قۇستاردىڭ شىعۋ تەگىن ورتا يۋرا ءداۋىرىنىڭ سوڭىنا دەيىنگى ۋاقىتتا باراتىنىن كورسەتەدى، - دەپ جازادى باسىلىم.
ەسكە سالا كەتەيىك، بۇعان دەيىن قازاقستاندا سيرەك كەزدەسەتىن ءارى جويىلىپ كەتۋ قاۋپى بار قۇستار مەكەندەيتىنىن جازعان ەدىك.
اۆتور ريزابەك نۇسىپبەك ۇلى
