قىتايدا 3 شاقىرىم تۋننەلدى 110 كۇندە قازادى، الماتى مەتروسىن شە؟
استانا. قازاقپارات - جاقىندا قىتايلىق جۇمىس بريگاداسى الەمدەگى ەڭ ۇلكەن سۋ استىنداعى قالقان تۋننەلىن سالۋدا رەكورد ورناتتى. الماتى مەتروسىن وسىنداي جىلدامدىقپەن قازۋعا بولا ما؟
قىتاي الەمدى حالقىنىڭ سانىمەن عانا ەمەس، مەگا قۇرىلىستارىمەن دە تاڭعالدىرۋدا. جاقىندا سونداي ءبىر قۇرىلىستا رەكورد ورناتىلعانى تۋرالى newatlas.com سايتىنىڭ اقپاراتىنا سۇيەنگەن Aikyn.kz جىلدام بۇرعىلانعان تۋننەلدىڭ تەحنيكالىق سيپاتتارىن تۇسىندىرەدى.
شىعىس قىتايدىڭ شاندۋڭ پروۆينسياسىنىڭ ورتالىعى جينان قالاسىندا 9,4 ميلليون ادام تۇرادى. وسى قالادا جاقىندا دۇنيەجۇزىلىك رەكورد ورناتىلدى. حۋانحى وزەنىنىڭ استىمەن وتەتىن تۋننەل سالىپ جاتقان قۇرىلىس بريگاداسى الەمدىك رەكورد جاڭارتقان.
الەمدەگى ەڭ ۇلكەن تۋننەل بۇرعىلاۋ ماشيناسىن پايدالانا وتىرىپ، China Railway 14th Bureau Group Co.، Ltd. كومپانياسى تۋننەلدىڭ سۋ استى قالقاندى سەگمەنتتەرىنىڭ 3290 مەترىن 110 كۇندە اياقتاعان. قىتايلىق كومپانيانىڭ حابارلاۋىنشا، تۋننەلدىڭ نەگىزگى 5755 مەترلىك بولىگى دە جاقىن ايلاردا قازىلىپ بىتەدى.
قۇرىلىسى اياقتالعان بولىكتىڭ ديامەترى 17 مەتر جانە سۋ استىنداعى قورعانىس قۇبىرلارى 500 ساقينادان تۇرادى. بۇل - الەمدەگى ەڭ ۇلكەن ديامەترلى تۋننەل.
سالىستىرمالى تۇردە الاتىن بولساق، ۇلى بريتانيا مەن فرانسيانى بايلانىستىراتىن لا-مانش استىمەن سالىنعان تۋننەل ءۇش تارماقتان تۇرادى. ولاردىڭ ەكەۋى تەمىرجول تۋننەلى، ديامەترلەرى شامامەن 7,6 مەتر، ۇزىندىعى 50,5 شاقىرىم.
ال قىتايلىق قۇرىلىسشىلار جينان- حۋاڭان تۋننەلىن قازۋدى 1-قىركۇيەكتە باستاعان. Herrenknecht Shanhe قالقان ماشيناسى تاۋلىگىنە 16-18 مەتر جىلدامدىقپەن ىلگەرى جىلجىپ، اي سايىن 426 مەتر قازىپ جاڭا الەمدىك رەكورد ورناتقان. تۋننەل قازاتىن كەشەننىڭ ديامەترى دە بۇرىن الەمدە بولماعان 17,5 مەتردى قۇرايدى.
جينان- حۋاڭان تۋننەلى ەكى باعىتتا التى جولاقتى ەكى قاباتتى كونفيگۋراتسيادا سالىنۋدا، جىلدامدىق شەگى 60 ك م/ساع بولادى. بۇل قىتايدىڭ ەكىنشى ەڭ ۇزىن وزەنى حۋاڭحى ارقىلى سولتۇستىك پەن وڭتۇستىك اۋدانداردى جالعايتىن ماڭىزدى وتكەل بولماقشى.
China 14th Bureau Group كومپانياسى تۋننەلدى قازۋ جىلدامدىعى بويىنشا عانا ەمەس، وسىنداي اۋقىمدى جوبانى اياقتاۋ مەرزىمى بويىنشا دا الەمدىك رەكورد ورناتتى. 2024 -جىلدىڭ 1-قىركۇيەگىندە باستالعان كۇردەلى قۇرىلىستى جۇمىسشىلار نەبارى 110 كۇندە اياقتاعان.
Herrenknecht Shanhe بۇرعىلاۋ كەشەنىنىڭ بيىكتىگى شامامەن 5 قاباتتى ۇيمەن تەڭ، ماشينانىڭ قۋاتى دا كەرەمەت. قازبا ماشيناسىندا ورناتىلعان ارنايى كامەرالار قىسىمدى تەڭەستىرۋ، تۇراقتىلىقتى ساقتاۋ جانە قۇلاۋدىڭ نەمەسە سۋ باسۋدىڭ الدىن الۋعا ارنالعان اۆتوماتتى جۇيەمەن جابدىقتالعان.
كەسۋ ديسكىسى بىتەلۋدىڭ الدىن الۋعا كومەكتەسەتىن شايۋ جۇيەسىمەن جابدىقتالعان. سونداي-اق كەسكىش ديسكىلەر مەن تۋننەل بەتىن باقىلاۋ ءۇشىن قازۋ كامەراسىندا تەلەسكوپيالىق كامەرا جۇيەسى بار. بۇل تەحنيكالىق قىزمەت كورسەتۋ قىزمەتكەرلەرىنىڭ ارالاسۋ قاجەتتىلىگىن ازايتادى، بۇل ۋاقىتتى ۇنەمدەيدى جانە جۇمىسشىلاردىڭ قاۋىپسىزدىگىن ساقتايدى.
جينان- حۋاڭان جولىنداعى حۋاڭحى وزەنىنىڭ استىمەن وتەتىن تۋننەلدىڭ قۇرىلىسى 2025 -جىلدىڭ سوڭىندا اياقتالادى دەپ جوسپارلانۋدا.
الماتى مەتروسىنا بايلانىستى قىسقاشا انىقتاما
قازىر تەحنولوگيا جىلدام دامىپ، قىتايلىق بۇرعىلاۋشىلار وسى فيرمانىڭ ونىمدىلىگى جوعارى، ديامەترى ۇلكەن تۋننەل بۇرعىلاۋ كەشەنىن قولدانادى. ديامەترى 16,5 مەترلىك تۋننەلدى بۇرعىلاۋعا ارنالعان Herrenknecht كەشەننىڭ قۇنى 80 ميلليون ا ق ش دوللارى.
1988 -جىلى سالىنا باستاعان الماتى مەتروپوليتەنى 2011 -جىلدىڭ 1-جەلتوقسانىندا اشىلدى. الماتى مەتروسىنىڭ تۋننەلدەرىنىڭ ديامەترى 5-8 مەتر، ولاردى ايىنا 250-300 مەتر قازاتىن نەمىستىڭ Herrenknecht تۋننەلدى بۇرعىلاۋ ماشيناسى 2006 -جىلى ساتىپ الىنعان.
الماتى اكىمشىلىگىنىڭ اقپاراتىنا سايكەس، قالا مەتروسىنىڭ باتىس باعىتتاعى «قالقامان- بارلىق» (5,3 ك م) جانە شىعىس باعىتتاعى «جىبەك جولى- اۋەجاي» (14 ك م) تارماقتارىنىڭ قۇرىلىسى 2025 -جىلى باستالىپ، 3,5 جىلدا اياقتالادى. جوبا قۇنى - 1 ميلليارد دوللار. مۇمكىن جاڭا تۋننەلدى بۇرعىلاۋعا ارنالعان Herrenknecht كەشەنىنىڭ كومەگىمەن ديامەترى مەن ۇزىندىعى تىم ۇلكەن ەمەس الماتى مەتروسىنىڭ جاڭا ەكى تارماعىنىڭ قۇنىن ۇنەمدەۋگە، ىسكە قوسۋ مەرزىمىن ازايتۋعا دا بولاتىن شىعار.
