قىتايدا 2025-جىلى قازاق كۇرەسىنەن الەم چەمپيوناتى ءوتۋى مۇمكىن
استانا. قازاقپارات - Qazaq Kuresi قاۋىمداستىعىنىڭ باس ديرەكتورى دامير بەكبوسىنوۆ استاناعا ءىس-ساپارمەن كەلگەن قىتاي حالىق رەسپۋبليكاسى دەلەگاتسياسىنىڭ وكىلدەرىمەن كەزدەستى.
كەزدەسۋ بارىسىندا قىتايدىڭ حۋنان پروۆينتسياسىنداعى چانشا قالاسى ۇكىمەتىنىڭ وكىلى لي دي بۇگىنگى تاڭدا ەكى ەلدىڭ اراسىنداعى ساۋدا، ينۆەستيتسيا سالاسىنداعى ىنتىماقتاستىقتىڭ پەرسپەكتيۆالىق باعىتتارى جەتەرلىك ەكەنىن، ال سوڭعى جىلدارى سپورت سالاسىنداعى بايلانىستى نىعايتۋ باعىتىندا، ونىڭ ىشىندە ەكى ەلدىڭ ۇلتتىق كۇرەسىن دامىتۋ جولىندا بىرلەسە جۇمىس ىستەۋگە دەگەن قىزىعۋشىلىقتىڭ ارتا تۇسكەنىن اتاپ ءوتتى.
وسى ورايدا، شەتەلدىك قوناق قازاقستان مەن قىتاي اراسىنداعى كوپ جىلعى دوستىق قارىم-قاتىناستى نىعايتۋ ءۇشىن 2025-جىلى قىتاي ەلىندە قازاق كۇرەسىنەن ەرەسەكتەر اراسىنداعى الەم چەمپيوناتىن وتكىزۋ تۋرالى ۇسىنىسىن جەتكىزدى.
دەلەگاتسيا وكىلىنىڭ ايتۋىنشا، الەم چەمپيوناتىن قىتايدىڭ مەملەكەتتىك جانە ساياسي قايراتكەرى ماۋ زىدوڭ تۋىپ-وسكەن حۋنان قالاسىندا وتكىزۋ ماڭىزدى قادام بولماق. بۇل قىتايداعى ەڭ تانىمال تۋريستىك باعىتتاردىڭ ءبىرى، 66 ميلليون تۇرعىنى بار الەمگە تانىمال تۋريستىك شاھار.
شارا بارىسىندا لي دي 2022-جىلى استانادا 40 تان استام ەلدىڭ 350 سپورتشىسى قاتىسقان الەم چەمپيوناتىنىڭ بەينەماتەريالدارىمەن جانە قازاق كۇرەسى تۋرالى ماعلۇماتتارمەن تانىستى.
كەزدەسۋ اياسىندا قوس تاراپتىڭ وكىلدەرى پەرسپەكتيۆالىق ىنتىماقاستىق باعىتتارىن ەگجەي-تەگجەيلى تالقىلادى.
ءوز تاراپىنان دامير اسەنعازى ۇلى الەم چەمپيوناتى سياقتى ءىرى حالىقارالىق دودانىڭ ەكونوميكالىق الەۋەتىن دۇنيەجۇزى مويىنداعان قىتاي سياقتى الپاۋىت ەلدە ءوتۋى قازاق كۇرەسىنىڭ دامۋىنا جاڭا سەرپىن بەرەتىنىن اتاپ ءوتتى.
كەزدەسۋ سوڭىندا دامير بەكبوسىنوۆ دەلەگاتسيا وكىلدەرىنە اسپان استى ەلىندە قازاق كۇرەسىنىڭ دامۋىنا وزىندىك ۇلەسىن قوسىپ جۇرگەنى ءۇشىن سونگ دجيانمين مىرزاعا ق ر تۋريزم جانە سپورت ءمينيسترى ەربول مىرزابوسىنوۆتىڭ العىس حاتىن جانە قازاقى داستۇرمەن قاۋىمداستىقتىڭ اتىنان كادەسىيلاردى تابىستادى.
بۇعان دەيىن حابارلاعانىمىزداي، تاراز قالاسىندا قازاق كۇرەسىنەن ەرەسەكتەر اراسىندا قازاقستان رەسپۋبليكاسىنىڭ چەمپيوناتى ءوتىپ جاتىر.
