قىتايدا 17 بالانى ۇرلاعان ايەل ءولىم جازاسىنا كەسىلدى
قىتايدا 17 بالانى ۇرلاپ، ساتىپ جىبەرگەن ايەل ءولىم جازاسىنا كەسىلدى، دەپ حابارلادى شينحۋا اگەنتتىگى.
ۇكىمدى گۋيجوۋ پروۆينسياسىنىڭ گۋيياڭ قالالىق ارالىق حالىق سوتى شىعاردى. 2023 -جىلدىڭ قىركۇيەگىندە سول سوت يۋي حۋايىڭدى 1993-1996 -جىلدار ارالىعىندا گۋيجوۋ مەن چوڭچيڭ قالالارىنان 11 بالانى ۇرلاپ، حاندان قالاسىنا ساتقانى ءۇشىن كىنالى دەپ تاۋىپ، ءولىم جازاسىنا كەستى.
سوتتالۋشى مەن ونىڭ كەيىن قايتىس بولعان سىبايلاسى پايدا تابۋ ماقساتىندا بالالاردى ساتىپ جىبەرگەن. ۇكىم جاريالانعاننان كەيىن ول شەشىمگە شاعىمداندى.
2023 -جىلدىڭ قاراشاسىندا گۋيجوۋ پروۆينسياسىنىڭ جوعارى حالىق سوتى ايىپتالۋشىنىڭ شاعىمىن قايتا قاراپ، 2024 -جىلدىڭ قاڭتارىندا پوليتسيا يۋي حۋايىڭ بالا ساۋداسىنان باسقا دا ىستەرگە قاتىسى بارىن انىقتاعاننان كەيىن ءىستى قايتا قاراۋدى بۇيىردى.
سودان بەرى بۇل ىسكە قاتىسى بار بالالار سانى 11 دەن 17-گە دەيىن ءوستى. ولاردى 12 وتباسىنان ۇرلاپ اكەتكەن، ونىڭ بەسەۋى بىردەن ەكى بالاسىنان ايىرىلعان.
يۋي حۋايىڭ ءولىم جازاسىنا كەسىلدى. سونداي-اق ونىڭ بارلىق جەكە مۇلكى تاركىلەنىپ، بارلىق ساياسي قۇقىقتارىنان ايىرىلدى.
