قىتايعا استىق جەتكىزەتىن ۆاگوندار اينالىمىن جەدەلدەتۋ ءۇشىن نە ىستەلەدى

استانا. KAZINFORM - كولىك ءمينيسترى مارات قارابايەۆ قىتايعا استىق جەتكىزەتىن ۆاگوندار اينالىمىن جەدەلدەتۋ ءۇشىن نەندەي جۇمىس ىستەلىپ جاتقانىن ايتتى.

سەناتتىڭ جالپى وتىرىسىندا دەپۋتات جانبولات جۇرگەنبايەۆ مينيستردەن جۇك تاسىمالدايتىن ۆاگوندار اينالىمىن جىلدامداتۋ ءۇشىن قىتاي تاراپىمەن قانداي جۇمىستاردىڭ جۇرگىزىلىپ جاتقانىن سۇراعان ەدى.

«بىلتىر قىتايعا استىق تاسىمالداۋ 1 ميلليون 300 مىڭ تونناعا ارتتى. ياعني، 2 ميلليون 100 مىڭ توننا استىق جەتكىزىلدى. ونىڭ ىشىندە 1 ميلليون 400 مىڭ توننا استىق كونتەينەرمەن تاسىمالدانعان بولاتىن. ماسەلەنى شەشۋدىڭ ەكى جولى بار. بىرىنشىدەن، قىتايلىق تاراپتىڭ وزىندە استىق قابىلدايتىن ارناۋلى تەرمينال سالىنىپ جاتىر. ءبىراق، ونىڭ قۇرىلىسى كوپ جىلدان بەرى سوزىلىپ كەتتى، اياقتالمادى. بيىل قۇرىلىسى اياقتالسا، وندا استىق تاسىلمادايتىن ۆاگوندارىمىزدىڭ جىلدام اينالىمىنا مۇمكىندىك بەرەدى. قىتاي تاراپىمەن سول تەرمينالدىڭ قۇرىلىسىن تەزدەتۋ باعىتىندا كەلىسسوز جۇرگىزىپ جاتىرمىز»، - دەدى ول.

ونىڭ اتاپ وتۋىنشە، قىتايدان جۇك ەلىمىزگە كونتەينەرلەرمەن جەتكىزىلەدى. سول كونتەينەرلەر بوس قايتپاۋى ءۇشىن استىق تيەلەدى.

«ءبىراق، ول شامالى قىمباتقا تۇسەدى. دەگەنمەن، 2023-جىلى ونىڭ الدىنداعى جىلمەن سالىستىرعاندا 630 مىڭ تونناعا كوپ استىق كونتەينەرمەن تاسىمالداندى»، - دەدى مارات قارابايەۆ.