قىتايعا ا ق ش-تىڭ كليمات جونىندەگى وكىلى بارادى
استانا. KAZINFORM - ا ق ش پرەزيدەنتىنىڭ حالىقارالىق كليمات ساياساتى جونىندەگى اعا كەڭەسشىسى دجون پودەستا سارسەنبى كۇنى ءۇش كۇندىك ساپارمەن قىتايعا بارادى، دەپ حابارلايدى The New York Times.
بەيجىڭگە ساپارى بارىسىندا دج. پودەستا قىتايلىق ارىپتەسى ليۋ جەنمينمەن كەلىسسوزدەر جۇرگىزىپ، ىنتىماقتاستىق تۋرالى پىكىر الماسىپ، ا ق ش پەن قىتايدىڭ كليماتتىق ساياساتىن تالقىلايدى. سونداي-اق قىتايدىڭ كومىر ءوندىرۋ، جاڭارتىلاتىن ەنەرگيا كوزدەرىن ءوندىرۋ سالاسىنداعى شەنەۋنىكتەرىمەن جانە كليمات بويىنشا وتستاۆكاداعى اعا وكىلى سي جەنحۋامەن كەزدەسۋلەر جوسپارلانعان.
ا ق ش-تىڭ كليمات جونىندەگى ەڭ جوعارى ديپلوماتى قىتايدى كليماتتىڭ وزگەرۋىنە ىقپال ەتەتىن پارنيكتىك گازدار شىعارىندىلارىن ازايتۋ ءۇشىن امبيتسيالىق ماقساتتار قويۋعا كوندىرەدى دەپ كۇتىلۋدە.
وسىلايشا، بەيجىڭدەگى كۇن تارتىبىندە كومىردەن باس تارتۋ جانە قىتايدىڭ مەتان مەن ازوتتىڭ شالا توتىعى سياقتى قۋاتتى كومىرتەكتى ەمەس پارنيكتىك گازدار شىعارىندىلارىن ازايتۋ جوسپارلارىن كۇشەيتۋ ماسەلەلەرى تالقىلانۋى مۇمكىن.
الايدا رەسپۋبليكاشىلدار بايدەن اكىمشىلىگىنىڭ قىتايمەن ىنتىماقتاسۋ ارەكەتىن سىنعا الدى. وسىلايشا، وكىلدەر پالاتاسىنىڭ سىرتقى ىستەر جونىندەگى كوميتەتىنىڭ ءتوراعاسى مايكل ماككول (تەحاستاعى رەسپۋبليكاشى) دج. پودەستانىڭ ساپارى ناتيجە بەرەتىنىنە كۇمانمەن قارايدى.
قىتاي 2015 -جىلى پاريج كەلىسىمىنە قول قويىلعاننان بەرى پارنيكتىك گازداردىڭ كوزى جانە كليماتتى لاستايتىن الەمدەگى ەڭ ۇلكەن ەل بولدى.
«Asia Society» كوممەرتسيالىق ەمەس ۇيىمى 1,5 گرادۋسقا دەيىن جىلىنۋدى ساقتاۋ ءۇشىن قىتاي 2035 -جىلعا قاراي ەكونوميكاسىنىڭ شىعارىندىلارىن قازىرگى دەڭگەيدەن كەمىندە %30 عا قىسقارتۋى كەرەك دەگەن قورىتىندىعا كەلدى.
«ا ق ش پەن قىتاي اراسىندا كليماتتىق ءوزارا ارەكەتتەستىك ماسەلەلەرى تىعىرىققا تىرەلۋدە. بىزدە مۇنى شىنىمەن وزگەرتۋگە كوپ ۋاقىت جوق»، - دەدى ازيا قوعامى ساياسات ينستيتۋتىنىڭ قىتايداعى كليماتتىق ورتالىعىنىڭ ديرەكتورى لي شۋو.
بۇل ساپار بايدەن اكىمشىلىگىنىڭ ا ق ش-تا قاراشادا وتەتىن پرەزيدەنتتىك سايلاۋ الدىنداعى قىتايمەن كليمات ماسەلەسىنە وزگەرىس ەنگىزۋگە باعىتتالعان سوڭعى مۇمكىندىكتەرىنىڭ ءبىرى رەتىندە قاراستىرىلادى.
اۆتور
زارينا تۋعانبايەۆا
