قىتايداعى ەكى الىپ پاندا ا ق ش-قا جەتكىزىلدى
استانا. kazinform - قىتايدان پين پين جانە فۋ شۋان ەسىمدى ەكى الىپ پاندا ءتۇردى ساقتاۋعا باعىتتالعان جاڭا حالىقارالىق باعدارلاما اياسىندا اتلانتاعا جەتكىزىلدى، دەپ حابارلايدى Zoo Atlanta.
جانۋارلار 27-قىركۇيەكتە ارنايى جۇك ۇشاعىمەن حارتسفيلد-دجەكسون حالىقارالىق اۋەجايىنا جەتكىزىلدى.
پاندالار اتلانتا حايۋاناتتار باعى مەن قىتايدىڭ جابايى تابيعاتتى قورعاۋ قاۋىمداستىعى اراسىندا الىپ پاندالاردى ساقتاۋ سالاسىنداعى حالىقارالىق ىنتىماقتاستىق تۋرالى جاڭا كەلىسىم اياسىندا ا ق ش-قا اكەلىندى.
وسىلايشا اتلانتا حايۋاناتتار باعى الىپ پاندالار بار ا ق ش-تاعى ءۇش نىساننىڭ بىرىنە اينالدى. سونداي-اق ول ەلدىڭ وڭتۇستىك-شىعىسىنداعى الىپ پاندالار ۇستالاتىن جالعىز حايۋاناتتار باعى بولىپ وتىر.
پين پين ەسىمدى ەركەك پاندا 2020-جىلعى 17-ناۋرىزدا، ال فۋ شۋان ەسىمدى ۇرعاشى پاندا سول جىلدىڭ 18-قازانىندا دۇنيەگە كەلگەن. ەكەۋى دە چىڭدۋ قالاسىنداعى الىپ پاندالاردى كوبەيتۋ جونىندەگى زەرتتەۋ بازاسىندا تۋعان.
ازىرگە كەلۋشىلەر پاندالاردى كورە المايدى. ولار شامامەن ءبىر اي بويى حايۋاناتتار باعىنىڭ جاڭا كەشەنىندەگى ارنايى ايماقتا كارانتيندە بولادى. كەيىن اتلانتا حايۋاناتتار باعى جانۋارلاردى كەلۋشىلەرگە قاشان كورسەتەتىنىن حابارلايدى.
اتلانتا حايۋاناتتار باعىنىڭ قىتايمەن الىپ پاندالاردى ساقتاۋ جونىندەگى العاشقى كەلىسىمى 1999-جىلدان 2024-جىلعا دەيىن كۇشىندە بولدى. وسى 25 جىل ىشىندە اتلانتادا لۋن لۋن مەن يان يان جۇبىنان 7 پاندا ءتولى تۋعان.
2024-جىلدىڭ قازانىندا لۋن لۋن، يان يان جانە ولاردىڭ كىشى تولدەرى يا لۋن مەن سي لۋن قىتايعا قايتارىلدى.
اتلانتا حايۋاناتتار باعىنىڭ مالىمەتىنشە، جابايى تابيعاتتا شامامەن 1,9 مىڭ الىپ پاندا قالعان. 2016-جىلى حالىقارالىق تابيعاتتى قورعاۋ وداعى بۇل ءتۇردىڭ مارتەبەسىن «جويىلىپ كەتۋ قاۋپى بار» ساناتىنان «وسال ءتۇر» ساناتىنا وزگەرتتى.
