قىتايداعى التاي قويى حالىقارالىق برەندتەر كورمەسىندە تانىستىرىلدى - شەتەلدەگى قازاق باسپا ءسوزى
Kazinform ح ا ا شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.
موڭعوليا پارلامەنتى پرەزيدەنت ۋحنااگين حۇرەلسۇحتىڭ وتستاۆكاسىن قولدادى - جاڭا ءداۋىر
موڭعوليانىڭ مەملەكەتتىك ۇلى حۋرالى پرەزيدەنت ۋحنااگين حۇرەلسۇحتىڭ ءوز ەركىمەن قىزمەتىنەن كەتۋ تۋرالى ءوتىنىشىن 92,3 پايىز داۋىسپەن قولدادى، دەپ حابارلايدى بايان-ولگي ايماعىندا شىعاتىن «جاڭا ءداۋىر» باسىلىمى.
اتالعان ب ا ق-تىڭ دەرەگىنشە، مەملەكەت باسشىسى مۇنداي شەشىمگە ءوزىنىڭ ار- نامىسى مەن پرەزيدەنتتىك لاۋازىمنىڭ بەدەلىنە نۇقسان كەلتىرەتىن جالعان اقپاراتتاردىڭ تارالۋىنا بايلانىستى كەلگەنىن مالىمدەدى. زاڭناماعا سايكەس، پرەزيدەنت وكىلەتتىگى مەرزىمىنەن بۇرىن توقتاتىلعاننان كەيىن ونىڭ مىندەتىن پارلامەنت ءتوراعاسى سانداگين بيامباتسوگت اتقارادى. ال مەملەكەتتىك ۇلى حۋرال ءتورت اي ىشىندە كەزەكتەن تىس پرەزيدەنت سايلاۋىن وتكىزۋگە ءتيىس. ۋحنااگين حۇرەلسۇح 2021 -جىلعى 25-ماۋسىمدا موڭعوليانىڭ التىنشى پرەزيدەنتى رەتىندە انت قابىلداعان.
وزبەكستان مەن قازاقستان ونەركاسىپكە ەكولوگيالىق تەحنولوگيالاردى ەنگىزۋ جونىندە كەلىسىمگە قول قويدى - ءوزا
ب ۇ ۇ-نىڭ كليماتتىڭ وزگەرۋى جونىندەگى نەگىزدەمەلىك كونۆەنتسياسى تاراپتارىنىڭ COP31 كونفەرەنتسياسى اياسىندا وزبەكستان مەن قازاقستان ونەركاسىپ سالاسىنا وزىق ەكولوگيالىق تەحنولوگيالاردى ەنگىزۋ جونىندە كەلىسىمگە قول قويدى. بۇل تۋرالى «ءوزا» اقپارات اگەنتتىگى حابارلادى.
قۇجات حيميا، ەنەرگەتيكا جانە تسەمەنت ونەركاسىبىندە ەكولوگيالىق تەحنولوگيالار بويىنشا انىقتامالىقتار ازىرلەۋ، كاسىپورىندارعا تەحنولوگيالىق اۋديت جۇرگىزۋ، ماماندار دايارلاۋ جانە سيفرلىق پلاتفورمانى دامىتۋ باعىتىنداعى ىنتىماقتاستىقتى قامتيدى. سونىمەن قاتار تاراپتار ورتالىق ازيادا وزىق تەحنولوگيالار جونىندەگى وڭىرلىك بيۋرو قۇرۋ جانە تەحنولوگيالىق دەرەكتەر الماسۋ ماسەلەلەرىن تالقىلادى.
قازاقستان مەن قىتاي سەيسمولوگيا سالاسىنداعى ىنتىماقتاستىقتى نىعايتۋدا - حالىق گازەتى
قىتايدىڭ جەر سىلكىنىسى بيۋروسى گەوفيزيكا ينستيتۋتى 2026 -جىلى عىلىم جانە تەحنولوگيالار مينيسترلىگى قۇرعان ءۇش حالىقارالىق جاس عالىمدار جوباسىنىڭ گرانتىن جەڭىپ الدى. جوبا اياسىندا قازاقستان توتەنشە جاعدايلار مينيسترلىگىنە قاراستى ۇلتتىق سەيسمولوگيالىق بايقاۋ جانە زەرتتەۋلەر ورتالىعىنىڭ ءۇش جاس عالىمى قىتايعا شاقىرىلىپ، ءۇش ايلىق عىلىمي زەرتتەۋلەر جۇرگىزەدى. بۇل تۋرالى وسى اپتادا قىتايدىڭ حالىق گازەتى باسىلىمى حابارلادى.
قىتايلىق ب ا ق-تىڭ مالىمەتىنشە، ولار جەر سىلكىنىسىن باقىلاۋ تەحنولوگيالارىن جەتىلدىرۋ، جاساندى ينتەللەكت ارقىلى دەرەكتەر ساپاسىن باقىلاۋ، تەحنوگەندىك جەر سىلكىنىستەرى مەن سەيسميكالىق قاۋىپ- قاتەردى باعالاۋ باعىتتارىن زەرتتەيدى.
بۇل باستاما قازاقستان مەن قىتاي اراسىنداعى گەوفيزيكا جانە سەيسمولوگيا سالاسىنداعى ىنتىماقتاستىقتى تەرەڭدەتۋگە، «ءبىر بەلدەۋ، ءبىر جول» اياسىندا جەر سىلكىنىسىن باقىلاۋ تەحنولوگيالارى بويىنشا تاجىريبە الماسۋعا مۇمكىندىك بەرەدى. سونداي-اق قىتايدىڭ سەيسميكالىق قاۋىپ-قاتەردى باعالاۋ ادىستەرىن قازاقستاندا قولدانۋعا نەگىز قالايدى.
سونىمەن قاتار وسى اپتادا حالىق گازەتى باسىلىمىندا «قازاقستاننان قىتايعا جەمدىك شيكىزات جەتكىزەتىن پويىز گۋيانعا جەتتى» دەگەن اقپارات جارىق كوردى.
اتالعان ب ا ق-تىڭ دەرەگىنشە، قازاقستاننىڭ قاپشاعاي ستانتسياسىنان جولعا شىققان، 54 كونتەينەرگە قازاقستاندا وندىرىلگەن جەمدىك شيكىزات تيەلگەن جۇك پويىزى 11-قاراشادا قىتايدىڭ گۋيان حالىقارالىق قۇرلىق پورتىنا جەتتى. قورعاس پورتى ارقىلى تىكەلەي قاتىناعان بۇل پويىز بيىل ورتالىق ازيادان گۋيانعا كەلگەن ەكىنشى كەرى پويىز بولدى. ماۋسىم ايىندا قاتىناعان العاشقى پويىزبەن سالىستىرعاندا تاسىمالداۋ مەرزىمى ءتورت كۇنگە قىسقارىپ، لوگيستيكالىق تيىمدىلىك ارتقان.
جوسپار بويىنشا، قاراشا ايىندا ورتالىق ازيادان گۋيانعا جالپى 248 كونتەينەردى قامتيتىن ءتورت كەرى پويىز جەتكىزىلەدى. ولاردىڭ بارلىعى قازاقستاندا وندىرىلگەن جەمدىك شيكىزاتتى تاسىمالدايدى. تۇراقتى تەمىرجول قاتىناسى جۇك ساپاسىن ساقتاۋعا، تاسىمالداۋ كەزىندەگى شىعىن مەن ءبۇلىنۋ قاۋپىن ازايتۋعا، سونداي-اق قىتايدىڭ وڭىرلىك جەم ءوندىرىسى مەن مال شارۋاشىلىعىن ساپالى ءارى تۇراقتى شيكىزاتپەن قامتاماسىز ەتۋگە مۇمكىندىك بەرەدى.
سونىمەن قاتار حالىق گازەتىندە «جياڭشيدەن ورتالىق ازياعا اۆتوكولىك بولشەكتەرىن تاسىمالدايتىن العاشقى پويىز اتتاندى» دەگەن تاقىرىپتاعى اقپارات جارىق كوردى.
اتالعان باسىلىمنىڭ مالىمەتىنشە، 16-قاراشادا قىتايدىڭ جياڭشي ولكەسىندەگى نانچان حالىقارالىق قۇرلىق پورتىنان «نانچان - جيانلين» باعىتىنداعى ورتالىق ازيا پويىزى جولعا شىقتى. 55 كونتەينەرگە تيەلگەن 94 اۆتوكولىكتىڭ قۇراستىرىلماعان تولىق بولشەكتەرى (KD) قورعاس ارقىلى ورتالىق ازيانىڭ بىرنەشە ەلىنە جەتكىزىلەدى. بۇل - جياڭشي ولكەسىنەن تەك اۆتوكولىك قۇراستىرۋعا ارنالعان تولىق بولشەكتەردى (KD) تاسىمالداعان العاشقى ورتالىق ازيا باعىتىنداعى پويىز.
يران مەن قازاقستان سيفرلىق ىنتىماقتاستىقتى دامىتۋ ماسەلەلەرىن تالقىلادى - ParsToday
يران مەن قازاقستان سيفرلىق ينفراقۇرىلىم، اقپاراتتىق تەحنولوگيالار جانە جاڭا تەحنولوگيالار سالاسىنداعى ەكىجاقتى ءارى وڭىرلىك ىنتىماقتاستىقتى كەڭەيتۋ ماسەلەلەرىن تالقىلادى. بۇل تۋرالى ParsToday حابارلادى.
يراندىق ب ا ق-تىڭ دەرەگىنشە، كەزدەسۋ دوحادا ءوتىپ جاتقان حالىقارالىق ەلەكتربايلانىس وداعىنىڭ (ح ە و) وكىلەتتى كونفەرەنتسياسى اياسىندا ۇيىمداستىرىلدى. يراننىڭ بايلانىس جانە اقپاراتتىق تەحنولوگيالار ءمينيسترى سەيەد ساتتار حاشەمي قازاقستان پرەمەر-ءمينيسترىنىڭ ورىنباسارى - جاساندى ينتەللەكت جانە سيفرلىق دامۋ ءمينيسترى جاسلان ماديەۆپەن كەزدەسىپ، سيفرلىق ينفراقۇرىلىم مەن جاڭا تەحنولوگيالار باعىتىندا بىرلەسكەن جوبالاردى جۇزەگە اسىرۋدىڭ ماڭىزىن اتاپ ءوتتى. تاراپتار سونداي-اق تەحنولوگيالىق كومپانيالار، عىلىمي ورتالىقتار مەن بەيىندى مەكەمەلەر اراسىنداعى بايلانىستى نىعايتۋ جونىندە پىكىر الماستى.
كەزدەسۋ بارىسىندا حالىقارالىق ۇيىمدار اياسىنداعى ءوزارا ءىس-قيمىل جانە قولداۋ كورسەتۋ ماسەلەلەرى دە ءسوز بولدى. يران تاراپى قازاقستاننىڭ ح ە و كەڭەسى مەن راديوبايلانىستى رەتتەۋ كەڭەسىنە (RRB) مۇشەلىككە كانديداتۋراسىن قولدايتىنىن جانە الداعى سايلاۋدا داۋىس بەرەتىنىن مالىمدەدى. ءوز كەزەگىندە يران ءمينيسترى قازاقستان دەلەگاتسياسىن ح ە و-نىڭ PP-26 جيىنى اياسىندا يران ۇسىنعان قۇجاتتار مەن قارارلاردى قولداۋعا شاقىردى. ايتا كەتەيىك، حالىقارالىق ەلەكتربايلانىس وداعىنىڭ وكىلەتتى كونفەرەنتسياسى 2026 -جىلعى 9-27-قاراشا ارالىعىندا كاتار استاناسى دوحادا وتەدى.
ەت، پالاۋ، لاعمان: انكارادا تۇركى حالىقتارىنىڭ اسپازدىق مۇراسى تانىستىرىلادى - TRT
تۇركيا استاناسى انكارا قالاسىندا تۇركى الەمى گاسترونوميالىق سامميتى وتەدى. ءۇش كۇنگە جوسپارلانعان ءىس-شارا اياسىندا قازاقستان، ازەربايجان، وزبەكستان، قىرعىزستان، تۇرىكمەنستان، تاتارستان، قىرىم تاتارلارى جانە ۇيعىر اسحانالارىنىڭ ءداستۇرلى تاعامدارى كوپشىلىك نازارىنا ۇسىنىلادى.
بۇل تۋرالى وسى اپتادا تۇركيا راديو تەلەۆيزيا پورتالى حابارلادى.
«TRT»-نىڭ دەرەگىنشە، سامميت انكارانىڭ 2026 -جىلعى «تۇركى الەمىنىڭ تۋريزم استاناسى» اتانۋىنا وراي ۇيىمداستىرىلىپ، 19- 21-قاراشا ارالىعىندا حالىقارالىق تۋريزم جانە ساياحات كورمەسى اياسىندا وتەدى. باعدارلامانىڭ نەگىزگى ماقساتى - تۇركى حالىقتارىنىڭ اسپازدىق مۇراسىن ساقتاۋ، ۇلتتىق تاعامداردىڭ رەتسەپتىلەرىن كەلەر ۇرپاققا جەتكىزۋ جانە گاسترونوميالىق تۋريزم سالاسىنداعى ىنتىماقتاستىقتى دامىتۋ.
سامميت بارىسىندا قازاقستاننىڭ ۇلتتىق تاعامى - بەشبارماق ارنايى تاجىريبەلىك كورسەتىلىم ارقىلى تانىستىرىلادى. سونىمەن قاتار كەلۋشىلەر وزبەك پالاۋى، قىرعىز وراماسى، تۇرىكمەن پالاۋى، ۇيعىر لاعمانى، ازەربايجاننىڭ شاح پالاۋى جانە وزگە دە ءداستۇرلى تاعامداردان ءدام تاتا الادى. ءۇش كۇندىك باعدارلاما اياسىندا التى شەبەرلىك ساباعى، التى تاجىريبەلىك ساباق، توعىز سۇحبات جانە توعىز بايقاۋ وتكىزۋ جوسپارلانعان. ۇيىمداستىرۋشىلار كەيبىر ۇلتتىق تاعامداردىڭ وزىندىك ەرەكشەلىگىن ساقتاپ، ءتۇپنۇسقا ءدامىن جەتكىزۋ ءۇشىن قاجەتتى ارنايى ينگرەديەنتتەردى ءتيىستى ەلدەردەن الدىرعان.
«سوڭعى كۇنى تۇرىكمەنستاننان ۋناش سورپاسى، ازەربايجاننان شاح پالاۋى مەن كوك قۋتاب، تۇركيادان ۇن حالۆاسى مەن تاماريند ءشارباتى ۇسىنىلادى. اسپازدار كورسەتىلىمىندە ۇيعىر لاعمانى مەن تاتارستاننىڭ ءۇشبۇرىش (ەچپوچماك) تاعامى كوپشىلىككە پاش ەتىلەدى»، دەپ جازادى تۇركيالىق ب ا ق.
سونداي-اق وسى اپتادا «TRT» -دا «2035 -جىلعا قاراي مۇسىلماندار سانى حريستيانداردان اسۋى مۇمكىن» دەگەن تاقىرىپتاعى اقپارات جارىق كوردى.
تۇركيالىق ب ا ق-تىڭ مالىمەتىنشە، ا ق ش-تاعى Pew زەرتتەۋ ورتالىعىنىڭ بولجامىنا سايكەس، 2035 -جىلعا قاراي الەمدەگى مۇسىلماندار سانى حريستيانداردان اسىپ، يسلام ءدىنى ەڭ كوپ تارالعان دىنگە اينالۋى مۇمكىن. زەرتتەۋ 2020- 2070 -جىلدار ارالىعىنداعى جاھاندىق ءدىني دەموگرافيالىق وزگەرىستەردى قامتيدى.
مامانداردىڭ مالىمەتىنشە، مۇسىلماندار سانىنىڭ جىلدام وسۋىنە بالا تۋۋ كورسەتكىشىنىڭ جوعارىلىعى مەن حالىقتىڭ سالىستىرمالى تۇردە جاس بولۋى اسەر ەتەدى. اتاپ ايتقاندا، 2020- 2025 -جىلدارى مۇسىلمان ايەلدەر اراسىنداعى ورتاشا بالا تۋۋ كورسەتكىشى 3,1 بولسا، مۇسىلمان ەمەس ايەلدەردە بۇل كورسەتكىش 2,0 بولعان. بولجام بويىنشا، 2070 -جىلعا قاراي الەمدەگى مۇسىلماندار سانى 3,6 ميللياردتان اسىپ، حريستياندار سانى شامامەن 3 ميللياردقا جەتەدى. وسى كەزەڭدە مۇسىلماندار الەم حالقىنىڭ 36 پايىزى بولۋى مۇمكىن.
التاي قويى حالىقارالىق برەندتەر كورمەسىندە تانىستىرىلدى - التاي اقپاراتى
التاي قويى 7-9-قاراشا ارالىعىندا شيامىن قالاسىندا وتكەن 2026 -جىلعى قىتاي تاۋار ماركاسى جونىندەگى جىلدىق كونفەرەنتسيا مەن برەندتەر حالىقارالىق كورمەسىندە تانىستىرىلدى، دەپ جازادى «التاي اقپاراتى» باسىلىمى.
اتالعان ب ا ق-تىڭ دەرەگىنشە، التاي مال شارۋاشىلىعىن دامىتۋ كومپانياسى گەوگرافيالىق بەلگىمەن تىركەلگەن «التاي قويى» مەن ودان ازىرلەنگەن ەت ونىمدەرىن ۇسىنىپ، ونىڭ برەندتىك ەرەكشەلىگىن ناسيحاتتادى.
شينجاڭ مال شارۋاشىلىعىنىڭ «التىن ماڭدايشالىعى» سانالاتىن التاي قويىنىڭ ەتى جۇمساق، وزىنە ءتان وتكىر ءيىسى جوق، اقۋىزعا باي ءارى مايلىلىعى تومەن.
ايتا كەتەيىك، 2025 -جىلدىڭ سوڭىندا وڭىردەگى قوي سانى 4 ميلليونعا جەتىپ، 15 زاماناۋي سويۋ جانە وڭدەۋ كاسىپورنى جۇمىس ىستەگەن. سالا ءونىمىنىڭ جىلدىق قۇنى 1,479 ميلليارد يۋانعا جەتىپ، التايدىڭ اۋىل شارۋاشىلىعى مەن اۋىل تۇرعىندارىنىڭ تابىسىن ارتتىرۋعا ەلەۋلى ۇلەس قوسىپ وتىر.
سونداي-اق وسى اپتادا «التاي اقپاراتى» باسىلىمىندا «التايدا 12 مىڭ جىلدىق قار شاڭعىسى تاريحىن تانىتاتىن مۋزەي اشىلدى» دەگەن اقپارات جاريالاندى.
التايداعى «ادامزاتتىڭ قار شاڭعىسى مەكەنى» مۋزەيى 13-قاراشادا جاڭارتىلعان نۇسقادا رەسمي تۇردە اشىلدى. مۋزەي جاڭعىرتۋ بارىسىندا سيفرلىق تەحنولوگيالاردى ەنگىزۋ، كورمە كەڭىستىگىن قايتا ۇيىمداستىرۋ جانە ەكسپوزيتسيالاردى جەتىلدىرۋگە باسىمدىق بەرگەن.
زاماناۋي VR تەحنولوگياسى ارقىلى كەلۋشىلەر 12 مىڭ جىل بۇرىنعى التايداعى ادامداردىڭ قارلى- مۇزدى ورتاداعى تۇرمىس-تىرشىلىگىن ۆيرتۋالدى تۇردە سەزىنە الادى. مۇندا بايىرعى قار شاڭعىسى مادەنيەتىنىڭ قالىپتاسۋ تاريحىن تانىستىراتىن كورمەلەرمەن قاتار، زەرتتەۋ، ءبىلىم بەرۋ، تاجىريبەلىك ساباقتار جانە ماتەريالدىق ەمەس مادەني مۇرانى ناسيحاتتاۋ باعىتىنداعى كەڭىستىكتەر قاراستىرىلعان. مۋزەي باسشىسى لو حۇڭمەيدىڭ ايتۋىنشا، مۋزەي التايدىڭ تۋريستىك تارتىمدىلىعىن ارتتىراتىن مادەني برەند رەتىندە ءوڭىردىڭ 10 مىڭ جىلدان استام تاريحى بار قار شاڭعىسى وركەنيەتىن كەڭىنەن تانىتىپ، مادەنيەت پەن ءتۋريزمنىڭ دامۋىنا ىقپال ەتۋدى كوزدەيدى.
اۆتور
بەيسەن سۇلتان