قىتايدان تاۋار جەتكىزىپ بەرەم - اقتاۋدا تانىمال بلوگەر قىز ۇستالدى
استانا. KAZINFORM - اقتاۋدا تانىمال بلوگەر قىز ۇستالدى. تەرگەۋ مالىمەتىنشە، ساتىپ الۋشىلارعا قىتايدان اكەلىنەتىن ىدىس-اياق پەن تۇرمىستىق تەحنيكا نارىقتاعىدان تومەن باعامەن ۇسىنىلعان، ءبىراق تولەم جاسالعاننان كەيىن تاپسىرىس جەتكىزىلمەگەن.
نە بەلگىلى؟
ماڭعىستاۋ وبلىسى پوليتسيا دەپارتامەنتىنىڭ اقپاراتىنا سۇيەنسەك، ساتۋشى Instagram جەلىسىندە ءتۇرلى تاۋاردىڭ، سونىڭ ىشىندە ىدىس-اياق پەن تۇرمىستىق تەحنيكانىڭ جارناماسىن جاريالاعان. ءونىمدى جارنامالاۋ ءۇشىن بۇل ىسكە تانىمال اككاۋنتتىڭ يەسى تارتىلعان.
جارنامادا تاۋارلار بار ەكەنى، ولاردىڭ ساپاسى جانە قازاقستانعا جەتكىزۋ مۇمكىندىگى تۋرالى ايتىلعان. قىزىعۋشىلىق تانىتقان ساتىپ الۋشىلار كورسەتىلگەن نومىرلەر ارقىلى ساتۋشىمەن بايلانىسىپ، جەكە كاسىپكەردىڭ شوتىنا اقشا اۋدارعان. الايدا ۋادە ەتىلگەن تاۋارلار ولارعا جەتكىزىلمەگەن.
تەرگەۋ دەرەگى بويىنشا تۇسكەن قاراجات جەكە قاجەتتىلىككە جۇمسالعان. قۇقىق قورعاۋ ورگاندارى ىدىس-اياق پەن تۇرمىستىق تەحنيكاعا اقشا اۋدارعان بىرنەشە جابىرلەنۋشىنى انىقتاعان.
تەرگەۋ جۇرگىزىلىپ جاتىر
بۇل دەرەك بويىنشا ق ر قىلمىستىق كودەكسىنىڭ 190-بابى («الاياقتىق») بويىنشا سوتالدى تەرگەۋ باستالدى.
پوليتسيانىڭ سوزىنشە، كۇدىكتى ۇستالىپ، ۋاقىتشا ۇستاۋ يزولياتورىنا قامالعان. قازىر تەرگەۋشىلەر وقيعانىڭ ءمان-جايىن انىقتاپ، باسقا دا زارداپ شەككەندەر بار-جوعىن تەكسەرىپ جاتىر.
اشىق دەرەككوز مالىمەتىنشە، بلوگەر سالتانات امانقوسوۆا تۋرالى ءسوز بولىپ وتىر. ول Instagram پاراقشاسىندا جەكە ءومىرى تۋرالى كونتەنت جاريالاپ، برەندتەردى جارنامالايدى. سونداي-اق، ونىڭ پاراقشاسىندا بىرنەشە جوبانىڭ امباسسادورى ەكەنى كورسەتىلگەن.
