قىتايدان ەۋروپاعا تاۋار جەتكىزەتىن جۇك تەرمينالى قىرعىزستاندا سالىنادى

ول قىتايدان ەۋروپا مەن تاياۋ شىعىسقا تاۋار جەتكىزۋگە ارنالعان لوگيستيكالىق حابتىڭ ءبىر بولىگى بولادى. بۇل تۋرالى «كابار» اگەنتتىگى جازدى.

جوبا تۋرالى «قىرعىزستان اۋەجايلارى» اشىق اكتسيونەرلىك قوعامىنىڭ باسقارما ءتوراعاسى ماناسبەك ساميدينوۆ مالىمدەدى.

ونىڭ ايتۋىنشا، تەرمينال قۇرىلىسى اۋەجايدىڭ ءوز قاراجاتى ەسەبىنەن قارجىلاندىرىلماق.

جوبا حالىقارالىق لوگيستيكالىق كومپانيالاردىڭ تالاپتارىنا ساي كەلەتىن ا جانە ۆ ساناتىنداعى كەدەندىك باقىلاۋداعى قويمالاردى سالۋدى كوزدەيدى. ولار جۇكتىڭ ءارتۇرلى تۇرلەرىن ساقتاۋعا ارنالعان.

- قويما سالىپ قويۋ جەتكىلىكسىز. حالىقارالىق لوگيستيكالىق كومپانيالاردىڭ ءوز ستاندارتتارى بار. سول تالاپتارعا ساي بولۋ ءۇشىن زەرتحانالار مەن ارنايى قويمالار قاراستىرىلۋى كەرەك. مىسالى، قاۋىپتى جۇكتەردى، مەديتسينالىق پرەپاراتتاردى، تەز بۇزىلاتىن ازىق-تۇلىك پەن وسىمدىكتەردى ساقتاۋعا قاجەتتى جاعداي جاسالۋى ءتيىس. سونداي-اق جۇكتىڭ كەيبىر ساناتتارى ءۇشىن ستەريلدى ءۇي-جايلار قاجەت،-دەدى ماناسبەك ساميدينوۆ.

جوباعا سايكەس، قىتايدان كەلەتىن تاۋارلار قىرعىزستانعا اۆتوموبيل كولىگىمەن جەتكىزىلىپ، «ماناس» اۋەجايىنداعى كەدەندىك باقىلاۋداعى قويمالارعا ورنالاستىرىلادى. وندا جۇكتەر كەيىنگى جونەلتۋ ءۇشىن بىرىكتىرىلىپ، قاجەت بولعان جاعدايدا اۋە كولىگىمەن باسقا ەلدەرگە تاسىمالدانادى.

مۇنداي لوگيستيكالىق جۇيە تاسىمالداۋعا جۇمسالاتىن جالپى شىعىندى ازايتۋعا مۇمكىندىك بەرەدى دەپ بولجانىپ وتىر.

وسى اپتانىڭ سوڭىندا «قىرعىزستان اۋەجايلارى» ا ق وكىلدەرى ءىرى اۋەجايلاردىڭ جۇك تەرمينالدارىنىڭ جۇمىسىمەن جانە ولاردىڭ قىزمەتىندەگى حالىقارالىق ستاندارتتارمەن تانىسۋ ءۇشىن قىتايعا بارۋدى جوسپارلاپ وتىر.

ماناسبەك ساميدينوۆتىڭ ايتۋىنشا، شەتەلدىك ينۆەستورلار ىنتىماقتاستىقتى باستاماس بۇرىن جۇك ساقتاۋ جاعدايلارىن وزدەرى تەكسەرىپ، قويما ءۇي-جايلارىنا اۋديت جۇرگىزەدى. بارلىق تالاپقا سايكەستىگى راستالعاننان كەيىن عانا ولار تەرمينالداعى الاڭداردى جالعا الۋ جانە جۇمىسىن باستاۋ تۋرالى شەشىم قابىلدايدى.

بۇعان دەيىن ءشۇي وبلىسى سوق ۇلىق اۋدانىنىڭ قامىشانوۆكا اۋىلىندا قازاقستان مەن قىرعىزستان مەملەكەتتىك شەكاراسىندا «تومونكۇ-چۇي - اۆتوجول» حالىقارالىق وتكىزۋ پۋنكتىنىڭ قۇرىلىسى باستالعانىن حابارلاعان ەدىك.

ەندى قىرعىزستان حالقى قىتايعا پويىزبەن قاتىناي الادى.