قىتايدا جەرلەۋ راسىمدەرىندە درون مەن جاساندى ينتەللەكت قولدانۋ پىكىرتالاس تۋدىردى
استانا. KAZINFORM - قىتايدا دروننان جاسالعان راقىمشىلدىق قۇدايى جانە جاساندى ينتەللەكت قولدانىلعان جەرلەۋ ءراسىمىنىڭ ۆيدەولارى قوعامدا قىزۋ پىكىرتالاسقا سەبەپشى بولدى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى SCMP گە سىلتەمە جاساپ.
جەرلەۋ راسىمىندە جوعارى تەحنولوگيالاردى قولدانۋ كەرەك پە، الدە كونەدەن كەلە جاتقان ءداستۇردى ساقتاعان دۇرىس پا دەگەن سۇراققا جاۋاپ ىزدەپ قىتاي قوعامىنداعى پىكىر ەكىگە جارىلعان.
الەۋمەتتىك جەلىلەردە تارالعان بەينەجازبالاردا كەشكى اۋىل اۋلاسىندا قارت ادامنىڭ جەرلەۋ راسىمىنە جينالعان ونداعان تۋىستارى كورسەتىلگەن. جارىقتاندىرىلعان ەكى درون اۋەگە كوتەرىلىپ، داۋىستىق حابارلامالار تاراتىپ، بىرتىندەپ ۇزاپ بارادى.
ادام بەينەسىندەگى درون-تىرنا مارقۇمنىڭ جاساندى ينتەللەكت ارقىلى سينتەزدەلگەن داۋىسىمەن دۇعا وقىپ، وتباسىنا تىنىشتىق پەن دەنساۋلىق تىلەيدى. ارتىنشا درون ايەل داۋىسىمەن سويلەپ، مارقۇمدى اقتىق ساپارعا شىعارىپ سالۋعا كەلگەنىن ايتادى.
جەرلەۋ ءراسىمىنىڭ قايدا وتكەنى ايتىلماعان. جەرلەۋ ءراسىمىن وتكىزۋمەن اينالىساتىن فيرما وكىلدەرىنىڭ ايتۋىنشا، وسىنداي ءبىر جۇپ دروندى جالعا الۋ قۇنى شامامەن 10000 يۋان (1500 دوللار)، ءداستۇرلى ءدىني راسىمدەردى وتكىزەتىن موناحتى شاقىرساڭىز دا وسىنشاما قاراجات كەتەتىن كورىنەدى.
جەلى قولدانۋشىلارىنىڭ رەاكسيالارى ەكىگە ءبولىندى. كەيبىرەۋلەر ۇيىمداستىرۋشىلاردى «بيزنەس دانىشپاندارى» دەپ اتاپ، قوشتاسۋ راسىمدەرىنىڭ جاڭا فورماتتارىنىڭ پايدا بولعانىن ايتسا، ەندى بىرەۋلەر بۇل يدەيانى سىنعا الىپ، درونداردىڭ قويىلىمىن «ابسۋرد»، قارالى ۇيگە سايكەس كەلمەيتىن جاعداي دەپ اتادى.