قىتايدا جاساندى ينتەللەكت ءوندىرىس پەن ەكسپورتتىڭ وسۋىنە ىقپال ەتتى

بۇل تۋرالى ق ح ر مەملەكەتتىك ستاتيستيكا باسقارماسىنىڭ وكىلى ۆان گۋانحۋا مالىمدەدى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى.

ۆەدومستۆو مالىمەتىنشە، 2026-جىلدىڭ العاشقى توعىز ايىندا تسيفرلىق ءونىم ءوندىرىسى قىتايدىڭ ءىرى ونەركاسىپ سالاسىنىڭ وسىمىنە 33 پايىزدان استام ۇلەس قوستى. وسى كەزەڭدە ينتەگرالدىق سحەمالار ءوندىرىسى 23,3 پايىز، ال اقىلدى ونەركاسىپتىك جابدىقتار ءوندىرىسى 30,6 پايىز ارتتى.

جاساندى ينتەللەكتىنىڭ دامۋى قىزمەت كورسەتۋ سالاسىنىڭ وسىمىنە دە ىقپال ەتتى. نەيروندىق جەلىلەردى وقىتۋعا، الگوريتمدەر مەن ەسەپتەۋ قۋاتتارىنا سۇرانىستىڭ ارتۋىنا بايلانىستى اقپاراتتىق تەحنولوگيالار جانە باعدارلامالىق قامتاماسىز ەتۋ سالاسىنداعى قوسىلعان قۇن ءبىر جىلدا 10,4 پايىز ءوستى.

قىتايدا وزىق تەحنولوگيالارعا سۇرانىس ارتىپ، ج ي بار كوزىلدىرىك پەن سمارت-ساعات سياقتى قۇرىلعىلاردىڭ ءىرى ساۋدا جەلىلەرىندەگى ساتىلىمى 70 پايىزدان استى. ال قىزمەتكەرسىز جۇمىس ىستەيتىن اۆتوماتتاندىرىلعان دۇكەندەردەگى ساۋدا كولەمى 25 پايىزدان استام ءوستى.

جاساندى ينتەللەكتىنى قولدانۋ اياسىنىڭ كەڭەيۋى ينۆەستيتسيا مەن ەكسپورتتىڭ وسۋىنە ىقپال ەتتى. ەلەكتروندى سحەمالار وندىرىسىنە سالىنعان ينۆەستيتسيا 58,7 پايىزعا، ال قىتايدىڭ ەلەكتروندىق كومپونەنتتەر ەكسپورتى 70 پايىزعا ارتتى.

ۆان گۋانحۋانىڭ ايتۋىنشا، قىتايدىڭ تولىق وندىرىستىك تىزبەگى، مول دەرەكتەر قورى مەن اۋقىمدى ىشكى نارىعى ج ي تەحنولوگيالارىن ودان ءارى دامىتۋعا جانە كەڭىنەن ەنگىزۋگە قولايلى جاعداي جاسايدى.

بۇعان دەيىن قىتايدا جاساندى ينتەللەكتىنىڭ دامۋىنا بايلانىستى جاڭا ماماندىقتار ءتىزىمى كەڭەيتىلگەنى حابارلانعان ەدى.