قىتايدا جاڭا ميكروسەريالداردىڭ 90 پايىزدان استامى ج ي كومەگىمەن جاسالادى
استانا. KAZINFORM - جىل باسىنان بەرى قىتايدا جارىق كورگەن جاڭا ميكروسەريالداردىڭ 90 پايىزدان استامى جاساندى ينتەللەكت ارقىلى جاسالعان. بۇل تۋرالى بەيجىڭدەگى Kazinform اگەنتتىگىنىڭ مەنشىكتى ءتىلشىسى Xinhua اگەنتتىگىنە سىلتەمە جاساپ حابارلايدى.
قىتايدىڭ راديو جانە تەلەديدار ىستەرى جونىندەگى مەملەكەتتىك باسقارماسىنىڭ مالىمەتىنشە، بيىل قاڭتار-تامىز ايلارىندا 430 مىڭ قىسقامەتراجدى سەريال ەفيرگە شىققان. بۇل وتكەن جىلدىڭ تولىق كورسەتكىشىنەن 13 ەسە كوپ.
رەتتەۋشى ورگاننىڭ دەرەگىنە سۇيەنسەك، قىتايدا قىسقامەتراجدى سەريالداردى 800 ميلليوننان استام ادام تاماشالايدى. وتكەن جىلى وسى نارىقتىڭ كولەمى 100 ميلليارد يۋان (14 ميلليارد دوللاردان استام) بولعان.
- جاساندى ينتەللەكت تەحنولوگيالارى ميكروسەريالداردى جاڭا تاسىلمەن جاساۋعا، شىعىنداردى قىسقارتىپ، ءوندىرىس تيىمدىلىگىن ارتتىرۋعا مۇمكىندىك بەردى. الايدا بۇل كونتەنت ساپاسى مەن اۆتورلىق قۇقىقتى قورعاۋعا قاتىستى جاڭا ماسەلەلەردىڭ تۋىنداۋىنا دا سەبەپ بولدى، - دەپ اتاپ ءوتتى ۆەدومستۆو.
ەسەپتى كەزەڭدە باقىلاۋ شارالارى كۇشەيتىلىپ، تالاپتاردى بۇزعان 68 مىڭ ميكروسەريال ءوشىرىلدى، 1,2 مىڭنان استام اككاۋنتقا قاتىستى شارا قابىلداندى. سونىڭ ىشىندە بۇعاتتالعان كونتەنتتىڭ 90 پايىزدان استامى جاساندى ينتەللەكت ارقىلى جاسالعان جوبالارعا تيەسىلى.
1-قىركۇيەكتەن باستاپ قىتايدا جاڭا ەرەجە كۇشىنە ەنەدى. وعان سايكەس، مينيسەريال وندىرۋشىلەر مەن ونلاين-ۆيدەوسەرۆيستەر جي ارقىلى جاساعان كونتەنتتى ارنايى بەلگىمەن كورسەتۋگە مىندەتتى. سونداي-اق پلاتفورمالار وزدەرىندە جاريالاناتىن ونىمدەردىڭ ساپاسىن باقىلاۋعا تىكەلەي جاۋاپ بەرەدى.
بۇعان دەيىن قىتايدا جاساندى ينتەللەكت جاساعان اكتريسانىڭ تانىمالدىلىعى ارتقانى حابارلانعان بولاتىن.
