قىتايدان ۇشىپ شىققان استانالىق تۇرعىننىڭ قوماقتى قارجىسى ۇرلانعان - كۇدىكتى قالاي انىقتالدى
استانا. KAZINFORM - استانا تۇرعىنى ۇشاقتا ءىرى كولەمدەگى قارجىسىنان ايىرىلىپ قالعان. كولىك پوليتسەيلەرى شەتەلدىك كۇدىكتىنى ۇستادى.
استانا قالاسى اۋەجايىندا كولىكتەگى پوليتسيا باسقارماسىنا 41 جاستاعى تۇرعىن ارىزدانعان. ول چۇڭشيڭ-بەيجىڭ - استانا باعىتى بويىنشا ترانزيتتىك رەيسپەن استاناعا ۇشىپ كەلگەننەن كەيىن 3600 ا ق ش دوللارى كولەمىندە اقشاسى جوعالعانىن بايقاپ، وقيعانىڭ ءمان-جايىن انىقتاۋعا كومەك سۇراعان.
كولىكتەگى پوليتسيا دەپارتامەنتى باستىعىنىڭ ءبىرىنشى ورىنباسارى تەمىرجان رامازانوۆتىڭ ايتۋىنشا، جەدەل ىزدەستىرۋ ءىس-شارالارى ناتيجەسىندە كولىك پوليتسەيلەرى كۇدىكتىنى ءىزىن سۋىتپاي ۇستاعان.
«ول ارىزدانۋشىمەن ءبىر رەيسپەن ۇشىپ كەلگەن جانە ونىڭ ارتىندا وتىرعان شەتەل ازاماتى بولىپ شىقتى. كۇدىكتى ەلوردا قوناق ۇيلەرىنىڭ بىرىندە ۇستالدى. ءتىنتۋ بارىسىندا ودان ءتۇرلى ۆاليۋتاداعى اقشا، سونىڭ ىشىندە ۇرلانعان 3600 ا ق ش دوللارى تولىق كولەمدە تاركىلەندى»، - دەدى تەمىرجان رامازانوۆ.
ۇستالعان ادام كىناسىن مويىنداعان. قازىر ول قاماۋعا الىندى. بۇل دەرەك بويىنشا سوتالدى تەرگەپ-تەكسەرۋ جۇرگىزىلىپ جاتىر.
ايتا كەتەيىك، بۇعان دەيىن دە كولىك پوليتسەيلەرى وسىعان ۇقساس قۇقىقبۇزۋشىلىق جاسادى دەگەن كۇدىكپەن ەكى شەتەل ازاماتىن ۇستاعان ەدى. قازىر بۇل ىستەر سوتتىڭ قاراۋىندا.
