قىتايدا بالالار ۋلانعان بالاباقشا ديرەكتورى ءومىر بويىنا باس بوستاندىعىنان ايىرىلدى
استانا. KAZINFORM - قىتايدىڭ گانسۋ پروۆينتسياسىندا سوت بالالار جاپپاي قورعاسىنمەن ۋلانعان بالاباقشانىڭ باسشىسىن ءومىر بويىنا باس بوستاندىعىنان ايىردى، تاعى 5 قىزمەتكەر ءتۇرلى مەرزىمدەرگە جابىلدى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى جەنمين جيباو باسىلىمىنا سىلتەمە جاساپ.
لانجوۋ قالاسىنىڭ ورتا دەڭگەيدەگى حالىق سوتى ايىپتالۋشىلاردى ۋلى جانە زياندى تاماق ونىمدەرىن ءوندىرۋ جانە ساتۋ ءىسى بويىنشا كىنالى دەپ تاپتى ءارى ولاردىڭ قىلمىسىن اۋىرلاتاتىن ءمان-جايلار انىقتالدى.
سوت قۇجاتتارىنا سايكەس، بالاباقشا باسشىلىعى اس ءۇي قىزمەتكەرلەرىنە بالالار مەن قىزمەتكەرلەردىڭ تاماعىنا ازىق-تۇلىك ەمەس ۋلى جانە زياندى زاتتاردى قوسۋدى تىكەلەي تاپسىرعان، بۇل جابىرلەنۋشىلەردىڭ دەنساۋلىعىنا اۋىر زاردابىن تيگىزگەن.
تيانشۋي قالاسىنداعى «حەشي پەيسين» بالاباقشاسىنىڭ ءىس جۇزىندەگى ديرەكتورى لي حۋەيفان ساياسي قۇقىقتارىنان ايىرىپ، 500000 يۋان (74600 دوللار) تۇراتىن جەكە مۇلكىن تاركىلەي وتىرىپ، ءومىر بويىنا باس بوستاندىعىنان ايىرۋ جازاسىنا كەسىلدى. مەكەمەنىڭ مەڭگەرۋشىسى چجۋ جينلين 15 جىلعا باس بوستاندىعىنان ايىرىلىپ، 300000 يۋان (44700 دوللار) ايىپپۇل سالىندى.
اس ءۇيدىڭ تاعى ءتورت قىزمەتكەرى، نيۋ ايۋان، ۆەن يافان، حە سيۋيسيا جانە ان چۋنلين، التى جىلدان سەگىز جىلعا دەيىن باس بوستاندىعىنان ايىرۋ جانە ايىپپۇل تولەۋ جازاسىنا كەسىلدى.
بۇعان دەيىن قىتايدىڭ سولتۇستىك-باتىسىنداعى گانسۋ پروۆينتسياسىنداعى بالاباقشادا 247 بالانىڭ ۋلانعانى تۋرالى حابارلانعان. بالالاردىڭ تاعامىنا قۇرامىندا قورعاسىن بار ۋلى بوياۋلاردى ادەيى قوستى دەگەن كۇدىكپەن التى ادام، سونىڭ ىشىندە بالاباقشانىڭ ينۆەستورى، ديرەكتورى جانە اسپازدارى قاماۋعا الىنعان بولاتىن.
