قىتايدا داتا-ورتالىقتار 2030-جىلعا قاراي جالپى ەلەكتر ەنەرگياسىنىڭ 6 پايىزىن تۇتىنادى
استانا. KAZINFORM - قىتايدىڭ ەسەپتەۋ ينفراقۇرىلىمىنىڭ ەنەرگيا تۇتىنۋ كولەمى 2030-جىلعا قاراي 800 ميلليارد كيلوۆات-ساعاتقا جەتپەك، بۇل ەلدەگى جالپى ەنەرگيا تۇتىنۋدىڭ شامامەن 6 پايىزى، دەپ حابارلايدى Kazinform اگەنتتىگىنىڭ بەيجىڭدەگى مەنشىكتى ءتىلشىسى.
بۇل تۋرالى بۇگىن قىتايدىڭ مەملەكەتتىك ەنەرگەتيكا باسقارماسىنىڭ (م ە ب) 2026-جىلدىڭ العاشقى ءۇش توقسانىنداعى ەنەرگەتيكا سالاسىنىڭ دامۋ ناتيجەلەرىنە ارنالعان باسپا ءسوز ءماسليحاتىندا ايتىلدى.
- جاساندى ينتەللەكتتىڭ قارقىندى دامۋىنا بايلانىستى ەسەپتەۋ قۋاتىنا دەگەن سۇرانىس بولاشاقتا دا وسە بەرەدى. 15-بەسجىلدىق كەزەڭىندە (2026-2030) ەسەپتەۋ قۋاتىن تۇتىنۋدىڭ جىلدىق ءوسىمى 100 ميلليارد كيلوۆاتت-ساعاتتان اسادى، - دەدى م ە ب ەلەكتر ەنەرگەتيكاسى دەپارتامەنتى باسشىسىنىڭ ورىنباسارى تان حۋنجياڭ.
2025-جىلى قىتايدىڭ دەرەك ورتالىقتارى شامامەن 170 ميلليارد كيلوۆاتت-ساعات تۇتىندى، بۇل ەلدىڭ جالپى ەلەكتر ەنەرگياسىن تۇتىنۋ كورسەتكىشىنىڭ 1,6 پايىزى ەدى.
ءوسىپ كەلە جاتقان سۇرانىستى قاناعاتتاندىرۋدىڭ نەگىزگى تەتىگى جاقىن ماڭداعى كۇن جانە جەل ەلەكتر ستانسيالارىنان دەرەك ورتالىقتارىنا ارنايى جەلىلەر ارقىلى «جاسىل» ەنەرگيانى تىكەلەي جەتكىزۋ بولىپ وتىر.
باسقارمانىڭ مالىمەتتەرى بويىنشا، بيىل قىركۇيەك ايىنىڭ سوڭىنا دەيىن 24 پروۆينتسياعا وسى سحەمانى ىسكە اسىرۋ ەرەجەلەرىن تاپسىرىلدى. ەل بيلىگى ەسەپتەۋ ينفراقۇرىلىمىنا جاڭارتىلاتىن ەنەرگيانى تىكەلەي جەتكىزۋ بويىنشا 12 جوبانى ماقۇلداعان.
ۆەدومستۆو بۇل مودەل جاساندى ينتەللەكت يندۋسترياسىنىڭ قاجەتتىلىكتەرىن قاناعاتتاندىرىپ، سونىمەن قاتار جاڭارتىلاتىن ەنەرگيا كوزدەرىنىڭ تيىمدىلىگىن ارتتىراتىنىن اتاپ ءوتتى.
بۇعان دەيىن قىتاي اشىق تەڭىزدە الەمدەگى العاشقى سۋ استى كۇن باتارەيالارىن سىناقتان وتكىزگەن بولاتىن.
قىتايدا جاساندى ينتەللەكت ءوندىرىس پەن ەكسپورتتىڭ وسۋىنە ىقپال ەتتى.
