قىتايدا الەمدەگى ەڭ ءىرى تەمىرجول-اۆتوموبيل كوپىرى سالىنىپ جاتىر

جوبا اياسىندا اۋىر جۇك كوتەرەتىن درون كوپىردىڭ ەكى نەگىزگى تىرەگىنىڭ اراسىنا ۇزىندىعى 1700 مەتر بولاتىن العاشقى باعىتتاۋشى ارقاندى جەتكىزدى. ديامەترى نەبارى 2,5 ميلليمەتر بولاتىن جوعارى بەرىكتىكتەگى Dyneema تالشىعىنان جاسالعان ارقان 5-پيلوننان 4-پيلونعا تارتىلدى.

بەسپيلوتنيك كەمە قوزعالىسى قارقىندى بۇعازدى شامامەن 10 مينۋتتا كەسىپ ءوتىپ، ارقاندى بەلگىلەنگەن نۇكتەگە جەتكىزگەن. وسىلايشا سىزى جانە جينتاڭ ارالدارى جاعالاۋىنداعى ەكى نەگىزگى پيلون العاش رەت اۋە جەلىسى ارقىلى جالعاندى.

بۇل وپەراتسيا كوپىردىڭ اسپالى بولىگىن تۇرعىزۋ ءۇشىن قاجەت ارنايى جۇمىس الاڭىن - كەتۆوكتى مونتاجداۋعا مۇمكىندىك بەرەدى. كەيىن ءدال وسى قۇرىلىم نەگىزگى كابەلدەر مەن كوپىردىڭ جوعارعى بولىگىن سالۋ كەزىندە پايدالانىلادى.

ۇزىندىعى - 3 شاقىرىمنان اسادى

سيحوۋمەن كوپىرىنىڭ جالپى ۇزىندىعى 3118 مەتر بولادى. نەگىزگى ارالىعى 1488 مەترگە سوزىلىپ، نىسان ۆانتتى جانە اسپالى كوپىر تەحنولوگيالارىن بىرىكتىرەتىن ەرەكشە كونسترۋكتسيامەن سالىنادى.

جوباداعى تاعى ءبىر ەرەكشەلىك - كوپىردىڭ ەنى. جول توسەمىنىڭ جالپى ەنى 68 مەترگە جەتەدى. جوبا اياقتالعاننان كەيىن ول تەڭىز ۇستىنەن وتەتىن ەڭ كەڭ كوپىرلەردىڭ بىرىنە اينالماق.

قۇرىلىسشىلار نىساندا بىرنەشە يننوۆاتسيالىق ينجەنەرلىك شەشىمدى قولدانۋدى جوسپارلاپ وتىر. سونىڭ ىشىندە جوعارى جىلدامدىقتى تەمىرجول وتەتىن تەڭىز كوپىرىندە العاش رەت ۆانتتى- اسپالى ارالاس جۇيە پايدالانىلماق. سونداي-اق بيىكتىگى وزگەرىپ وتىراتىن كەڭىستىكتىك كابەلدەر جۇيەسى ەنگىزىلەدى.

جوبا اۆتورلارىنىڭ مالىمەتىنشە، كوپىر بىرنەشە الەمدىك ينجەنەرلىك كورسەتكىش بويىنشا رەكورد ورناتۋعا ءتيىس. ولاردىڭ قاتارىندا تەمىرجول مەن اۆتوكولىك قاتار جۇرەتىن كوپىرلەر اراسىنداعى نەگىزگى ارالىقتىڭ ۇزىندىعى مەن كوپىر ەنى، نەگىزگى پيلونداردىڭ بيىكتىگى، انكەرلىك جۇيەنىڭ كولەمى جانە بۇرعىلانعان قادالارعا نەگىزدەلگەن ىرگەتاستىڭ ديامەترى بار.

درون نە ءۇشىن پايدالانىلدى؟

كوپىر قۇرىلىسىنداعى العاشقى باعىتتاۋشى ارقان كەيىنگى نەگىزگى كابەلدەردى تارتۋعا جول اشادى. ماماندار ونى شارتتى تۇردە «ينە مەن جىپكە» تەڭەيدى: الدىمەن جىڭىشكە ءارى جەڭىل ارقان وتكىزىلىپ، سونىڭ كومەگىمەن بىرتىندەپ اۋىر ءارى كۇردەلى كونسترۋكتسيالار تارتىلادى.

مۇنداي جۇمىستاردا تىكۇشاق، كەمە نەمەسە درون پايدالانىلۋى مۇمكىن. الايدا سيحوۋمەن بۇعازىندا جەل قاتتى سوعىپ، تولقىن بيىك كوتەرىلەدى. بۇعان قوسا، بۇل اۋماق حالىقارالىق كەمە قاتىناسى بەلسەندى جۇرەتىن باعىتتاردىڭ ءبىرى.

سوندىقتان ماماندار بىرنەشە نۇسقانى سالىستىرىپ، باعىتتاۋشى ارقاندى درون ارقىلى تارتۋدى تاڭداعان. بۇل ءتاسىل جۇمىستى قىسقا مەرزىمدە ورىنداپ، بۇعازداعى كەمە قوزعالىسىن ۇزاق ۋاقىتقا شەكتەمەۋگە مۇمكىندىك بەرگەن.

نيڭبو مەن جوۋشاندى بايلانىستىرادى

سيحوۋمەن كوپىرى نيڭبو - جوۋشان تەمىرجولى مەن نيڭبو - جوۋشان جەدەل اۆتوماگيسترالىنىڭ ەكىنشى كەزەڭىنە ورتاق تەڭىز وتكەلى بولادى.

جاڭا تەمىرجول نيڭبو-دۋن ستانسياسىنان باستالىپ، جوۋشان ارالىنداعى بايتسيۋان ستانسياسىنا دەيىن سوزىلادى. جەلىنىڭ پايدالانۋ ۇزىندىعى شامامەن 77 شاقىرىمدى قۇرايدى.

جوبا تولىق ىسكە قوسىلعاننان كەيىن جوۋشاننىڭ تەمىرجول قاتىناسى ايتارلىقتاي جاقسارىپ، جىجياڭ پروۆينتسياسىنداعى قالالاردى جوعارى جىلدامدىقتى تەمىرجول جەلىسىمەن بايلانىستىرۋ جوسپارىنىڭ ماڭىزدى بولىگى اياقتالماق.