قىتايدا 8 مىڭ جىل بۇرىن ءومىر سۇرگەن ەر ادامنىڭ كەلبەتى قالپىنا كەلتىرىلدى
استانا. KAZINFORM - قىتاي عالىمدارى 8 مىڭ جىلدان استام ۋاقىت بۇرىن ءومىر سۇرگەن ەر ادامنىڭ بەت-بەينەسىن قايتا قالپىنا كەلتىردى.
رەكونسترۋكتسيا حەنان پروۆينتسياسىنداعى ەجەلگى جياحۋ قونىسىنان تابىلعان ادام سۇيەكتەرىنىڭ نەگىزىندە جاسالدى. بۇل تۋرالى Xinhua اگەنتتىگى جازدى.
رەكونسترۋكتسيانى حەنان پروۆينتسياسىنىڭ مادەني مۇرا جانە ارحەولوگيا ينستيتۋتى مەن جيلين ۋنيۆەرسيتەتىنىڭ بيوارحەولوگيالىق زەرتحاناسىنىڭ ماماندارى بىرلەسىپ جۇرگىزدى. ولار فيزيكالىق انتروپولوگيا ادىستەرىن زاماناۋي ۇشولشەمدى مودەلدەۋ تەحنولوگيالارىمەن ۇشتاستىرعان.
زەرتتەۋشىلەردىڭ ايتۋىنشا، بۇل جۇمىس ەجەلگى جياحۋ قونىسىن مەكەندەگەن ادامداردىڭ سىرت كەلبەتىن كوزگە ەلەستەتۋگە مۇمكىندىك بەرەدى.
عالىمدار ەر ادامنىڭ قايتىس بولعان كەزدەگى جاسىن 25-30 جاس شاماسىندا دەپ باعالاعان. مۇنداي تۇجىرىم جامباس سۇيەگىنىڭ ءپىشىنى مەن تىستەرىنىڭ توزۋ دەڭگەيىنە نەگىزدەلگەن.
زەرتتەۋ ناتيجەسىندە ەر ادامنىڭ باس سۇيەگى سوپاقشا ءپىشىندى، قاسۇستى دوعالارى ايقىن، ال بەت سۇيەكتەرى جالپاق ءارى كەڭ بولعانى انىقتالدى. ونىڭ بەت الپەتى ءبىرشاما جالپاق، جاق سىزىقتارى بۇرىشتى، مۇرنى ورتاشا كولەمدى بولعان.
ەجەلگى ادامنىڭ كەلبەتىن قالپىنا كەلتىرۋ ءۇشىن ماماندار باس سۇيەگىنىڭ ەگجەي- تەگجەيلى ۇشولشەمدى مودەلىن جاساعان. ولار بەت ءپىشىنىن انىقتاۋعا كومەكتەسەتىن 28 نەگىزگى نۇكتەنى بەلگىلەپ، بۇلشىقەتتەردىڭ سۇيەككە بەكىنۋ ەرەكشەلىكتەرىن زەرتتەگەن. وسى دەرەكتەر نەگىزىندە ەر ادامنىڭ بەت- بەينەسىنىڭ شامامەن قانداي بولعانىن انىقتاعان.
رەكونسترۋكتسيا بارىسىندا ەر ادامنىڭ جاسى دا ەسكەرىلىپ، وعان تابيعي ساقال مەن تەرىدەگى جاس ەرەكشەلىكتەرىنە ءتان بەلگىلەر قوسىلعان.
جياحۋ ارحەولوگيالىق ەسكەرتكىشى حەنان پروۆينتسياسىنداعى ۋيان ۋەزىنە قاراستى اتتاس اۋىلدىڭ ماڭىندا ورنالاسقان. بۇل قونىس شامامەن 9- 7,5 مىڭ جىل بۇرىنعى ەرتە نەوليت داۋىرىنە جاتادى جانە سول كەزەڭدەگى ءىرى مەكەندەردىڭ ءبىرى سانالادى.
ارحەولوگيالىق قازبا جۇمىستارى كەزىندە بۇل جەردەن سۇيەكتەن جاسالعان فلەيتالار، تاسباقا ساۋىتتارى، قىش ىدىستار، تاس قۇرالدار جانە باسقا دا كونە جادىگەرلەر تابىلعان. جياحۋ ەسكەرتكىشى قىتايدىڭ ورتالىق جازىعىنداعى ەجەلگى تاريح پەن مادەنيەتتى زەرتتەۋدە ماڭىزدى ورىن الادى.
قازىر قىتايدا ارحەولوگيالىق زەرتتەۋلەرگە سيفرلىق تەحنولوگيالار كەڭىنەن ەنگىزىلىپ جاتىر. اتاپ ايتقاندا، جاساندى ينتەللەكت، سپۋتنيكتىك ءتۇسىرىلىم، ۇشقىشسىز ۇشۋ اپپاراتتارى، ۇشولشەمدى مودەلدەۋ جانە ۆيرتۋالدى شىندىق تەحنولوگيالارى تاريحي مۇرانى زەرتتەۋ، قۇجاتتاۋ جانە ساقتاۋ ماقساتىندا قولدانىلعان.
