قىتاي ينۆەستيتسياسىنا سالىناتىن جەل مەن كۇن ەلەكتر ستانسالارىنىڭ تاريفى جاريالاندى

استانا. KAZINFORM - ەنەرگەتيكا مينيسترلىگى قىتاي ينۆەستيتسياسىنا 3 جەل ەلەكتر، ءبىر كۇن ەلەكتر ستانساسىن سالۋدى كوزدەيتىن كەلىسىمنىڭ جوباسىن كوپشىلىك تالقىلاۋىنا شىعاردى.

- كەلىسىم جاڭارتىلاتىن ەنەرگيا سەكتورىن دامىتۋعا، ەنەرگەتيكالىق قاۋىپسىزدىككە جاردەمدەسۋگە جانە كومىرقىشقىل گازى شىعارىندىلارىن ازايتۋعا باعىتتالعان. ول جالپى قۋاتى 1,5 گ ۆ ت ءۇش جەل ەلەكتر ستانتسياسىن جانە قۋاتى 0,3 گ ۆ ت ءبىر كۇن ەلەكتر ستانتسياسىن سالۋدى كوزدەيدى. جاڭا نىسانداردىڭ جالپى قۋاتى 1,8 گۆت قۇرايدى. جوبالار قاراعاندى، تۇركىستان جانە پاۆلودار وبلىستارىندا ىسكە اسىرىلادى، - دەپ جازىلعان قۇجاتتىڭ باسپا ءسوز- رەليزىندە.

مينيسترلىك ماماندارى اتالعان جوبالاردان مىنانداي ناتيجەلەر كۇتىپ وتىر:

• قازاقستاننىڭ ەنەرگيا بالانسىنداعى جەك ۇلەسىن 2030 -جىلعا قاراي %15 عا دەيىن ۇلعايتۋ؛

• جىل سايىنعى نەگىزدە كومىرقىشقىل گازى شىعارىندىلارىن (CO₂) ازايتۋ؛

• جۇمىس ورىندارىن قۇرۋ: 100 گە دەيىن تۇراقتى جانە 1500 گە دەيىن ۋاقىتشا؛

• شامامەن 2 ميلليارد ا ق ش دوللارى كولەمىندە ينۆەستيتسيا تارتۋ؛

• جىل سايىن 5,7 ميلليارد كۆتساع تازا ەنەرگيا ءوندىرۋ.

سونداي- اق، قۇجاتتاردا ءار ستانسادان 25 جىل بويى ساتىپ الىناتىن ەلەكتر قۋاتىنىڭ الدىن الا ءتاريفى دە كورسەتىلگەن.

China Power International Holding Limited جانە China Energy Overseas Investment Co.، Ltd. كومپانيالارى ينۆەستيتسيا سالاتىن 500 م ۆ ت- تىق ءۇش جەل ەلەكتر ستانساسىنان ساتىپ الىناتىن 1 ك ۆ ت/ساع ەلەكتر قۋاتىنىڭ ينديكاتيۆتى باعاسى 4,25 سەنت بولىپ بەلگىلەنسە، 300 م ۆ ت- تىق كۇن ەلەكتر ستانساسىنىڭ الدىن الا ءتاريفى 1 ك ۆ ت/ساع ەلەكتر قۋاتى ءۇشىن 5,63 سەنت بولىپ بەلگىلەنبەك.

اشىق تالقىلاۋدان كەيىن وسى كەلىسىمدى راتيفيكاتسيالاۋ تۋرالى زاڭ جوباسى پارلامەنت ءماجىلىسىنىڭ قاراۋىنا ەنگىزىلەدى.