قىتاي ينۆەستورلارى پاۆلوداردا كولىك ديسكىلەرى مەن قوسالقى بولشەكتەرىن شىعارماق
پاۆلودار. KAZINFORM - جوبا قۇنى - 50 ميلليارد تەڭگە وندىرىستە جىلىنا 2 ميلليون دانا ءونىم شىعارىلىپ، 100 دەن استام تۇراقتى جۇمىس ورنى قۇرىلۋى مۇمكىن.
پاۆلودار وبلىسىنىڭ اكىمى اسايىن بايحانوۆ قىتايلىق Beijing Jinghanlin mould Manufacturing Co. Ltd جانە Hua an International Investment Management LLP كومپانيالارىنىڭ وكىلدەرىمەن كەزدەستى.
كەزدەسۋ بارىسىندا تاراپتار وڭىردەگى «پاۆلودار» ارنايى ەكونوميكالىق ايماعىنىڭ اۋماعىندا اۆتوكولىك ونەركاسىبىنە ارنالعان اۆتوكولىكتەردىڭ اليۋميني ديسكىلەرى مەن قوسالقى بولشەكتەرىن شىعاراتىن كاسىپورىن سالۋ مۇمكىندىگىن تالقىلادى.
- جوبانىڭ قۇنى شامامەن 50 ميلليارد تەڭگەنى قۇرايدى. كاسىپورىن قۇرىلسا، جىلىنا 2 ميلليون ءونىم شىعارىپ، 100 دەن استام ادامدى جۇمىسپەن قامتيدى. وبلىس اكىمى اسايىن بايحانوۆ قولايلى ينۆەستيتسيالىق احۋال قالىپتاستىرۋ - بۇل جۇمىستاعى باستى باسىمدىق ەكەنىن اتاپ ءوتتى. ول كاسىپورىننىڭ بولاشاعىن جوعارى باعالادى. «Beijing Jinghanlin Mould» كومپانياسىنىڭ قۇرىلتايشىسى جانە باسشىسى تاۋ حۋاچان دوڭگەلەك ديسكىلەرىن قۇيۋ جانە سىناۋ تەحنولوگياسى، جۇك كولىكتەرىنىڭ دوڭگەلەكتەرىنە ارنالعان قالىپتاردى ءوندىرۋ جانە ەكسپورتقا باعدارلانعان ءونىمنىڭ ارتىقشىلىقتارى تۋرالى باياندادى. تاراپتار جوبانى جان- جاقتى تالقىلاۋدى جالعاستىرۋدى جانە ونى ىسكە اسىرۋ جونىندەگى الداعى ۋاقىتتاعى قادامدار تۋرالى ۋاعدالاستى، - دەپ حابارلادى وبلىس اكىمىنىڭ باسپا ءسوز قىزمەتىنەن.
Beijing Jinghanlin Mould Manufacturing Co. Ltd - نارىقتاعى نەگىزگى ويىنشى جانە ءوز ونىمدەرىن وڭتۇستىك- شىعىس ازياعا، ەۋروپاعا، لاتىن امەريكاسىنا جانە ا ق ش- قا جەتكىزەتىن قىتايداعى ەڭ ءىرى كومپانيالاردىڭ ءبىرى.
