قىتاي يارلۋن- ساڭپو وزەنىنىڭ بويىنان الەمدەگى ەڭ ۇلكەن بوگەن تۇرعىزباق
بەيجىڭ. KAZINFORM - قىتاي ۇكىمەتى يارلۋن- ساڭپو وزەنىنىڭ تومەنگى اعىسىنا سۋ ەلەكتر ستانتسياسىن سالۋ جوباسىن بەكىتتى. بۇل تۋرالى شينحۋا اگەنتتىگى حابارلادى.
قىتايلىق رەسمي اگەنتتىكتىڭ حابارلاۋىنشا، يارلۋن- ساڭپو وزەنىنىڭ تومەنگى اعىسىنان بوي كوتەرەتىن گيدروەنەرگەتيكالىق نىسان دامۋدىڭ جاڭا ۇلگىسىن جەدەل قالىپتاستىرىپ، جوعارى ساپالى ءوسىمدى العا جىلجىتۋدا ماڭىزدى ءرول اتقارادى. سونداي-اق، تومەن كومىرتەكتى دامۋدى ىلگەرىلەتۋگە باعىتتالعان جاسىل جوبا رەتىندە، ول جاھاندىق كليماتتىڭ وزگەرۋىنە قارسى شارالار قابىلداۋدا ۇلكەن ماڭىزعا يە. جوبا يارلۋن- ساڭپو وزەنىنىڭ مول گيدروەنەرگەتيكالىق رەسۋرستارىن پايدالانا وتىرىپ، ايماقتا كۇن جانە جەل ەنەرگياسىن دامىتۋدى ماقسات ەتەدى.
اگەنتتىك ءمالىم ەتكەندەي، سۋ، جەل جانە كۇن ەنەرگياسىن بىرىكتىرگەن تازا ەنەرگيا بازاسىن قۇرۋ قىتاي ءۇشىن جاسىل جانە تومەن كومىرتەكتى دامۋعا كوشۋدى جەدەلدەتۋگە باعىتتالعان ماڭىزدى قادام سانالادى.
الايدا سينگاپۋرلىق «Lianhe Zaobao» باسىلىمى اتاپ وتكەندەي، الەمدەگى ەڭ ءىرى بوگەن تۇرعىزۋعا باعىتتالعان وسى ءورشىل جوبا قىتاي مەن ءۇندىستان اراسىنداعى شەكارالىق داۋدىڭ جاڭا كەزەڭىنە جول اشۋى مۇمكىن.
— سۋ ەلەكتر ستانتسياسىنىڭ قۇرىلىسى كەمىندە 10 جىلعا سوزىلادى دەپ كۇتىلۋدە، جالپى ينۆەستيتسيا كولەمى 10 تريلليون يۋاننان (شامامەن 700 تريلليون تەڭگە) اسۋى مۇمكىن. جوبانىڭ شىعىن كولەمى 254,2 ميلليارد يۋانعا سالىنعان ءۇش قىساڭ بوگەتىنىڭ قۇنىنان الدەقايدا جوعارى، ول الەمدەگى ەڭ قىمبات ينفراقۇرىلىم جوباسى بولماق. وتكەن جىلى قىتايدىڭ ەنەرگەتيكا قۇرىلىمىندا سۋ ەنەرگياسىنىڭ ۇلەسى شامامەن %14 دى قۇراعان. الايدا، جاھاندىق جىلىنۋدىڭ سالدارىنان قۇرعاقشىلىق كەزەڭىنىڭ ۇزارۋى گيدروەنەرگيا ءوندىرىسىنىڭ ايتارلىقتاي قىسقارۋىنا سەبەپ بولدى. ءسويتىپ، سىچۋان جانە يۋننان سياقتى سۋ رەسۋرستارىنا باي پروۆينتسيالاردىڭ وزىندە ەلەكتر تاپشىلىعىن تۋىندادى. قازىرگە دەيىن قىتاي يارلۋن- ساڭپو وزەنىنىڭ بويىنان شامامەن 12 شاعىن جانە ورتا سۋ ەلەكتر ستانتسياسىن سالىپ ۇلگەردى، - دەپ جازادى «Lianhe Zaobao» باسىلىمى.
سينگاپۋرلىق باسىلىمى اتاعانداي، يارلۋن- ساڭپو ءۇندىستان مەن بانگلادەش ءۇشىن ايرىقشا ماڭىزى بار تۇشى سۋ كوزى. داريا قىتاي شەكاراسىنان شىعىپ، ءۇندىستاننىڭ ارۋناچال- پرادەش شتاتى جانە بانگلادەش ارقىلى تەڭىزگە قۇيادى. قىتاي ارۋناچال- پرادەش جەرىن وڭتۇستىك تيبەت ايماعىنىڭ ءبىر بولىگى دەپ سانايدى.
ءۇندىستان مەن بانگلادەش اتالمىش جوبا وزەننىڭ اعىسى مەن ارناسىنا جاعىمسىز اسەر ەتىپ، ايماقتاعى سۋ تاپشىلىعىن ۇدەتە ءتۇسۋى مۇمكىن دەپ الاڭدايدى. باسىلىمنىڭ پىكىرىنشە، جوبا بەيجىڭنىڭ ساياسي شيەلەنىس كەزىندە قارسىلاسىنا قىسىم كورسەتۋ قۇرالىنا اينالىپ، ساباسىنا تۇسە باستاعان قىتاي-ءۇندى شەكارالىق جانجالىنىڭ قايتا ورشۋىنە تۇرتكى بولۋى مۇمكىن.
بۇعان جاۋاپ رەتىندە قىتاي سىرتقى ىستەر مينيسترلىگىنىڭ رەسمي وكىلى ماو نين كەزەكتى باسپا ءسوز ءماسليحاتتارىنىڭ بىرىندە يارلۋن- تساڭپو وزەنىنىڭ تومەنگى اعىسىنا سالىناتىن سۋ ەلەكتر ستانتسياسىنىڭ جوباسى ونداعان جىلدارعا جالعاسقان تىڭعىلىقتى زەرتتەۋلەردىڭ ناتيجەسىندە ازىرلەنگەنىن مالىمدەدى. ونىڭ ايتۋىنشا، جوبادا ينجەنەرلىك قاۋىپسىزدىك پەن قورشاعان ورتانى قورعاۋ بويىنشا بارلىق قاجەتتى شارا قاراستىرىلعان، جوبا وزەننىڭ تومەنگى الابىنداعى ەلدەرگە تەرىس سالدار اكەلمەيدى.
- قىتاي ءتيىستى ەلدەرمەن اقپاراتتىق اۋىس- ءتۇيىستى جالعاستىرادى، سونداي- اق يارلۋن- ساڭپو الابىنداعى تۇرعىنداردىڭ يگىلىگى ءۇشىن اپاتتىڭ الدىن الۋ جانە ونىڭ سالدارىن ازايتۋ باعىتىنداعى ىنتىماقتاستىقتى نىعايتادى، - دەدى ماو نين.
ەسكە سالساق، وسىعان دەيىن قىتايدا جاساندى ينتەللەكتىنى ستاندارتتاۋ جونىندەگى تەحنيكالىق كوميتەت قۇرىلعانىن جازدىق.
