قىتاي موتوسيكلدەرى ەۋروپا نارىعىن جاۋلاپ جاتىر

بۇل ءۇردىس ميلاندا وتكەن EICMA 2026 حالىقارالىق كورمەسىندە ايقىن بايقالدى، دەپ حابارلايدى «شينحۋا» اگەنتتىگى.

قىتاي موتوسيكل ساۋدا پالاتاسىنىڭ مالىمەتىنشە، 2026-جىلدىڭ العاشقى جەتى ايىندا قىتايدان ەۋروپاعا ەكسپورتتالعان موتوتسيكلدەردىڭ قۇنى 1,298 ميلليارد دوللارعا جەتكەن. بۇل بىلتىرعى سايكەس كەزەڭنەن 17,17 پايىزعا كوپ.

يتاليا، يسپانيا، گەرمانيا مەن فرانتسيا قىتايلىق موتوسيكلدەردىڭ نەگىزگى نارىقتارى سانالادى. سوڭعى جىلدارى قىتاي برەندتەرى پولشا، چەحيا جانە پورتۋگاليادا دا ءوز پوزيتسياسىن نىعايتقان.

يسپانيانىڭ Anesdor قاۋىمداستىعىنىڭ دەرەگىنە سايكەس، 2026-جىلدىڭ العاشقى جارتىسىندا قىتايلىق برەندتەردىڭ ەل نارىعىنداعى ۇلەسى 28 پايىزعا جەتكەن. ال پورتۋگاليادا CFMOTO، Voge جانە Zontes ماركالارى 2025-جىلى جاڭادان تىركەلگەن موتوسيكلدەر سانى بويىنشا ۇزدىك التىلىققا ەنگەن.

سالا وكىلدەرى قىتايلىق برەندتەردىڭ تانىمالدىعىن ءونىم ساپاسىنىڭ جاقسارۋىمەن، يننوۆاتسيالاردىڭ ارتۋىمەن جانە باسەكەگە قابىلەتتى باعاسىمەن بايلانىستىرادى. سونىمەن قاتار قىتايلىق وندىرۋشىلەردىڭ ەكسپورتتىق ورتاشا باعاسى دا كوتەرىلىپ كەلەدى. بۇل ولاردىڭ ارزان ءونىم شىعارۋدان ساپا مەن تەحنولوگياعا باسىمدىق بەرۋگە كوشكەنىن كورسەتەدى.

ەۋروپالىق ديلەرلەردىڭ پىكىرىنشە، قىتايلىق كومپانيالار جاڭا تەحنولوگيالاردى ەنگىزۋدە جانە ءونىمدى جەتىلدىرۋدە يكەمدىلىك تانىتادى. كەيبىر مودەلدەرى جاپوندىق وندىرۋشىلەرمەن باسەكەگە تۇسە الاتىن دەڭگەيگە جەتكەن.

قىتاي برەندتەرىنىڭ حالىقارالىق جارىستارداعى جەتىستىكتەرى دە ولاردىڭ بەدەلىن ارتتىرىپ وتىر. 2026-جىلى ZXMOTO جانە CFMOTO ماركالارى ءبىرقاتار جارىستا جاقسى ناتيجە كورسەتكەن.

سونىمەن قاتار قىتاي مەن ەۋروپا اراسىنداعى وندىرىستىك ىنتىماقتاستىق كەڭەيىپ كەلەدى. ماسەلەن، بيىل شىلدەدە CFMOTO يتاليالىق Brembo كومپانياسىمەن ستراتەگيالىق ارىپتەستىك تۋرالى كەلىسىمگە قول قويدى. تاراپتار ءونىم ازىرلەۋ جانە جاڭا تەحنولوگيالاردى ەنگىزۋ باعىتىندا بىرلەسىپ جۇمىس ىستەيدى.

قىتاي موتوسيكل ءوندىرىسىنىڭ دامۋى ەۋروپالىق قوسالقى بولشەك وندىرۋشىلەرىنە دە جاڭا مۇمكىندىكتەر اشىپ وتىر. اسىرەسە تەجەگىش، اسپا، شينا جانە ەلەكتروندىق باسقارۋ جۇيەلەرىنە سۇرانىس ارتىپ كەلەدى.

يتاليالىق Ducati كومپانياسىنىڭ وكىلى فابريتسيو كاتستسولي قىتاي موتوسيكل ونەركاسىبىنىڭ دامۋى بۇكىل سالاعا وڭ اسەر ەتەتىنىن اتاپ ءوتتى. ونىڭ ايتۋىنشا، بۇل موتوسيكل مىنۋشىلەر سانىن كوبەيتىپ، موتوسيكل مادەنيەتىنە دەگەن قىزىعۋشىلىقتى ارتتىرادى.

ساراپشىلار قىتاي وندىرۋشىلەرىنىڭ تەحنولوگيالىق الەۋەتى وسكەن سايىن ولاردىڭ ەۋروپا نارىعىنداعى ىقپالى دا كۇشەيە تۇسەتىنىن ايتادى. سونىمەن بىرگە حالىقارالىق جارىستار مەن وندىرىستىك سەرىكتەستىك ەكى تاراپ ءۇشىن دە جاڭا مۇمكىندىكتەرگە جول اشادى.