قىتاي ورتالىق ازيا ەلدەرىمەن بىرلەسىپ ونەركاسىپتىك كووپەراتسيانى دامىتۋعا نيەتتى
تاشكەنت. KAZINFORM - قىتاي ءوڭىر ەلدەرىمەن ورناتىلعان بايلانىستاردى ودان ءارى تەرەڭدەتۋگە مۇددەلى.

بۇل تۋرالى تاشكەنتتەگى ورتالىق ازيا حالىقارالىق ينستيتۋتىندا وتكەن كەزدەسۋدە قىتايدىڭ وزبەكستانداعى توتەنشە جانە وكىلەتتى ەلشىسى يۋي جيۋن ءمالىم ەتتى، دەپ حابارلايدى Kazinform اگەنتتىگىنىڭ مەنشىكتى ءتىلشىسى.
بىلتىر قىتاي مەن «ءبىر بەلدەۋ، ءبىر جول» جوباسىنا قاتىسۋشى ەلدەر اراسىنداعى تاۋار اينالىم 3 تريلليون دوللاردان استى. 150 دەن استام مەملەكەتتى بايلانىستىراتىن اۋقىمدى باعدارلامانىڭ ورتالىق ازيا، ونىڭ ىشىندە قازاقستان ءۇشىن ماڭىزى زور. رەسمي استانا بۇل جوبادا ازيا مەن ەۋروپانى جالعاپ وتىرعان ترانزيتتىك الەۋەتكە يە.
- قىتاي مەن قازاقستان ۆيزاسىز رەجيم ەنگىزۋ شەشىمىن ورتالىق ازيا ەلدەرىنىڭ اراسىندا ءبىرىنشى بولىپ قابىلدادى. بۇل - قوس مەملەكەت اراسىندا ءوزارا دوستىق پەن سەنىمگە نەگىزدەلگەن ىنتىماقتاسىق ورناعانىن ايعاقتايدى. ءبىز ءبارىمىز ءبىر ايماقتا تۇرمىز. بولاشاق ستراتەگيامىزدى بايلانىستىراتىن بىرىككەن جوبالار كوپ. سوندىقتان ءبىزدىڭ قازاقستانمەن دە، وزبەكستانمەن دە جالپى ورتالىق ازيا ەلدەرىمەن ورناتىلعان بايلانىستىڭ جاڭا دەڭگەيگە كوتەرىلەرىنە سەنىمدىمىن، - دەدى قىتايدىڭ وزبەكستانداعى ەلشىسى يۋي جيۋن.

ديپلوماتيالىق ميسسيا باسشىسى اتاپ وتكەندەي، ق ح ر ورتالىق ازيا ەلدەرىمەن بىرلەسىپ، ونەركاسىپتىك كووپەراتسيانى دامىتۋعا نيەتتى.
- ءبىز ونەركاسىپتىك كووپەراتسيانى ىنتىماقتاستىقتى جاڭا دەڭگەيگە شىعاراتىن باعىت رەتىندە سانايمىز. اتالعان سەكتوردا بىرلەسكەن جوبالاردى ىسكە اسىرۋ ماڭىزدى. ول ءۇشىن بارلىق مۇمكىندىك پەن نەگىز بار دەپ ەسەپتەيمىز، - دەدى ەلشى.
ورتالىق ازيا حالىقارالىق ينستيتۋتىنىڭ عىلىمي قىزمەتكەرى شاۆكات اليمبەكوۆتىڭ ايتۋىنشا، ورتالىق ازيا ەلدەرىنىڭ ونەركاسىپتىك الەۋەتى زور. ىنتىماقتاستىقتى تەرەڭدەتە ءتۇسۋ بۇل باعىتتاعى مۇمكىندىكتى ۇتىمدى پايدالانۋعا جول اشادى.

- قىتاي مەن ورتالىق ازيا ەلدەرىنىڭ ونەركاسىپتىك الەۋەتى زور. بۇگىندە وزبەكستاندا 3 مىڭنان استام كاسىپورىن قىتايلىق كاپيتالمەن جۇمىس ىستەپ تۇر. سونىمەن قاتار، ق ح ر ءوڭىر مەملەكەتتەرىنە ەڭ كوپ ينۆەستيتسيا باعىتتاپ جاتقان ەلدەردىڭ كوشىن باستاپ تۇر. سوندىقتان بايلانىستاردى نىعايتۋ ورىندى دەپ سانايمىز، - دەدى شاۆكات اليمبەكوۆ Kazinform ءتىلشىسىنىڭ ساۋالىنا جاۋاپ بەرە وتىرىپ.
جيىنعا قاتىسۋشىلار بيىل قازاقستاندا وتەتىن «ورتالىق ازيا - قىتاي» ءسامميتىنىڭ ماڭىزىنا دا توقتالدى. ساراپشىلاردىڭ پىكىرىنشە، مەملەكەت باسشىلارىنىڭ ءتۇرلى فورماتتاعى كەزدەسۋلەرى ەلدەر اراسىنداعى بايلانىستاردى نىعايتۋعا ەرەكشە سەرپىن بەرەدى.
- قازىر الەمدە كورشى ەلدەر ءبىر- بىرىمەن تىعىز بايلانىس ورناتۋعا مۇددەلى. ويتكەنى، قارىم- قاتىناس بولماي، ەشقانداي ەكونوميكا العا جىلجىمايدى. ماسەلەن، ءقازىر قىتاي مەن وزبەكستان اراسىندا تاۋار اينالىم 13 ميلليارد دوللارعا جەتتى. ال ەگەر قىتايدا قانداي دا ءبىر ماسەلە تۋىنداسا، وندا ول ءبىزدىڭ ەكونوميكاعا ءسوزسىز اسەر ەتەدى، - دەپ پىكىر ءبىلدىردى ورتالىق ازيا حالىقارالىق ينستيتۋتىنىڭ باس عىلىمي قىزمەتكەرى نوسيرجون يۋسۋپوۆ.