قىتاي تۇندە تۋريستىك ورىنداردى كۇزەتۋ ءۇشىن روبوتتاردى پايدالانىپ جاتىر

استانا. KAZINFORM - قىتايدىڭ سىچۋان پروۆينتسياسىنىڭ چەندۋ قالاسىنداعى ايگىلى تۋريستىك اتتراكسيونى «كۋانجاي اللەياسى» 2024 -جىلدىڭ 30-قازانىنان باستاپ تۇنگى كۇزەت جۇمىستارىن روبوتتارعا تاپسىردى.

قىتايلىق sina.com اقپارات قۇرالىنىڭ حابارلاۋىنشا، قىتايدا قولدانىلاتىن قاۋىپسىزدىك روبوتى - بۇل ەل ءوزى زەرتتەپ، وندىرگەن ءتورت اياقتى روبوت. روبوت «لينگتونگ» دەپ اتالادى. ەسىمىنىڭ ماعىناسى - «دانا كوز».

قىتايلىق ينجەنەرلەر روبوتقا ناقتى ۋاقىت رەجيمىندە دەرەكتەردى باسقارۋ ورتالىعىنا جىبەرىپ، قالىپتان تىس جاعدايلارعا جىلدام ارەكەت ەتە الاتىن ليدار مەن تەمپەراتۋرا سەنسورلارىن ورناتقان.

روبوتتىڭ مىندەتى - تۇنگى قاۋىپسىزدىكتى قاداعالاۋ، قوعامدىق ءتارتىپتى قامتاماسىز ەتۋ جانە ءورتتىڭ الدىن الۋ.

چەندۋ ۇكىمەتىنىڭ جوسپارىنا سايكەس، 2026 -جىلعا قاراي قالا قىتايدىڭ روبوت ونەركاسىبىن دامىتۋ ورتالىعىنا اينالادى جانە كۇندەلىكتى ومىردە قولدانۋعا بولاتىن روبوت ونىمدەرىنىڭ كەم دەگەندە 100 ءتۇرىن شىعارادى.

سونىمەن قاتار، جاساندى ينتەللەكت تەحنولوگياسىن كەڭىنەن قولدانۋ ارقىلى روبوت يندۋسترياسى جاڭارتىلىپ، روبوت ونىمدەرىن كوممەرتسيالاندىرۋ مۇمكىندىگى كەڭەيەدى.

اۆتور
مۇقتار مۇرات