قىتاي تاۋلارىنداعى عىلىمي ەكسپەديتسياعا العاش رەت روبوت-يت قاتىستى

بۇل - جاساندى ينتەللەكتى (ج ي) ناقتى قۇرىلعىعا ەنگىزىلگەن روبوتتىڭ تابيعي ورتاداعى عىلىمي زەرتتەۋلەرگە العاش رەت قاتىسۋى.

ەكسپەديتسياعا قاتىسۋشىلار دوڭعالاقتارى مەن جۇرۋگە ارنالعان اياقتارى بار روبوتتى قالىڭ ورمانداردا، تىك بەتكەيلەردە جانە ادامداردىڭ جەتۋى قيىن نەمەسە قاۋىپتى باسقا دا جەرلەردە پايدالاندى. روبوت-يت زەرتتەۋ باعىتتارىن تەكسەرىپ، فوتو جانە بەينەتۇسىرىلىم جۇرگىزدى، سونداي-اق جۇك تاسىمالدادى. زەرتتەۋشىلەردىڭ باعالاۋىنشا، روبوتتى پايدالانۋ قورشاعان ورتاعا زيان تيگىزبەي، دەرەكتەر جيناۋعا مۇمكىندىك بەرگەن.

ەكسپەديتسيانىڭ ماڭىزدى ناتيجەلەرىنىڭ ءبىرى - حلوروفيلى جوق سيرەك وسىمدىك ءتۇرى، بىرگۇلدى مونوتروپانىڭ (Monotropa uniflora) ءساتتى ءتۇسىرىلۋى. قىتاي عالىمدارىنىڭ ايتۋىنشا، تۇسىرىلگەن بەينەكادرلار عىلىمي زەرتتەۋلەر ءۇشىن قۇندى ماتەريال سانالادى.

روبوت-يت كۇردەلى جەر بەدەرىندە جانە اشىق اۋاداعى قولايسىز جاعدايلاردا جۇمىس ىستەۋگە ارنالعان. ول شاڭدى ءارى جاڭبىرلى اۋا رايىندا دا جۇمىس ىستەي الادى. قۇرىلعى - 30-دان +55 گرادۋسقا دەيىنگى تەمپەراتۋراعا ءتوزىمدى. سونداي-اق سالماعى 35 كەلىگە دەيىنگى جۇكتى تۇراقتى تۇردە كوتەرىپ، قۋاتتاۋ قاجەتتىلىگىنسىز 3,5 ساعاتقا دەيىن جۇمىس ىستەيدى.

دوڭعالاقتارى مەن اياقتارىنىڭ ۇيلەسىمدى قۇرىلىمى روبوتقا تاستى سوقپاقتاردان وتۋگە، تىك بەتكەيلەرگە كوتەرىلۋگە، قالىڭ وسىمدىكتەر اراسىمەن جانە لايلى جەرلەردە قوزعالۋعا مۇمكىندىك بەرەدى.

ايتا كەتەيىك، بيىل بەيجىڭدە 16 ەلدەن 2 مىڭنان استام روبوت قاتىسقان الەمدىك ويىندار ءوتتى.