قىتاي تاۋارلارىن ا ق ش باج سالىعىن اينالىپ ءوتۋ ءۇشىن وڭتۇستىك كورەيا ءونىمى رەتىندە كورسەتىپ جاتىر

استانا. KAZINFORM - وڭتۇستىك كورەيا شەتەلدىك، اسىرەسە قىتايدان كەلگەن تاۋارلاردى كورەيالىق ەكسپورت رەتىندە كورسەتۋگە تىرىساتىن ارەكەتتەردىڭ كوبەيگەنىن تىركەدى. بۇل ا ق ش-تىڭ بۇرىنعى پرەزيدەنتى دونالد ترامپ ەنگىزگەن باج سالىعىن اينالىپ ءوتۋ ماقساتىندا جاسالعان، دەپ حابارلايدى Reuters.

وڭتۇستىك كورەيانىڭ كەدەن قىزمەتى دەرەگىنشە، ءبىرىنشى توقسان قورىتىندىسى بويىنشا شىققان ەلىن كورسەتۋ ەرەجەلەرىن بۇزۋ فاكتىلەرى 29,5 ميلليارد ۆونعا (20,81 ميلليون ا ق ش دوللارى) جەتكەن. بۇل بۇزۋشىلىقتاردىڭ 97 پايىزى ا ق ش-قا باعىتتالعان جەتكىزىلىمدەرگە قاتىستى.

سالىستىرمالى تۇردە ايتساق، 2024 -جىلى مۇنداي بۇزۋشىلىقتار 34,8 ميلليارد ۆوندى قۇراعان، ونىڭ 62 پايىزى ا ق ش نارىعىنا باعىتتالعان.

كەدەن قىزمەتىنىڭ تەرگەۋ جوسپارلاۋ ءبولىمىنىڭ ديرەكتورى لي كۆان ۋدىڭ ايتۋىنشا، ترامپتىڭ العاشقى پرەزيدەنتتىك مەرزىمى كەزىندە دە مۇنداي زاڭبۇزۋشىلىقتار جيىلەگەن بولاتىن.

تاۋەكەلدەردىڭ ارتقانىن ەسكەرگەن بيلىك بۇل جولى تەرگەۋدى الدىن الا جۇرگىزىپ، زاڭسىز ەكسپورتتىڭ الدىن الۋعا تىرىسقان. لي اتاپ وتكەندەي، ءبىرىنشى توقساننىڭ وزىندە ا ق ش باج سالىعىن اينالىپ وتۋگە ارەكەت جاسالعانى بايقالعان.

تەكسەرۋ ناتيجەسى بويىنشا، اككۋمۋلياتورلارعا ارنالعان كاتود ماتەريالدارى 3,3 ميلليارد ۆون سوماسىنا قىتايدان اكەلىنىپ، وڭتۇستىك كورەيا ونىمدەرى رەتىندە ا ق ش-قا جونەلتىلگەن.

سونداي-اق، ناۋرىز ايىندا قىتايدان بەينەباقىلاۋ كامەرالارى بولشەكتەپ اكەلىنىپ، وڭتۇستىك كورەيادا قايتا قۇراستىرىلىپ، 19,3 ميلليارد ۆون كولەمىندە ەكسپورتتالعان.

وڭتۇستىك كورەيانىڭ كەدەن قىزمەتى مۇنداي سحەمالاردىڭ جولىن كەسۋ ءۇشىن ارنايى جۇمىس توبىن قۇردى جانە جەرگىلىكتى كومپانيالاردى قورعاۋعا ارنالعان ناقتى ارەكەت شارالارىن ازىرلەۋدى جوسپارلاپ وتىر.

ايتا كەتەيىك، قىتاي ا ق ش-تان سۇيىتىلعان تابيعي گاز ساتىپ الۋدى توقتاتتى.

اۆتور

اسحات رايقۇل