قىتاي سىرتقى ىستەر ءمينيسترى: ازيا - ءىرى دەرجاۆالاردىڭ ويىن الاڭى ەمەس

استانا. KAZINFORM - قىتايدىڭ سىرتقى ىستەر ءمينيسترى ۆان ي ازيا ءىرى دەرجاۆالار ايتىسىپ-تارتىساتىن ويىن الاڭى ەمەس، حالىقارالىق ىنتىماقتاستىقتىڭ جارقىن ۇلگىسىنە اينالۋى كەرەكتىگىن مالىمدەدى دەپ حابارلايدى Kazinform ءتىلشىسى ق ح ر سىرتقى ىستەر مينيسترلىگىنىڭ رەسمي سايتىنا سىلتەمە جاساپ.

7-ناۋرىز كۇنى بۇكىلقىتاي حالىق وكىلدەرى جينالىسىنىڭ باسپا ءسوز ءماسليحاتىندا سىرتقى ىستەر ۆەدومستۆوسىنىڭ باسشىسى ۆان ي قىتايدىڭ كورشىلەس ەلدەرمەن قارىم-قاتىناسى تۋرالى توقتالعاندا، ازيا قىتايدىڭ تۇرلاۋلى تۇعىرى، سونداي-اق ازيالىق ەلدەردىڭ ورتاق مەكەنى ەكەنىن اتاپ ءوتتى.

ونىڭ ايتۋىنشا، قىتاي قازىرگە دەيىن توڭىرەگىندەگى 17 ەلمەن «ورتاق تاعدىر قاۋىمداستىعى» قۇرۋ تۋرالى ۋاعدالاستىققا قول جەتكىزدى، وڭتۇستىك-شىعىس ازيا مەن ورتالىق ازيادا «ورتاق تاعدىر قاۋىمداستىعىنىڭ» ەكى ءىرى كلاستەرى قالىپتاسىپ ۇلگەردى.

- بۇگىنگى قىتاي - ازياداعى تۇراقتىلىقتىڭ تىرەگى، ەكونوميكالىق دامۋدىڭ قوزعالتقىشى جانە وڭىرلىك قاۋىپسىزدىكتىڭ كەپىلى، - دەدى ۆان ي.

ونىڭ ايتۋىنشا، كورشىلەر اراسىندا ۇساق-تۇيەك كەلىسپەۋشىلىك بولىپ تۇرادى، تاريحي ماسەلەلەر مەن مۇددەلەر قايشىلىعى لايىقتى شەشىمىن تابۋى قاجەت.

- قىتاي «ىرىس الدى - ىنتىماق» ەكەنىنە سەنەدى. تەك «ورتاق مەكەن» ۇستانىمىنان اينىماي، «ورتاق تاعدىر قاۋىمداستىعى» باعىتىنان كوز جازباساق، تەڭ قۇقىلى كەڭەس قۇرىپ، ءبىر-بىرىمىزگە تۇسىنىستىكپەن قاراي بىلسەك، كەز كەلگەن كەلىسپەۋشىلىك شەشىلىپ، ءوزارا ءتيىمدى ىنتىماقتاستىق ورناتۋعا مۇمكىندىك تۋادى، - دەدى ول.

ا ق ش- تىڭ ازيا ايماعىنا ورتا قاشىقتىقتاعى زىمىراندار ورنالاستىرۋ نيەتىنە بايلانىستى ۆان ي قىتايدىڭ بۇعان ءۇزىلدى-كەسىلدى قارسى ەكەنىن ءارى ايماقتاعى ەلدەردىڭ دە مۇنداي قادامدى قۇپتاماي قويمايتىنىن ايتتى.

- ا ق ش- تىڭ «ءۇندى-تىنىق مۇحيتى ستراتەگياسى» ىسكە قوسىلعالى بىرنەشە جىلدىڭ ءجۇزى بولدى. ءبىراق ول ايماق ەلدەرىنە نە بەردى؟ ازيا ءىرى دەرجاۆالار ايتىسىپ-تارتىساتىن ويىن الاڭى ەمەس، حالىقارالىق ىنتىماقتاستىقتىڭ جارقىن ۇلگىسىنە اينالۋى كەرەك. ءبىز اشىق ايماقشىلدىقتى (رەگيوناليزم) قۇپتايمىز، ءوزارا قۇرمەت پەن تيىمدىلىك قاعيداتى نەگىزىندە ازيانىڭ دامۋ مۇمكىندىگىن تەڭ ءبولىسۋدى قالايمىز، - دەدى ول.

وسىعان دەيىن ۆان ي قىتاي شانحاي ىنتىماقتاستىق ۇيىمىنىڭ (ش ى ۇ) كەزەكتى ءتوراعاسى رەتىندە 100 دەن استام ءىس-شارا وتكىزەتىنىن حابارلادى.