قىتاي سيرەك مەتال ەكسپورتىنا قويىلعان شەكتەۋدى جەڭىلدەتۋى مۇمكىن
استانا. KAZINFORM - قىتايدىڭ ساۋدا مينيسترلىگى ەۋروپانىڭ چيپ ءوندىرۋشى كومپانيالارىمەن سيرەك جەر ەلەمەنتتەرىنىڭ ەكسپورتىن باقىلاۋ ماسەلەسى بويىنشا بايلانىستى كۇشەيتۋدە، بۇل ەۋروپالىق چيپ وندىرۋشىلەرگە قاتىستى ەكسپورتتىق شەكتەۋدىڭ جەڭىلدەتىلۋى مۇمكىن ەكەنىن مەڭزەيدى.
«China Daily» گازەتىنىڭ حابارلاۋىنشا، 27-مامىر كۇنى ساۋدا مينيسترلىگى قىتاي مەن ەۋروپانىڭ جارتىلاي وتكىزگىش ونەركاسىبى سالاسىنىڭ وكىلدەرىمەن كەزدەسۋ وتكىزىپ، سيرەك جەر ەلەمەنتتەرىنە بايلانىستى ەكسپورتتىق شەكتەۋ ساياساتى تۋرالى تۇسىنىكتەمە بەرگەن ءارى ەۋروپالىق چيپ وندىرۋشىلەرمەن ءتيىستى ماسەلە بويىنشا بايلانىستى نىعايتۋعا نيەت بىلدىرگەن.
- ساۋدا مينيسترلىگىنىڭ جانىنداعى ونەركاسىپتىك قاۋىپسىزدىك جانە ەكسپورتتىق باقىلاۋ بيۋروسىنىڭ ماماندارى كەزدەسۋدە سيرەك جەر ەلەمەنتتەرىنە قاتىستى ەكسپورتتىق شەكتەۋ ساياساتى تۋرالى ۇگىت جۇرگىزىپ، ەكسپورتتىق ليتسەنزيالاردى قالاي الۋعا بولاتىنىن ءتۇسىندىردى، - دەگەن «China Daily» باسىلىمىنا اقپارات بەرگەن ينسايدەرلەردىڭ ءبىرى.
كەلەسى دەرەككوزدىڭ ايتۋىنشا، بۇل قادام قىتاي مەن ەۋروپانىڭ جارتىلاي وتكىزگىش كومپانيالارى اراسىنداعى وندىرىستىك تىزبەككە قاتىستى سيرەك جەر ەلەمەنتتەرىنىڭ ەكسپورتىنا ەنگىزىلگەن شەكتەۋدىڭ جەڭىلدەتىلۋى مۇمكىن ەكەنىن بىلدىرەدى. ال بۇل جاھاندىق وندىرىستىك تىزبەكتىڭ تۇراقتىلىعىن ساقتاۋدا ءتيىمدى.
قىتاي ساۋدا مينيسترلىگىنىڭ رەسمي سايتىنداعى حابارلاماعا سايكەس، سەيسەنبى كۇنى وتكەن كەزدەسۋگە ۆەدومستۆونىڭ ءتيىستى دەپارتامەنتتەرىنىڭ، قىتايدىڭ جارتىلاي وتكىزگىش ونەركاسىبى قاۋىمداستىعىنىڭ، قىتاي-ەۋرووداق ساۋدا پالاتاسىنىڭ، سونداي-اق، سالاداعى 40 تان استام قىتايلىق جانە ەۋروپالىق كاسىپورىننىڭ وكىلدەرى قاتىستى.
حابارلامادا ايتىلعانداي، كەزدەسۋ قىتاي مەن ەۋروپانىڭ جارتىلاي وتكىزگىش سالاسىنداعى وندىرۋشىلەر مەن جەتكىزۋشىلەردىڭ ءوزارا تۇسىنىستىگىن ارتتىرۋعا، بيزنەسكە سەنىمدى نىعايتۋعا جانە ىنتىماقتاستىقتى تەرەڭدەتۋگە الاڭ ۇسىندى. قىتاي مەن ەۋروپانىڭ جارتىلاي وتكىزگىش سالاسىنداعى بايلانىسى مەن ىنتىماقتاستىعىنىڭ نىعايۋى الەمدىك ەكونوميكانىڭ قالپىنا كەلۋىنە جاڭا سەرپىن بەرەدى.
سيرەك جەر ەلەمەنتتەرى جارتىلاي وتكىزگىشتەر وندىرىسىندە ايرىقشا ورىن الادى. Nikkei Asian Review ۇسىنعان دەرەكتەرگە سايكەس، قىتاي بيلىگى 4-ساۋىردەن باستاپ جارتىلاي اۋىر سيرەك جەر ەلەمەنتتەرىنىڭ 7 تۇرىنە ەكسپورتتىق شەكتەۋ ەنگىزگەننەن كەيىن، ەۋروپالىق نارىقتا ولاردىڭ باعاسى ءبىر اي ىشىندە ءۇش ەسە وسكەن.
سيرەك جەر ەلەمەنتتەرىنىڭ ەۋروپالىق باعاسى قىتايدان تىس ايماقتاعى باستى نارىقتىق كورسەتكىش رەتىندە قاراستىرىلادى.
