قىتاي سپۋتنيكتىك ينتەرنەتى قازاقستاندا قاشان ىسكە قوسىلادى
استانا. KAZINFORM – ق ر سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى بيىل قىتايدىڭ Shanghai Spacecom Satellite سپۋتنيكتىك كومپانياسىمەن مەموراندۋمعا قول قويۋدى جوسپارلاپ وتىر، دەپ حابارلايدى Kazinform ءتىلشىسى.
- ءبىزدىڭ مىندەتىمىز - بايلانىس نارىعىندا باسەكەگە قابىلەتتى جاعداي جاساۋ. بۇل ينتەرنەتتىڭ ساپاسىن جانە قامتۋ ايماعىن جاقسارتاتىن نەگىزگى باعىتتاردىڭ ءبىرى دەپ سانايمىز. قازىر ناقتى كەلىسسوزدەر جۇرگىزۋدەمىز، ءبىراق ءالى مەموراندۋمعا قول قويىلعان جوق. قىتايدىڭ (Shanghai Spacecom Satellite - رەد.) كومپانيالارىنىڭ ءبىرى مۇندا ستانتسيا قۇرۋعا جانە ءبىزدىڭ شارتتارعا كەلىسۋگە دايىن ەكەنىن ءبىلدىردى. نەگىزىنەن ولار وسى جەردە دامۋدى قالايدى. بيىل 2025-جىلى ولارمەن مەموراندۋمعا قول قويىپ، مەرزىمدەردى ناقتىلاۋدى جوسپارلاپ وتىرمىز. قازىر ەشتەڭە بەلگىسىز. ءبىراق تۇسىنىكتى بولۋى ءۇشىن ايتا كەتەيىن، وسى جانە باسقا دا قىتايلىق كومپانيالار ەلگە كەلۋگە نيەت تانىتىپ وتىر. ولار قازىر سپۋتنيكتىك ستانسيالاردى ىسكە قوسۋ ساتىسىندا تۇر، - دەدى سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگىنىڭ تەلەكوممۋنيكاتسيا كوميتەتىنىڭ ءتوراعاسى دامير سەيسەمبەكوۆ «استانا حابتا» وتكەن ستراتەگيالىق تالقىلاۋدا.
سونىمەن قاتار، ونىڭ ايتۋىنشا، Starlink (3000 سپۋتنيك) جانە OneWeb (340 سپۋتنيك) سياقتى ءىرى ويىنشىلارمەن سالىستىرعاندا، قىتايلىق كومپانيا ازىرگە از مولشەردە سپۋتنيك قوسۋدا. بۇگىندە ولار 18 سپۋتنيك ورنالاستىردى جانە 2025-جىلدىڭ قاڭتارىندا تاعى 18 سپۋتنيك ۇشىرۋدى جوسپارلاپ وتىر.
د. سەيسەمبەكوۆ قازاقستاندىق مينيسترلىكتىڭ شەتەلدىك كومپانيالارمەن بىرنەشە مەموراندۋمعا قول قويعانىن دا اتاپ ءوتتى. اتاپ ايتقاندا، OneWeb كومپانياسىمەن مەموراندۋم جاسالعان، بۇل كومپانيا بيىل كوممەرتسيالىق قىزمەتتەردى ۇسىنا باستايدى.
سونداي-اق، وتكەن جىلى Amazon Kuiper كومپانياسىمەن مەموراندۋمعا قول قويىلدى، ولار قازاقستاندا 2025-جىلدىڭ سوڭىنا قاراي جۇمىسىن باستاۋدى جوسپارلاپ وتىر.
ايتا كەتەيىك، Astana Hub الاڭىندا سيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى ۇيىمداستىرعان «تەلەكوممۋنيكاتسيالار تۋرالى» زاڭ جوباسىن ازىرلەۋ تۋرالى ستراتەگيالىق سەسسيا ءوتتى.
بۇعان دەيىن قۋانىشبەك ەسەكەيەۆ شەتەلدىك ءىرى سپۋتنيك وپەراتورلارىن قازاقستاندا لوكاليزاتسيالاۋدىڭ ماڭىزدىلىعى تۋرالى ايتقان ەدى.
