قىتاي ساۋلەتشىسى 2025 -جىلعى پريتسكەر سىيلىعىن الدى

استانا. قازاقپارات - «ساۋلەتشىلەردىڭ كوبى وزىندىك بىرەگەي ستيلىمەن تانىلعىسى كەلەدى. قاي جەردە بولسا دا، ولاردىڭ جۇمىسى بىردەن تانىلادى. ءبىراق مەن ولاي ىستەمەيمىن. مەنىڭ ءادىسىم مەن ستراتەگيام ماڭىزدىراق. ءار جەردىڭ ەرەكشەلىكتەرىن زەرتتەپ، رەسۋرستار مەن ماسەلەلەردى انىقتاپ، كەيىن ولاردى جوبالارىما ەنگىزەمىن»، - دەيدى ساۋلەتشى.

قىتايدىڭ چىڭدۋ قالاسىنان شىققان كورنەكتى ساۋلەتشى ليۋ جياكۋن 2025 -جىلعى پريتسكەر سىيلىعىنا يە بولدى. بۇل ماراپات ونىڭ ادامعا باعىتتالعان ساۋلەت ونەرىنە قوسقان ۇلەسىن مويىنداۋ رەتىندە بەرىلدى. بۇل تۋرالى Euronews جازدى.
69 جاستاعى ساۋلەتشى جانە Jiakun Architects ستۋدياسىنىڭ نەگىزىن قالاۋشى «مادەني، تاريحي، ەموتسيالىق جانە الەۋمەتتىك ولشەمدەردى ۇيلەستىرە وتىرىپ، ساۋلەت ونەرىنىڭ قوعام قۇرۋ، جاناشىرلىقتى شابىتتاندىرۋ جانە ادام رۋحىن كوتەرۋ قابىلەتىن پاش ەتەدى»، - دەلىنگەن پريتسكەر كوميتەتىنىڭ مالىمدەمەسىندە.

ول قىتاي ازاماتتارى اراسىنان بۇل بەدەلدى ماراپاتتى يەلەنگەن ەكىنشى ساۋلەتشى اتاندى. بۇعان دەيىن 2012 -جىلى ۆاڭ شۋ وسى سىيلىقتى جەڭىپ العان بولاتىن. بۇل ەرەكشە جەتىستىك، ويتكەنى قىتايدا 1990-جىلدارعا دەيىن جەكە ساۋلەت تاجىريبەسىنە تىيىم سالىنعان ەدى.

ليۋ جياكۋن ساۋلەت ونەرىنىڭ ماقساتى - «ادەمى، ادىلەتتى جانە ءقادىرلى ءومىر ءسۇرۋ ورتاسىن قۇرۋ» ەكەنىن اتاپ ءوتتى. ول كوممەرتسيالىق قاجەتتىلىكتەر مەن قوعامدىق مۇددەنى تەڭەستىرۋگە تىرىساتىنىن جەتكىزدى.

پريتسكەر كوميتەتى ونىڭ چىڭدۋ قالاسىنداعى West Village جوباسىن ەرەكشە اتاپ ءوتتى. 2015 -جىلى سالىنعان بۇل بەس قاباتتى كەشەن ءبىرتۇتاس مادەني، سپورتتىق، دەمالىس جانە كوممەرتسيالىق كەڭىستىك رەتىندە قىزمەت ەتەدى. ونىڭ اينالاسىندا جاياۋ جۇرگىنشىلەر مەن ۆەلوسيپەدشىلەرگە ارنالعان جولدار قاراستىرىلعان، ال كەشەننىڭ قۇرىلىمى تابيعي جانە جاساندى ورتانى ۇيلەستىرەدى.

تاعى ءبىر ءىرى جوباسى - چۋڭچيڭ قالاسىنداعى سىچۋان بەينەلەۋ ونەرى ينستيتۋتىنىڭ ءمۇسىن فاكۋلتەتى. بۇل عيمارات تار الاڭدا كەڭىستىك كولەمىن ارتتىرۋ ماقساتىندا جوعارى قاباتتارى العا شىعىپ تۇرعان ەرەكشە قۇرىلىممەن ەرەكشەلەنەدى.

ليۋ جياكۋن ءوزىنىڭ ساۋلەت ستيلى تۋرالى پىكىر بىلدىرە وتىرىپ، ونى تانىمال ساۋلەتشىلەردىڭ ايقىن قولتاڭباسى بار تاسىلىنەن ەرەكشەلەنەتىنىن ايتتى.

«ساۋلەتشىلەردىڭ كوبى وزىندىك بىرەگەي ستيلىمەن تانىلعىسى كەلەدى. قاي جەردە بولسا دا، ولاردىڭ جۇمىسى بىردەن تانىلادى. ءبىراق مەن ولاي ىستەمەيمىن. مەنىڭ ءادىسىم مەن ستراتەگيام ماڭىزدىراق. ءار جەردىڭ ەرەكشەلىكتەرىن زەرتتەپ، رەسۋرستار مەن ماسەلەلەردى انىقتاپ، كەيىن ولاردى جوبالارىما ەنگىزەمىن»، - دەدى ساۋلەتشى.

ونىڭ باسقا دا تانىمال جۇمىستارىنىڭ قاتارىنا چىڭدۋ قالاسىنداعى ساعات مۇراجايى (كۇن ساعاتىنىڭ كورىنىسىن بەينەلەيتىن اينالمالى اۋلاسى بار) جانە سۋجوۋداعى كىرپىشتەن سالىنعان ەرەكشە مۇراجاي جاتادى. سوڭعى جىلدارى ول ليشۋيداعى تاريحي عيباداتحانا ايماعىن جاڭعىرتىپ، لۋجوۋداعى جارتاستى ۇڭگىر كەشەنىن قايتا جانداندىرۋمەن اينالىسقان.

ليۋ قىتايدىڭ ءداستۇرلى ساۋلەتىن قازىرگى زامانعى تەحنولوگيالارمەن ۇيلەستىرۋگە تىرىساتىنىن ايتتى:

«قىتايدىڭ ءداستۇرلى ساۋلەتى كەرەمەت، ءبىراق ول ءوز ءداۋىرىنىڭ جەمىسى. ونىڭ ءمانىن ءتۇسىنىپ، زاماناۋي ادىستەرمەن جەتكىزۋ قاجەت»، - دەدى ساۋلەتشى.

پريتسكەر سىيلىعى ومىرىنە قالاي اسەر ەتەتىنى تۋرالى سۇراققا ليۋ قاراپايىم قالپىن ساقتاعىسى كەلەتىنىن اتاپ ءوتتى:

«مەن بۇل تۋرالى ويلادىم. ءبىراق مەن قالىپتى ءومىرىمدى جالعاستىرعىم كەلەدى. ءار نارسەگە الاڭداپ، قوبالجۋدى قالامايمىن. ارينە، بۇل ماعان ارتىقشىلىق بەرەدى: ءوزىمدى جارنامالاۋدىڭ قاجەتى جوق. ءبىراق بۇل مەنىڭ جۇمىسىمدى جاقسارتا ما؟ ول بەلگىسىز. شامادان تىس ءۇمىت كەيدە قىسىمعا اينالۋى مۇمكىن»، - دەپ جاۋاپ بەردى ساۋلەتشى.