قىتاي ساپارى: نۇرالحان كوشەروۆ باستاعان تۇركىستان وبلىسى دەلەگاتسياسى ءىرى ءوندىرىس ورىندارىندا بولدى
استانا. KAZINFORM - تۇركىستان وبلىسىنىڭ اكىمى نۇرالحان كوشەروۆ باستاعان رەسمي جانە ىسكەرلىك دەلەگاتسيا قىتاي حالىق رەسپۋبليكاسىنا جۇمىس ساپارى اياسىندا شاندۋڭ پروۆينتسياسىنداعى ليني قالاسىندا ورنالاسقان ءبىرقاتار ءىرى كاسىپورىنداردىڭ جۇمىسىمەن تانىستى.
دەلەگاتسيا اۋىل شارۋاشىلىعى تەحنيكاسىن وندىرەتىن «Shandong Huasheng Zhongtian» زاۋىتىمەن، ەلەكتر جەلىلەرىنە ارنالعان مەتالل تىرەكتەردى شىعاراتىن كاسىپورىن جانە كوشە جارىعىن قامتاماسىز ەتەتىن جابدىقتار وندىرىسىمەن دە تانىستى. بارلىق وندىرىستىك ورىندار زاماناۋي تەحنولوگيالارمەن جابدىقتالعان جانە ونىمدەرىن سىرتقى نارىققا ەكسپورتتايدى.
كومپانيا جوعارى بەرىك ءارى ۇزاق مەرزىمدىلىككە نەگىزدەلگەن مەتالل تىرەكتەردى وندىرەدى. بۇل ەلەكتر جەلىلەرى مەن قوعامدىق جارىقتاندىرۋ سەكتورلارىندا قولدانىلادى. كوشەلەرگە ارنالىپ ارنايى LED شامدار مەن تولىق جارىق جۇيەلەرى شىعارىلادى، قالالار مەن ونەركاسىپتىك ايماقتاردى جارىقتاندىرۋعا قولدانىلادى.
كۇن ساۋلەسىنىڭ جارىقديودتى شامدارى - كۇن ساۋلەسىن ەلەكتر ەنەرگياسىنا تۇرلەندىرەدى، ەكولوگيالىق تازا.
وبلىس اكىمى تۇركىستان وبلىسىندا جاڭادان سالىنىپ جاتقان زاۋىت، فابريكالارعا ىڭعايلى جارىقتاندىرۋ قۇرالدارىن كەڭىنەن پايدالانۋ جولدارىن قاراستىرۋدى قۇپتاپ، جاۋاپتى باسشىلارعا ءتيىستى تاپسىرما بەردى.
تۇركىستان وبلىسىندا جەرگىلىكتى ينفراقۇرىلىمدى جاڭعىرتۋ بويىنشا دا جۇيەلى جۇمىستار جۇرگىزىلىپ جاتىر. بىلتىر وڭىردە 21 مىڭنان استام كوشە شامى ورناتىلىپ، ونىڭ 14 مىڭعا جۋىعى بيۋدجەت ەسەبىنەن، قالعانى دەمەۋشىلىك ەسەبىنەن ىسكە اسىرىلدى. بيىل قوسىمشا 7522 كوشە شامىن ورناتۋ جوسپارلانعان. شەتەلدىك جاڭا تەحنولوگيانى وڭىردە قولدانۋ جولدارى قاراستىرىلادى.
سونداي-اق وبلىس اكىمى باستاعان رەسمي جانە ىسكەرلىك دەلەگاتسيا اۋىل شارۋاشىلىعى تەحنيكاسى كورمە ورتالىعىنا دا بارىپ، امبەباپ بەنزين قوزعالتقىشتارى، باۋ-باقشا، ساياباق جانە ورمان شارۋاشىلىعى تەحنيكالارىنىڭ سوڭعى ۇلگىلەرىن كوردى.
ساپار قورىتىندىسى بويىنشا تاراپتار ينۆەستيتسيالىق ىنتىماقتاستىقتى كەڭەيتۋ، جاڭا وندىرىستەر اشۋ، تەحنولوگيا ترانسفەرى جانە كادرلار دايارلاۋ ماسەلەلەرى بويىنشا ناقتى ۇسىنىستارمەن الماسىپ، كەلىسسوزدەر جۇرگىزدى.
تۇركىستان وبلىسى اكىمدىگى شەتەلدىك سەرىكتەستەرمەن تىعىز بايلانىس ورناتىپ، وڭىرگە ينۆەستيتسيا تارتۋ جانە جاڭا وندىرىستەردى ىسكە قوسۋ ارقىلى حالىقتىڭ ءال-اۋقاتىن ارتتىرۋدى باستى ماقسات رەتىندە قويىپ وتىر.
ساپار بارىسىندا دەلەگاتسيا الەمگە تانىمال «Shandong Kamoya Smart Culture and Tourism Technology Co.، Ltd.» كومپانياسىنىڭ زاۋىتىتتارىنا بارىپ، سمارت كاپسۋلالى ۇيلەر، تاسىمالداناتىن مودۋلدىك قۇرىلىمدار جانە زاماناۋي تۋريستىك ينفراقۇرىلىم نىساندارىنىڭ وندىرىسىمەن تانىستى. كومپانيا مەن BNK GROUP LTD ج ش س اراسىندا كاپسۋلالى ۇيلەردى قۇراستىرۋ بويىنشا بىرلەسكەن جوبا باستالىپ كەتتى. الداعى ۋاقىتتا بۇل ۇيلەر تۇركىستاندا «KHAN TAU» برەندىمەن وندىرىلەتىن بولادى. قازىرگى تاڭدا العاشقى دايىن ءونىم تۇركىستان وڭىرىنە جونەلتۋگە ءازىر.
