قىتاي س ءى م: قازاقستانمەن ماڭىزدى ءىس-شارالاردى جوعارى دەڭگەيدە بىرلەسىپ وتكىزۋگە دايىنبىز

استانا. KAZINFORM - قىتاي قازاقستانمەن دامۋ ستراتەگيالارىن ۇشتاستىرۋدى جالعاستىرۋعا، ءوزارا ءتيىمدى ىنتىماقتاستىقتى تەرەڭدەتۋگە، بيىلعى ماڭىزدى ءىس-شارالاردى جوعارى دەڭگەيدە بىرلەسە وتكىزۋگە، ەكى ەل باسشىلارىنىڭ كەلىسىمىنەن ناقتى ناتيجە شىعارا وتىرىپ، قىتاي- قازاق قارىم-قاتىناسىن جاڭا بيىككە كوتەرۋگە دايىن. بۇل تۋرالى قىتاي سىرتقى ىستەر مينيسترلىگىنىڭ رەسمي وكىلى گو جياكۋن ايتتى.

شينحۋا اگەنتتىگىنىڭ جازۋىنشا، 7-قاڭتار كۇنى وتكەن بريفينگتە جۋرناليستەردىڭ ءبىرى «قازاقستان پرەزيدەنتى توقايەۆ جاقىندا بەرگەن سۇقباتىندا «قىتاي ءۇشىن قازاقستان - اسا ماڭىزدى ستراتەگيالىق سەرىكتەس. قارقىندى ءارى جان-جاقتى دامىپ كەلە جاتقان قازاق- قىتاي ىنتىماقتاستىعى، شىن مانىندە، ماڭگى ستراتەگيالىق سەرىكتەستىك دەڭگەيىنە جەتتى. قىتايمەن جان-جاقتى ىنتىماقتاستىقتى ودان ءارى دامىتۋ قازاق ديپلوماتياسىنداعى ماڭىزدى مىندەتتىڭ ءبىرى بولىپ قالا بەرەدى. 2023 -جىلى قازاقستان مەن قىتاي اراسىندا ءوزارا ۆيزاسىز رەجيم ورناتىلدى. جاڭا باستاما الىس-بەرىستى دامىتۋعا جانە ەكى حالىقتىڭ دوستىعىن نىعايتۋعا وڭ اسەرىن تيگىزىپ جاتىر. قازاقستان ازاماتتارى قىتايدى جاڭا قىرىنان تانىپ، ونىڭ تەحنولوگيالىق تۇرعىدان الىپ مەملەكەتكە اينالعانىنا كوز جەتكىزە باستادى. قىتاي جۇرتى دا ءبىزدىڭ وتانداستارىمىزعا دوستىق پەيىل تانىتىپ وتىر، دەپ اتاپ كورسەتتى. ءسىز بۇعان نە ايتاسىز؟» دەپ سۇراعان.

بۇعان جاۋاپ رەتىندە گو جياكۋن قىتاي مەن قازاقستاننىڭ جاقىن كورشى، جاقسى دوس جانە سەنىمدى ارىپتەستەر ەكەنىن اتاپ ءوتتى.

- پرەزيدەنت توقايەۆ اتاپ وتكەندەي، قىتاي مەن قازاقستاننىڭ ىنتىماقتاستىعى جان-جاقتى جانە قارقىندى دامىپ كەلەدى. سوڭعى جىلدارى ءتوراعا شي جينپيڭ مەن پرەزيدەنت توقايەۆتىڭ ستراتەگيالىق جەتەكشىلىگى جانە تىكەلەي قامقورلىعىنىڭ ارقاسىندا قىتاي مەن قازاقستاننىڭ ءتۇرلى سالاداعى ىنتىماقتاستىعى دامۋدىڭ داڭعىل جولىنا ءتۇستى، - دەدى رەسمي وكىل.

گو جياكۋننىڭ ايتۋىنشا، 2024 -جىل قىتاي- قازاق قارىم-قاتىناسىنىڭ تاريحىنداعى تاعى ءبىر «بەرەكەلى جىل» بولدى. ق ح ر ءتوراعاسى شي جينپيڭ قازاقستانعا مەملەكەتتىك ساپارمەن بارىپ، پرەزيدەنت توقايەۆپەن ەكى ەلدىڭ قارىم-قاتىناسىنا بايلانىستى ماڭىزدى ۋاعدالاستىققا قول جەتكىزدى. رەسمي وكىلدىڭ پىكىرىنشە، بۇل ەكىجاقتى ىنتىماقتاستىققا قۋاتتى سەرپىن بەردى.

- ەكى ەل اراسىندا ءتۇرلى دەڭگەيدەگى دەلەگاتسيالارىنىڭ ساپارلارى جيىلەپ، ساۋدا- ەكونوميكالىق ىنتىماقتاستىق قارقىندى ءوسىپ كەلەدى، وندىرىستىك قۋات، ءوزارا بايلانىس، اۋىل شارۋاشىلىعى جانە جاڭا ەنەرگيا كوزدەرى سەكىلدى سالالارداعى ىنتىماقتاستىق العا جىلجي ءتۇستى. گۋمانيتارلىق سالاداعى ىنتىماقتاستىق جاڭا جەتىستىكتەرگە قول جەتكىزىپ، حالىقتار اراسىنداعى بارىس- كەلىس رەكوردتىق دەڭگەيگە جەتتى، - دەپ اتاپ ءوتتى گو جياكۋن.

اۆتور

ەرلان مازان