قىتاي رۋبيونى سانكسيادان بوساتا ما؟
استانا. KAZINFORM - قىتاي سىرتقى ىستەر مينيسترلىگىنىڭ رەسمي وكىلى گو جياكۋن سەيسەنبى كۇنى ا ق ش- نىڭ جاڭا مەملەكەتتىك حاتشىسى ماركو رۋبيونى سانكسيادان بوساتۋ مۇمكىندىگى تۋرالى پىكىر ءبىلدىردى.

بۇل تۋرالى سينگاپۋرلىق Lianhe Zaobao باسىلىمى جازدى.
كەزەكتى باسپا ءسوز ماسليحاتىندا تىلشىلەردىڭ ءبىرى «رۋبيو ترامپ ۇكىمەتىنىڭ مەملەكەتتىك حاتشىسى قىزمەتىنە كىرىسكەنىن راستادى. قىتاي ۇكىمەتى 2020 -جىلى رۋبيوعا سانكسيا سالعان بولاتىن. بۇل جاعدايدىڭ قىتاي- ا ق ش قارىم- قاتىناسىنىڭ دامۋىنا قيىندىق تۋدىرۋى جانە توسقاۋىل جاساۋى مۇمكىن ەكەنىن ەسكەرە وتىرىپ، قىتاي تاراپى رۋبيوعا قاتىستى سانكسيانىڭ كۇشىن جويۋدى قاراستىرۋى مۇمكىن بە؟» دەپ سۇرادى.
گو جياكۋن بۇل سۇراققا تىكە جاۋاپ قايتارماي، قىتاي مەن ا ق ش- تىڭ جوعارى لاۋازىمدى تۇلعالارى اراسىنداعى بايلانىستى ساقتاۋىڭ قاجەتتىلىگى تۋرالى عانا ايتتى.
- قىتاي ءوزىنىڭ ۇلتتىق مۇددەلەرىن تاباندى تۇردە قورعايدى، سونىمەن قاتار قىتاي مەن ا ق ش- تىڭ جوعارى لاۋازىمدى تۇلعالارى ءتيىستى تاسىلدەرمەن ءوزارا بايلانىستى ساقتاۋى قاجەت، - دەدى رەسمي وكىل.
قىتاي تاراپى «قىتايعا قارسى ايعايشى» دەپ اتاعان ماركو رۋبيو 20 - قاڭتار كۇنى رەسمي تۇردە ا ق ش مەملەكەتتىك حاتشىسى قىزمەتىنە تاعايىندالدى.
رۋبيو ادام قۇقىقتارىنا قاتىستى ماسەلەلەر بويىنشا شىڭجاڭ مەن گونكونگتاعى جاعدايعا سىن ايتقانى ءۇشىن 2020 - جىلى ەكى مارتە بەيجىڭنىڭ سانكسياسىنا ۇشىراعان بولاتىن.