قىتاي قازاقتارىنىڭ كوشپەندى ءومىرى تۋرالى فيلم ەۋروپادا كورسەتىلەدى

استانا. KAZINFORM - قىتاي قازاقتارىنىڭ كوشپەندى ءومىرى تۋرالى «ءداۋىر اعىسىندا (Fade Away Pastoral)» اتتى فيلم بەرليندە كورسەتىلدى.

chinanews.com.cn سايتىنىڭ حابارلاۋىنشا، فيلم «Little Monster Entertainment» مەديا كومپانياسىنىڭ قولداۋىمەن، ەۋروپاداعى ارنايى كورسەتىلىمىن باستاعان.

كورسەتىلىمنەن كەيىن، كوپتەگەن ەۋروپالىق كورەرمەن شىڭجاڭ تۋرالى فيلمدى العاش رەت كورىپ، كوشپەندى قازاقتار ومىرىمەن العاش رەت تانىسىپ وتىرعانىن ايتتى.

ايتا كەتەرلىگى، «ءداۋىر اعىسىندا» فيلمى 2018-جىلى قىتايدا العاش كورسەتىلىپ، 2019-جىلى 12-ساۋىردە پروكاتقا شىققان. «ۇزدىك كينەماتوگرافيا»، «ۇزدىك تۋىندى»، «ۇزدىك ەر اكتەر» جانە «ۇزدىك اۋىل تاقىرىبىنداعى فيلم» نوميناتسيالارىن جەڭىپ العان.

فيلم ۇرپاقتان-ۇرپاققا جالعاسقان قىتاي قازاقتارىنىڭ كوشپەندى ءومىرىن تاقىرىپ ەتىپ، ولاردىڭ سوڭعى 40 جىلداعى ومىرىندەگى وزگەرىستەردى شىنايى دەرەكتەردى جانە جارتىلاي سيۋجەتتىك ءادىستى پايدالانا وتىرىپ سۋرەتتەيدى. سونداي-اق، جىلدىڭ ءتورت مەزگىلىنىڭ اۋىسۋى پروزالىق بايانداۋ مەن پوەتيكالىق كينو ءتىلى ارقىلى، مالشىلاردىڭ قۋانىشى مەن مۇڭىن ايشىقتاپ، كورەرمەنگە ءتابيعاتتىڭ اسەم كورىنىسىن ۇسىنادى.

سونداي-اق، فيلمنىڭ باستى جانە قوسىمشا رولدەرىن دەرلىك قازاق اكتەرلەر سومداعان. ال 4 جىلعا سوزىلعان تۇسىرىلىمگە 10 مىڭعا جۋىق قاراپايىم قازاق تۇرعىندار قاتىسىپ، 300 مىڭعا جۋىق مال پايدالانىلدى.

اۆتور مۇحتار قاليموللا ۇلى