قىتاي قازاقتارى تۋرالى تەلەسەريال قىتايدىڭ باستى تەلەارناسىندا كورسەتىلەدى
استانا. KAZINFORM - قىتاي قازاقتارىنىڭ تۇرمىس-تىرشىلىگى تۋرالى شاعىن تەلەسەريال «مەنىڭ التايىم» 7-مامىردان باستاپ قىتاي ورتالىق تەلەۆيزياسى CCTV-1 تەلەارناسىندا كورسەتىلە باستايدى.
تيان-شان پورتالىنىڭ حابارلاۋىنشا، 8 سەريادان تۇراتىن تۋىندى شىڭجاڭدىق جازۋشى لي جيۋۋاننىڭ «مەنىڭ التايىم» شىعارماسىنان الىنعان. باستى رولدەردە قىتايلىق تانىمال اكتەر ما يلي جانە چجوۋ يران، شىڭجاڭدىق قانداسىمىز الما جانە قايرات وينايدى.
«مەنىڭ التايىم» شىعارماسى 2010-جىلى جارىق كورگەن. وندا جازۋشى لي جيۋۋاننىڭ اناسىمەن بىرگە التاي ايماعىنىڭ قازاق اۋىلىنداعى باستان كەشكەن وقيعالارى، كوركەم تابيعات پەن قازاقتاردىڭ تۇرمىس-تىرشىلىگى سۋرەتتەلەدى.
ايتا كەتەيىك، «مەنىڭ التايىم» تەلەسەريالى 2024-جىلعى كانن كينوفەستيۆالى ۇزاق درامالىق سەريالداردىڭ بايقاۋ بولىمىنە ۇسىنىلىپ، الەمدىك پرەمەراسى وتكەن.
اۆتور مۇحتار قاليموللا ۇلى