قىتاي قازاقستاننىڭ نەگىزگى ساۋدا سەرىكتەسىنە اينالدى

 استانا. KAZINFORM - «QazTrade ساۋدا ساياساتىن دامىتۋ» اكسيونەرلىك قوعامى 2023 -جىلدىڭ سىرتقى ساۋداداعى قورىتىندىسىن جاريالادى.

كومپانيانىڭ باسپا ءسوز قىزمەتى 2023 -جىلى قازاقستان تاۋارىن ەڭ كوپ ساتىپ العان ەلدەردىڭ كوشىن قىتاي، رەسەي جانە يتاليا بولعانىن مالىمدەپ وتىر.

كوش باسىنداعى قىتايمەن اراداعى ساۋدا اينالىمىنىڭ %56,3 ى ەكسپورتقا تيەسىلى كورىنەدى. جالپى بۇل ەلمەن اراداعى ساۋدا اينالىمىنىڭ اقشاعا شاققانداعى كولەمى - 31,5 ميلليارد دوللار.

ەكىنشى ورىنداعى رەسەيمەن ساۋدا اينالىمى 26 ميلليارد دوللار بولسا، يتاليا - 16,1 ميلليارد دوللار بولعان. ودان كەيىنگى وڭتۇستىك كورەيامەن جانە تۇركياداعى اراداعى الىس-بەرىس كولەمى 6 ميلليارد دوللارعا جەتكەن.

قازاقستان ەكسپورتتاعان تاۋارلاردىڭ باسىندا ادەتتەگىدەي شيكى مۇناي مەن مۇناي ونىمدەرى تۇر. ال ەڭ كوپ يمپورتتالعان تاۋارلاردىڭ قاتارىن قوندىرعىلار، كولىك جانە ونىڭ بولشەكتەرى، ەلەكترلى تەحنيكا مەن قۇندى ەمەس مەتالدار باستاپ تۇر.

كومپانيانىڭ مالىمەتىندە قازاقستان ساۋدا جاسايتىن ەلدەردىڭ قاتارى 131 دەن 135 ەلگە وسكەنى ايتىلعان.

قازاقستاننىڭ شيكىزات ەمەس ەكسپورتى قىتايدا، كازاحستان (%10)، گونكونگتا (%34)، وڭتۇستىك كورەيادا (%30)، ۆەتنامدا (%64) ارتقان. ال اۋىل شارۋاشىلىعى (%3,7) مەن ونەركاسىپتەگى (%9,8) شيكىزات ەمەس ەكسپورت كولەمى ازايعان.

ءبىر جىل بۇرىنعى دەرەكتەرگە قاراساق، 2022 -جىلى قازاقستاننىڭ باستى ساۋدا سەرىكتەستىگى يتاليا (13,9 ميلليارد دوللار) مەن قىتاي (13,2 ميلليارد دوللار) بولعان. ودان كەيىنگى ورىندارعا رەسەي (8,8 ميلليارد دوللار)، نيدەرلاند (5,48 ميلليارد دوللار) جانە تۇركيا جايعاسقان ەدى (4,75 ميلليارد دوللار).

اۆتور

ەسىمجان ناقتىباي